Ministerstva justycyi Italii. Fota: Wikimedia Commons
Arciomu Usu, synu ŭpłyvovaha rasijskaha palityka, blizkaha da prezidenta Uładzimira Pucina, udałosia źbiehčy ŭ Maskvu paśla taho, jak Italija pryznačyła jamu chatni aryšt, niahledziačy na papiaredžańni ZŠA pra toje, što jon moža ŭciačy.
Pa słovach ludziej, znajomych z padziejami, Us źbieh ad italjanskaj palicyi, vykarystoŭvajučy aŭtamabili i mižnarodnuju sietku pamočnikaŭ, u tym liku sierbskuju złačynnuju hrupoŭku.
Heta sprava vyklikała napružańnie ŭ adnosinach pamiž ZŠA i Italijaj, a taksama pazbaviła Złučanyja Štaty patencyjna kaštoŭnaha aktyvu ŭ abmienie źniavolenymi, jakija ŭtrymlivajucca ŭ Rasii, jak, naprykład, reparcior Wall Street Journal Evan Hierškovič, jakoha ŭrad ZŠA ličyć zatrymanym niepravamierna.
Us moh by być samym upłyvovym ruskim siarod tych, što znachodziacca pad vartaj na Zachadzie, z taho času, jak Maskva pačała poŭnamaštabnaje ŭvarvańnie va Ukrainu. Jaho baćka, Alaksandr Us, da niadaŭniaha času hubiernatar Krasnajarskaha kraju, vializnaj i bahataj na naftu častki Sibiry, padziakavaŭ Pucinu za viartańnie syna. «Asobnyja słovy padziaki našamu prezidentu. Jon nie prosta kiraŭnik našaj dziaržavy, heta čałaviek ź vialikim i adkrytym sercam», — skazaŭ Us-starejšy.
Ambasada ZŠA ŭ Rymie zajaviła, što «rasčaravanaja» tym, što Us zmoh źbiehčy. Jurysty taksama adznačajuć, što Rym niedaacaniŭ važnaść Usa jak dla Maskvy, tak i dla Vašynhtona, i nie pryniaŭ dastatkovych mier zaściarohi.
Niazdolnaść Italii praduchilić ucioki Usa vyklikała padazreńni ŭ mahčymaj karupcyi, zmovie abo prarasijskich upłyvach u niekatorych častkach urada ci sudovaj sistemy.
Ale, pa słovach pradstaŭnikoŭ italjanskaj sistemy justycyi, ucioki syna rasijskaha čynoŭnika častkova źviazanyja ź pierahružanaściu sistemy pravasudździa, dzie turemnaje źniavoleńnie razhladajecca jak krajniaja miera, tamu čaściej pryznačajecca chatni aryšt i zabarona na pajezdki.
U pačatku 2022 hoda pravaachoŭnyja orhany ZŠA pačali źbirać dokazy taho, što Us i jahony dziełavy partnior vykarystoŭvali handlovuju kampaniju, jakaja bazujecca ŭ Hiermanii, dla kantrabandy vieniesuelskaj nafty i ekspartu sakretnych amierykanskich technałohij padvojnaha pryznačeńnia ŭ Rasiju. Siudy ŭvachodziać mikračypy, jakija vykarystoŭvajucca ŭ balistyčnych rakietach, źniščalnikach i «razumnych» bojeprypasach, niekatoryja ź jakich byli znojdzienyja na poli boju va Ukrainie.
17 kastryčnika italjanskaja palicyja aryštavała Arcioma Usa ŭ miłanskim aeraporcie Malpiensa, kali jon rychtavaŭsia da pasadki na rejs u Stambuł, jaki źjaŭlajecca zvyčajnym prypynkam na šlachu ŭ Maskvu. Usa advieźli ŭ turmu ŭ pryharadzie Miłana. ZŠA paprasili Italiju praciahvać u tym ža duchu.
