Michaił Zazit. Fota: lioznonews.by

Michaił Zazit. Fota: lioznonews.by

Deputata Loźnienskaha rajsavieta i dyrektara sielhaspradpryjemstva «Danukałava-Ahra» Michaiła Zazita sudziać za padrobku słužbovych dakumientaŭ. Spravu jaho i jaho namieśnicy pa žyviołahadoŭli Ludmiły Šatoranka pačaŭ raźbirać Loźnienski rajonny sud. Abaich vinavaciać pa č. 2 art. 427 KK (słužbovy padłoh).

Zazit kiruje pradpryjemstvam «Danukałava-Ahra» amal 17 hadoŭ ź nievialikim pierapynkam: dva hady jon byŭ namieśnikam kiraŭnika.

Nieŭzabavie pa viartańni ŭ dyrektarskaje kresła ŭ kastryčniku 2022 hoda Michaiła Zazita sudzili pa administracyjnaj spravie za nievykanańnie piśmovych pradpisańniaŭ kantrolnych orhanaŭ. 

Jakraz tady, paśla vykazvańniaŭ Alaksandra Łukašenki pra «abasranych karoŭ», pradpryjemstvy, što śpiecyjalizujucca na žyviołahadoŭli, trapili pad asabliva pilnuju ŭvahu. Abłasnaja prakuratura vyjaviła na fiermach u «Danukałava-Ahra» ceły šerah parušeńniaŭ vieterynarnaha i sanitarnaha zakanadaŭstva. Likvidavać ich svoječasova kiraŭnik nie zdoleŭ i byŭ pakarany štrafam pa art. 24.1 KaAP. Na toj čas jon užo byŭ deputatam Loźnienskaha rajsavieta.

Pra administracyjnaje pakarańnie dyrektara «Danukałava-Ahra» šyroka nie paviedamlałasia. Rajonnaja hazieta «Ściah pieramohi» pisała vyklučna pra pośpiechi haspadarki, praŭda, pieravažna ŭ halinie raślinavodstva (da słova, Michaił Zazit pačynaŭ svoj pracoŭny šlach u haspadarcy z pasady ahranoma).

Što da hałoŭnaj śpiecyjalizacyi — žyviołahadoŭli, — to sielhaspradpryjemstva znoŭku trapiła pad škvał krytyki. Na lutaŭskaj naradzie, pryśviečanaj stratam pahałoŭja bujnoj rahataj žyvioły, dzie Łukašenka zapatrabavaŭ nieadkładnaha vykaranieńnia niedachopaŭ, u šerahu «prablemnych» zhadali i haspadarku Michaiła Zazita: tam na 61 hram źniziŭsia siaredniasutačny rost vahi ciołak.

Pavodle miascovych rabotnikaŭ, na fiermach byli i inšyja niedachopy

Ich prychoŭvali stanoŭčymi spravazdačami. Adnak čarhovaja pravierka pryviała da suda i kiraŭnika Michaiła Zazita, i jaho namieśnicu Ludmiłu Šatoranku.

U adpaviednaści z č. 2 art. 427 KK vinavatych moža čakać štraf, pazbaŭleńnie ci abmiežavańnie voli ŭ sukupnaści z pazbaŭleńniem prava zajmać peŭnyja pasady ci zajmacca peŭnaj dziejnaściu. 

Pavodle biełaruskaha zakanadaŭstva, da adkaznaści za słužbovy padłoh razam z kiraŭnikom moža być pryciahnutaja ŭpaŭnavažanaja asoba, niepasredna adkaznaja za składańnie spravazdačnych dakumientaŭ.

Za što deputataŭ Viciebščyny sudzili raniej?

Michaił Zazit staŭ sioleta ŭžo vośmym deputatam ź Viciebščyny, kaho pryciahnuli da suda.

Jak paviedamlaŭ telehram-kanał «Viciebsk, ja hulaju», sud Połacka i Połackaha rajona pryciahnuŭ da adkaznaści adrazu troch deputataŭ sielsavietaŭ: Andrej Hierojeŭ abvinavačvaŭsia ŭ niezakonnych dziejańniach z ahniastrelnaj zbrojaj, Anastasija Tabolžyna — u machlarstvie ŭ bujnym pamiery, Branisłaŭ Pilipionak — u kradziažy šlacham złoŭžyvańnia słužbovymi paŭnamoctvami.

Za pieravyšeńnie paŭnamoctvaŭ byŭ asudžany były namieśnik staršyni Aršanskaha rajvykankama i namieśnik staršyni Barzdoŭskaha sielskaha Savieta Andrej Kanstancinaŭ. U Šumilinskim rajonie pryznali vinavataj u słužbovych padrobkach hałoŭnaha zaatechnika sielskaha pradpryjemstva «Mišnievičy», deputatku miascovaha sielskaha Savieta Maryju Barysavu.

Deputata Viciebskaha haradskoha Savieta Antona Dubovika śledstva ličyć vinavatym u atrymańni chabaru na pasadzie dyrektara domabudaŭničaha kambinata, a taksama ŭ kradziažach z vykarystańniem słužbovych paŭnamoctvaŭ.

Da hetaha pieraliku možna dałučyć i deputata Białynickaha rajsavieta 27 i 28 sklikańniaŭ Juryja Zabłockaha, jakoha sudzili ŭ Loźnienskim rajonnym sudzie.

Za paŭtornaje atrymańnie chabaru na pasadzie dyrektara Viciebskaha dziaržaŭnaha lesahaspadarčaha abjadnańnia jon asudžany da piaci z pałovaj hoda pazbaŭleńnia voli i štrafu pamieram 11 tysiač rubloŭ. Pryčym pakul heta adzinaje surovaje pakarańnie: astatnich deputataŭ karali abo «chatniaj chimijaj», abo pazbaŭleńniem voli z adterminoŭkaj na niekalki hadoŭ. 

Čytajcie taksama:

U Viciebsku zatrymali eks-bajca «Azova» pa mianušcy Teror-Mašyna. Jon tolki niadaŭna vyjšaŭ z kałonii

U Viciebsku prachodzić hramadskaje abmierkavańnie prajekta Safijskaha sabora

Minsk straciŭ lidarstva pa zarobkach

Клас
1
Панылы сорам
5
Ха-ха
7
Ого
2
Сумна
5
Абуральна
2