Častka ekśpierymientalnaha pratatypa reaktara na termajadziernym sintezie ad kampanii Helion Energy. Fota: Helion Energy
Vydańnie The Wall Street Journal 10 maja ekskluziŭna paviedamiła ab tym, što pieršy ŭ śviecie kamiercyjny termajadzierny reaktar pavinien zapracavać da 2028 hoda. Reaktar kampanii Helion Energy paśla pabudovy absłužyć svajho pieršaha klijenta — karparacyju Microsoft.
Pa infarmacyi vydańnia, Microsoft zaklučyła damovu z Helion Energy na poŭnaje ŭviadzieńnie ŭ ekspłuatacyju kamiercyjnaha reaktara na termajadziernym sintezie da 2028 hoda i dalejšuju pastaŭku elektraenierhii ŭ kolkaści nie mienš za 50 miehavat praz hod paśla pačatku pracy reaktara.
Hetaj kolkaści enierhii vielmi niedastatkova dla patreb Microsoft (jakaja spažyvaje zvyš 1,2 hihavat elektraenierhii ŭ hod), adnak jašče nichto ŭ śviecie nie vyrablaŭ elektryčnaść šlacham termajadziernaha sintezu i, pa padlikach analitykaŭ MAHATE, nie budzie zdolny na heta až da druhoj pałovy XXI stahodździa.
«My b nie zaklučyli hetaje pahadnieńnie, kali b nie byli nastrojeny aptymistyčna nakont taho, što inžyniernyja dasiahnieńni buduć paśpiachovymi», — skazaŭ prezident Microsoft Bred Śmit.
Dla taho, kab prajekt staŭ paśpiachovym, reaktaru nieabchodna vypracoŭvać bolš enierhii, čym jon sam spažyvaje (što źjaŭlajecca adnoj z hałoŭnych prablem na šlachu zavajavańnia termajadziernaj enierhii). Aproč hetaha, vypracavanaja elektryčnaść pavinna mieć prymalnuju, nie zanadta darahuju canu, kab być kankurentazdolnaj na hłabalnym enierharynku.
Kali reaktar nie budzie pabudavany ŭ akreśleny termin, abo nie vypracuje naležnuju kolkaść elektraenierhii z adpaviednaściu kankurentazdolnym kryteryjam, to Microsoft nakładzie na kampaniju Helion Energy značnyja finansavyja štrafy, pamier jakich prapisany ŭ kantrakcie.
«Va ŭmovach kantraktu jość niekatoraja hnutkaść, ale vielmi važny punkt abviaščaje, što Helion paniasie značnyja finansavyja straty, kali zadača nie budzie vykananaja. Pry hetym my ličym, što pratatyp reaktara budzie hatovy ŭžo ŭ nastupnym hodzie i heta daść vyrazny sihnał ab hatoŭnaści da kamiercyjalizacyi termajadziernaha sintezu», — adznačyŭ Devid Kirtli, hienieralny dyrektar kampanii Helion Energy.
Sam reaktar budzie pabudavany ŭ Vašynhtonie i budzie zabiaśpiečvać enierhijaj niekalki abjektaŭ Microsoft. A ŭ budučyni zmoža ŭziać na siabie rolu asnoŭnaj krynicy enierhii dla industryi štučnaha intelektu.
Čamu heta vielmi važnaja navina?
Termajadziernaja enierhija źjaŭlajecca amal nievyčerpnaj krynicaj čystaj i mahutnaj enierhii, jakaja pry hetym praktyčna nie pakidaje škodnych dla navakolnaha asiarodździa adkidaŭ.
Praces atrymańnia padobnaj enierhii — termajadzierny sintez — źjaŭlajecca poŭnaj supraćlehłaściu jadziernaha sintezu i nie rasščaplaje atamy, a naadvarot, źlivaje ich razam, što daje značna bolš biaśpiečnaj enierhii na vychadzie. Hety vid sintezu zabiaśpiečvaje enierhijaj naša Sonca i ŭsie astatnija zorki ŭ bačnym nam Suśviecie.
Ale hałoŭnyja składanaści va ŭtajmavańni takoha vidu enierhii — u tym, što jaje mahutnaść vielmi składana kantralavać u ziamnych umovach, a dla atrymańnia nieabchodna takaja ž kałasalnaja kolkaść enierhii i nie mienš kałasalnaja tempieratura nahrevu (100 miljonaŭ hradusaŭ Celsija) dla padtrymańnia pracesu sintezu.
Tamu źjaŭleńnie ŭ śviecie kamiercyjnych termajadziernych reaktaraŭ jak minimum prybiare z paradku dnia čałaviectva pytańnie ab niedachopie enierhii, a jak maksimum — značna sprościć i paskoryć raznastajnyja technałahičnyja skoki i praces vyvučeńnia Suśvietu.
Čytajcie taksama:
Ci zmohuć akijanskija chvali stać dla čałaviectva nievyčerpnaj krynicaj enierhii?