Ministerstva justycyi ZŠA paviedamiła Ministerstvu justycyi Italii ŭ liście, što isnuje «vidavočnaja i istotnaja ryzyka ŭciokaŭ». Niahledziačy na heta, 25 listapada kalehija z troch sudździaŭ suda Miłana zadavoliła chadajnictva Usa ab pieravodzie jaho pad chatni aryšt. Prakuratura hetaje rašeńnie nie abskardziła.
Ataše Ministerstva justycyi pry pasolstvie ZŠA ŭ Rymie napisaŭ u Ministerstva justycyi Italii list z prośbaj pierahledzieć svajo rašeńnie.
U liście adznačałasia, što šeść čałaviek, jakich šukajuć dla ekstradycyi ŭ ZŠA, źbiehli z-pad chatniaha aryštu ŭ Italii tolki za papiarednija try hady.
Kab supakoić amierykancaŭ, ministerstva zajaviła, što Us pavinien nasić elektronnuju pryładu dla sačeńnia na ščykałatcy i što ŭ sistemie pravasudździa Italii «chatni aryšt va ŭsich adnosinach raŭnaznačny ŭtrymańniu pad vartaj da suda».
U pačatku śniežnia Us pačaŭ svoj chatni aryšt u prestyžnym žyłym kompleksie niedaloka ad Miłana. Jamu dazvolili mabilny telefon, dostup u internet i naviedvalnikaŭ.
Palicyja praviarała jaho niekalki razoŭ na dzień, u tym liku ranicaj u dzień uciokaŭ.
22 sakavika, na nastupny dzień paśla taho, jak miłanski sud zadavoliŭ zapyt ZŠA ab ekstradycyi, Us źnik.
Jaho pryłada dla sačeńnia na ščykałatcy, jakaja pracavała tolki ŭ sietcy Wi-Fi ŭ kvatery, papiaredziła karabinieraŭ u 13:52, što jon pakinuŭ budynak. Ale kali pryjechała palicyja, było ŭžo pozna.
Miarkujecca, što vyvieźci jaho ź Italii dapamahła banda sierbskich złačyncaŭ. Italjanskija ŭłady ličać, što ahienty rasijskaj vyviedki nie brali niepasrednaha ŭdziełu va ŭciokach, bo ryzyka taho, što za imi nazirajuć, była zanadta vysokaj.
Pa słovach krynic, znajomych z padziejami, Us jak minimum adzin raz mianiaŭ mašyny i pierasiakaŭ niekalki miež pa darozie ŭ Sierbiju, adkul, jak ličycca, jon vylecieŭ u Maskvu.
«Ja ŭ Rasii! U apošnija niekalki asabliva dramatyčnych dzion pobač sa mnoj byli mocnyja i nadziejnyja ludzi, — skazaŭ Us 4 krasavika rasijskamu dziaržaŭnamu infarmacyjnamu ahienctvu «RIA Naviny». — Italjanski sud, na biesstaronnaść jakoha ja pieršapačatkova raźličvaŭ, prademanstravaŭ svaju vidavočnuju palityčnuju anhažavanaść. Na žal, jon hatovy prahnucca pad ciskam uład ZŠA», — skazaŭ Us.
Choć ministr justycyi Italii Karła Nordzia raspačaŭ dyscyplinarnuju spravu suprać sudździaŭ miłanskaha Apielacyjnaha suda, jakija adpravili syna eks-hubiernatara Krasnajarskaha kraju Usa pad chatni aryšt, troje sudździaŭ naŭrad ci buduć pakaranyja. «Adbyłasia pamyłka ŭ acency situacyi, a nie vidavočnaja pamyłka ŭ prymianieńni zakona», — skazaŭ WSJ čałaviek, znajomy sa spravaj.
Čytajcie jašče:
U Narviehii zatrymali syna byłoha kiraŭnika Rasijskaj čyhunki
