Alaksiej Arastovič Aleksiej Ariestovič Oleksii Arestovych

Alaksiej Arastovič padčas intervju. Kadr ź videa

Na dumku Alaksieja Arastoviča, jakuju jon vykazaŭ u intervju jutub-kanału «Fiejhin LIVE», u vypadku śmierci Łukašenki ŭźniknie rezkaje abvastreńnie ŭnutranaj i źniešniepalityčnaj situacyi vakoł Biełarusi. I nastupstvy hetaha abvastreńnia nieviadomyja.

Jon adznačaje dźvie hrupy mierkavańniaŭ. Pieršaja — Maskva zaraz ža pasprabuje pastavić svaju maryjanietku i akupavać Biełaruś. Druhaja — u Biełarusi pačnucca pracesy, jakija dazvolać «vyrvacca z kipciuroŭ» Maskvy.

Były daradca Ofisa prezidenta Ukrainy nie vieryć u chutkuju akupacyju Biełarusi. I tłumačyć, čamu.

U Rasii, na jaho pohlad, niama nivodnaha svabodnaha siłavika na toje, kab «niešta tam akupavać, stabilizavać i kiravać».

Pa-druhoje, jak adznačaje Arastovič, nastroi ŭ Biełarusi kateharyčna suprać ustupleńnia ŭ vajnu ŭ luboj formie i znachodžańnia ŭ hetaj vajnie.

«Łukašenka, kali ŭtrymlivaŭ biełaruskuju armiju ad ustupleńnia ŭ vajnu, jon apielavaŭ da mierkavańnia naroda ŭ hetym. Usie biełarusy razumiejuć, što im dakładna nie treba ŭ hetuju vajnu ŭstupać. I nie tamu, što jon [Łukašenka] taki załaty i jachantavy. (…) Tut na redkaść supali mierkavańni».

Arastovič nie dumaje, što novy kiraŭnik, «niezaležna ad taho, maryjanietka, ci nie, zmoža pierałamać trend i prymusić biełarusaŭ vajavać». Tamu jon nie vielmi aścierahajecca śmierci Łukašenki i nie vieryć, što heta moža pryvieści da ŭstupleńnia Biełarusi ŭ vajnu. Chutčej, naadvarot:

«Śmierć Łukašenki ŭtrymlivaje ŭ sabie vielmi mocnuju mahčymaść dla kontrhulni. Uvieś kłan Łukašenki budzie źniesieny. Pryjduć niejkija palityki, jakija nie mohuć nie być kampramisnymi, tamu što siłaj ciapier u Biełarusi ŭładu nie naviažaš. Čysta maskoŭskaha staŭlenika tam nie budzie va ŭmovach, jakija tam skłalisia. I tamu jość niadrenny šaniec na toje, što va ŭładu pryjduć ludzi ź inšym punktam hledžańnia adnosna Maskvy. I ź inšym punktam hledžańnia adnosna Ukrainy. Jany dakładna nie zacikaŭlenyja ŭ vajnie».

Alaksiej Arastovič ličyć, što śmierć Łukašenki značnym čynam paŭpłyvała b na chod hetaj vajny. A taksama pryviała b da poŭnaha pierafarmatavańnia situacyi ŭ Biełarusi i, adpaviedna, va ŭsich sumiežnych krainach pa biełaruskim viektary. Jon ličyć, što na padziei, jakija razhornucca ŭ Biełarusi, va Ukrainy taksama budzie šaniec paŭpłyvać dypłamatyčnym šlacham.

Były daradca Ofisa prezidenta Ukrainy adznačaje, što jon «bolš aściarožny aptymist u hetym pytańni, čym piesimist adnosna taho, što 40 tysiač biełaruskich sałdat pabiahuć vajavać z Ukrainaj».

U kancy svaich razvah Alaksiej Arastovič jašče raz padkreśliŭ, što nie vieryć u toje, što Biełaruś stanie pramaskoŭskaj: «Tam niama takoha patencyjału ad słova naohuł. Čaho jany nie chočuć, dyk heta stanavicca pramaskoŭskimi. Tym bolš, pramaskoŭskimi ŭ varyjancie vajny z Ukrainaj».

Čytajcie jašče:

Arastovič ličyć, što mahčymaja druhaja rasijska-ŭkrainskaja vajna. I nazvaŭ mierkavanyja daty

Arastovič raskazaŭ, jak na pačatku vajny zachodnija palityki čakali ad Ukrainy kampramisu

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?