Śviatłana Cichanoŭskaja. Fota: «Naša Niva»

Śviatłana Cichanoŭskaja. Fota: «Naša Niva»

«Roŭna 32 hady tamu Biełaruś była abvieščana niezaležnaj dziaržavaj. Ździejśniłasia mara mnohich pakaleńniaŭ. Niezaležnaść nie zvaliłasia nam na hałavu, jak mnohija śćviardžajuć. Heta vynik hieraizmu papiarednich pakaleńniaŭ. Rašučaści zasnavalnikaŭ BNR. Achviarnaści tysiačaŭ biełarusaŭ, jakija vychodzili na vulicy. Mužnaści našaha Nobieleŭskaha łaŭreata Alesia Bialackaha, jaki ŭźniaŭ nacyjanalny ściah nad Minskim harsavietam. I narodnych deputataŭ parłamienta, jakija tady adstojvali naša prava na samavyznačeńnie», — zaznačyła Cichanoŭskaja.

Jana źviartaje ŭvahu na toje, što siońnia kraina znoŭ apynułasia na razdarožžy: ci stać častkaj «ruskaha śvietu» i rastvarycca ŭ impieryi, ci vyrvacca ź jaje kipciuroŭ i stać zamožnaj i svabodnaj jeŭrapiejskaj dziaržavaj. 

«Siońnia my z vami musim iznoŭ zmahacca za svaju niezaležnaść. Bo zaraz jana pad samaj vialikaj pahrozaj za ŭsiu najnoŭšuju historyju. Na našaj terytoryi znachodziacca rasijskija sałdaty, ich vajskovyja bazy. Najmity-złačyncy, što razburajuć ukrainskija harady i zabivajuć mirnych hramadzianaŭ. Jadziernaja zbroja, jakaja pieratvoryć Biełaruś u mišeń na vajennych kartach. U našych muziejach zamiest relikvij biełaruskaj kultury — kuvałda PVK «Vahnier». A školnikaŭ viaduć nie ŭ teatr, kab hladzieć pjesy Kupały, a pakazvajuć kałonii i pamiežnyja atrady», — kaža demakratyčny lidar Biełarusi.

«Siońnia samy čas nahadać adno adnamu, što takoje sapraŭdnaja niezaležnaść.

Heta nie iłžestabilnaść, pra jakuju kaža Łukašenka. Nie handal suvierenitetam za kredyty Kramla. A samastojnaja i efiektyŭnaja ekanomika i hodnaja apłata pracy. Mahčymaść vieści svoj biznes bieź pieraškodaŭ z boku dziaržavy. 

Niezaležnaść — heta nie ideałahičnyja schody i vajennyja parady za narodnyja hrošy, a sučasnaja infrastruktura, jakasnaja miedycyna dla ŭsich hramadzianaŭ, a nie tolki dla dziaržaŭnaj elity. Adukacyja bieź ideałahičnaha prymusu.

I, viadoma, niezaležnaść — heta nie być u čyjojści śfiery ŭpłyvu, a mahčymaść samastojna abirać partnioraŭ i šlach raźvićcia krainy. Budavać dobryja adnosiny z susiedziami. Šanavać ułasnuju historyju, movu, kulturu. I pieradavać nacyjanalnyja kaštoŭnaści z pakaleńnia ŭ pakaleńnie. 

Mienavita za takuju budučyniu my vychodzili ŭ 2020-m na vulicy. Za takuju budučyniu siońnia pakutujuć palityčnyja viaźni ŭ łukašenkaŭskich turmach. Pra takuju Biełaruś marać i tyja, chto vymušana pakinuŭ Radzimu, ale chočuć najchutčej viarnucca dadomu», — padkreślivaje Śviatłana Cichanoŭskaja.

Jana zaznačaje, što biełarusy pakazvali, što zdolnyja baranić svabodu: mirna — pratestami i zabastoŭkami; i na frantach — sa zbrojaj u rukach. Heta paćviardžaje historyja i sučasnaść.

«I ja ŭpeŭnienaja, što ŭ nas chopić i siłaŭ, i vytrymki, i rozumu pieramahčy i ciapier — u imia budučyni našych dziaciej, u imia niezaležnaści i roskvitu našaj Baćkaŭščyny. Žyvie Biełaruś!» — skazała na zakančeńnie Cichanoŭskaja.

Čytajcie taksama:

32 hady tamu Biełaruś stała niezaležnaj

Клас
10
Панылы сорам
1
Ха-ха
2
Ого
1
Сумна
0
Абуральна
1