Alena Šylko

Sudździoj pa spravie Alesia Puškina, jaki siońnia pamior za kratami, była Alena Šylko. Jana sapraŭdny vieteran represij suprać biełaruskich aktyvistaŭ.

Alenie Šylko 51 hod, na pasadzie sudździ nie mienš za 17 hadoŭ. Palityčnyja spravy jana viadzie jak minimum z 2006-ha.

Situacyja tady była admietnaja. Były kiraŭnik «Ałmaza» Mikałaj Karpiankoŭ (toj samy, što paźniej kiravaŭ HUBAZiKam) biez daj pryčyny stralaŭ pa mašynie Juryja Radziviła, adnaho z kiraŭnikoŭ štaba kandydata ŭ prezidenty ŭ 2006-m Alaksandra Kazulina. Juryj Radzivił padaŭ za heta na Karpiankova ŭ sud, ale sam byŭ aryštavany i asudžany na try miesiacy aryštu za byccam by «supraciŭ milicyjantam», choć Karpiankoŭ nie zdoleŭ uciamna patłumačyć, jakaja była nahoda stralać.

Siarod samych viadomych spraŭ Šylko ŭ minułym taksama prysud Źmitru Daškieviču i Eduardu Łobavu ŭ 2010-m. Mužčynam prysudzili dva i try z pałovaj hady adpaviedna za nibyta napad na vypadkovych minakoŭ, jaki nasamreč byŭ pravakacyjaj biełaruskich śpiecsłužbaŭ napiaredadni prezidenckich vybaraŭ 2010 hoda.

Źmicier Daškievič i Eduard Łobaŭ padčas suda ŭ 2011 hodzie. Fota: «Radyjo Svaboda»

Źmicier Daškievič i Eduard Łobaŭ padčas suda ŭ 2011 hodzie. Fota: «Radyjo Svaboda»

Jana sudziła jašče jak minimum čaćviarych fihurantaŭ spravy «Płoščy-2010» i ŭsim dała roznyja terminy ŭ kałonii, ahułam kala 15 hadoŭ. Za heta jaje ŭ 2011-m uklučyli ŭ sancyjny śpis ES.

Pačynała Šylko ŭ sudzie Maskoŭskaha rajona Minska, a paśla pierajšła ŭ Minski haradski sud. Tut jana paśpieła prysudzić bolej za 60 hadoŭ źniavoleńnia biełaruskim palitviaźniam z 2020-ha.

Padčas suda Aleś Puškin parezaŭ sabie žyvot u znak pratestu 25 sakavika 2022 hoda. Sudździu heta nie zasmuciła, a samoha Alesia za heta adpravili ŭ ŠIZA na 13 sutak. Na abviaščeńni prysudu Aleś zładziŭ jašče adzin pierformans, raspranuŭšysia i pakazaŭšy svaje šramy, za što atrymaŭ jašče 13 sutak karcara. Alena Šylko prysudziła jamu piać hadoŭ źniavoleńnia, jak i prasiŭ prakuror.

Alaksandr Karol

Alaksandr Karol padčas navučańnia va ŭniviersitecie (za im akurat Akademija kiravańnia). Fota: «UKantakcie»

Alaksandr Karol padčas navučańnia va ŭniviersitecie (za im akurat Akademija kiravańnia). Fota: «UKantakcie»

Alaksandru Karalu 31 hod, i rodam jon z Babrujska. Vypusknik Akademii kiravańnia pry Łukašenku, jon pajšoŭ pracavać u prakuraturu. Pačynaŭ pamočnikam prakurora Zavodskaha rajona Minska.

Ciapier Karol atrymaŭ pavyšeńnie — pracuje staršym prakuroram adździeła dziaržaŭnaha abvinavačańnia Hienieralnaj prakuratury. Palitviaźni pa abvinavačańniach, jakija jon padtrymlivaŭ, atrymali amal 70 hadoŭ źniavoleńnia. Ale pieršaja jahonaja hučnaja sprava była suprać «ruskamircaŭ», aŭtaraŭ skandalnaha vydańnia «Rehnum».

Tady byŭ čarhovy vitok kanfliktu pamiž Łukašenkam i ŭładami RF. Aŭtaraŭ kansiervatyŭnaha vydańnia «Rehnum» Juryja Paŭłaŭca, Dźmitryja Alimkina i Siarhieja Šyptenku sudzili za «raspalvańnie mižnacyjanalnaj varožaści» praz artykuły, u jakich jany hłumilisia ź biełaruskich uład i paprakali ich niedastatkova addanym staŭleńniem da Rasii. Tady Karol zaprasiŭ im pa piać hadoŭ kałonii z adterminoŭkaj na try hady, i ŭsich traich vyzvalili ŭ zale suda.

Nastupnaja palityčnaja sprava Karala — sud nad anarchistam Źmitrom Palijenkam u 2019-m pa čatyroch kryminalnych artykułach. U znak pratestu suprać zakryćcia suda Palijenka parezaŭ sabie vieny, usčaŭsia vialiki skandał. U vyniku sud zrabili adkrytym i admovilisia ad troch artykułaŭ abvinavačańnia. Karol zaprasiŭ dla Palijenki šeść hadoŭ kałonii, ale prysudzili jamu try hady «chatniaj chimii» i vypuścili ŭ zale suda.

30 listapada 2021 hoda Karol atrymaŭ z ruk Łukašenki miedal «Za pracoŭnyja zasłuhi». Tady padčas uračystaj cyrymonii Łukašenka skazaŭ, što bačyć «ludziej, jakija hienieryrujuć vybitnyja idei», a Švied kiruje «najlepšaj u śviecie prakuraturaj».

Łukašenka vydaje miedal Karalu. Fota: BiełTA

Łukašenka vydaje miedal Karalu. Fota: BiełTA

Taksama Karol byŭ prakuroram pa spravie Kaleśnikavaj i Znaka, spravie «Viasny» i šerahu zavočnych spraŭ suprać dziejačaŭ-emihrantaŭ. A ŭviesnu 2022 hoda Karol pradstaŭlaŭ dziaržabvinavačańnie pa spravie Alesia Puškina. Jon zaprasiŭ dla mastaka piać hadoŭ strohaha režymu. Siońnia palitviazień pamior za kratami.

«Naša Niva» zapytałasia ŭ Alaksandra Karala, ci adčuvaje jon niešta z nahody śmierci Alesia Puškina. Jon pračytaŭ paviedamleńnie i, nie adkazaŭšy, vydaliŭ jaho.

Čytajcie taksama:

«Cichi čałaviek ź miakkim hołasam». Chto tyja sudździa i prakuror, jakija adpravili ŭ kałoniju błohiera Klimoviča — palitviaźnia, jaki pamior za kratami

«Jana spačatku spužałasia i pačała vynosić miakkija prysudy, ale paśla ŭsio viarnułasia na svaje kruhi». Chto jana — navapołackaja sudździa Bałabołava

Aleś Puškin: chto hety hienijalny mastak i palitviazień, što zhinuŭ u źniavoleńni

Клас
1
Панылы сорам
1
Ха-ха
0
Ого
3
Сумна
3
Абуральна
83