Fota: gettyimages

Fota: gettyimages

Japonskaja pornaindustryja vielizarnaja: pa roznych padlikach, štomiesiac vypuskajecca 4500 videarolikaŭ, jakija hienierujuć abaroty ŭ sotni miljonaŭ dalaraŭ i ŭ jakich zaniata kala 10000 vykanaŭcaŭ. Niahledziačy na ​​toje, što heta daloka nie pik — japonski pornarynak skaraciŭsia z momantu svajho piku ŭ pačatku 2010-ch hadoŭ — pradukcyja jaho zastajecca surjoznym ekspartnym praduktam, u tym liku ŭ Paŭdniovuju Kareju, dzie vytvorčaść i raspaŭsiudžvańnie parnahrafii aficyjna zabaronienyja. 

Niahledziačy na šalonyja abaroty, industryja doŭhi čas isnavała ŭ «šeraj» zonie. Usio źmianiłasia ŭ traŭni 2022 hoda, kali ŭrad pryniaŭ zakon, nakiravany suprać roznaha rodu seksualnaha prymusu, jakomu časta padviarhajucca žančyny. Ciapier zakon abaviazvaje kampanii padpisvać z vykanaŭcami kantrakty, u jakich pavinna kankretna ŭdakładniacca, što «akciory» pavinny rabić padčas zdymak. Toje, što taki zakon byŭ pryniaty parłamientam Japonii, u jakim daminujuć mužčyny (tolki 15% zakanadaŭcaŭ składajuć žančyny), dla mnohich było niečakanaściu, piša The Economist.

Złoŭžyvańni ŭ pornaindustryi daŭno vyklikajuć zakłapočanaść japonskaha hramadstva. Uradavaje apytańnie ŭ 2020 hodzie pakazała, što kožnaja čaćviortaja žančyna va ŭzroście da 40 hadoŭ sutykałasia na vulicach z prapanovami ŭdziełu ŭ nibyta madelnych zdymkach. U 14 adsotkaŭ z tych, chto pahadziŭsia, paprasili potym paŭdzielničać u zdymkach, źviazanych z seksualnymi dziejańniami.

Fota: gettyimages

Fota: gettyimages

Prablema stała jašče bolš aktualnaj u minułym hodzie, kali Japonija źniziła ŭzrost paŭnalećcia z 20 da 18 hadoŭ. Heta aznačaje, što 18-hadovyja ludzi ciapier mohuć stać zakonnymi ŭdzielnikami pornaindustryi. U suviazi z hetym paviedamlajecca pra ŭsplosk kolkaści dziaŭčyn-staršakłaśnic, jakija stali pornaakciorkami. Letaś, pierš čym uzrost paŭnalećcia byŭ panižany, 40000 čałaviek padpisali anłajn-pietycyju z patrabavańniem da zakanadaŭcaŭ dazvolić anulavać ci pryznavać niepravadziejnymi pornakantrakty z udziełam 18– i 19-hadovych ludziej. Novy zakon u kančatkovym vyniku pašyryŭ abaronu taksama na ŭsie ŭzrostavyja hrupy.

Adnak zakon vyklikaŭ žorstkuju reakcyju z boku pracaŭnikoŭ pornaindustryi. Pierad pryniaćciem zakona palityki praviali słuchańni z achviarami haliny i hrupami, jakija im dapamahajuć, ale nie prykładali asablivych namahańniaŭ, kab pahavaryć z pradstaŭnikami tych šmatlikich pornazorak, jakija dobraachvotna ŭ hetaj halinie pracujuć.

Chutkaje pryniaćcie zakonaprajekta (abmierkavańnie doŭžyłasia try miesiacy) taksama vyklikała błytaninu adnosna jaho źmiestu. Apytańnie minułaha hoda pakazała, što ŭ bolš čym pałovy pornaakcioraŭ i akciorak paśla jaho pryniaćcia ŭpali dachody i prapanovy ab pracy. Akciory i pradziusary krytykavali roznyja pałažeńni zakona jak nierealistyčnyja. Siarod ich zabarona na zdymki na praciahu miesiaca paśla zaklučeńnia kantrakta i zabarona na vypusk videa na praciahu čatyroch miesiacaŭ paśla zdymak.

U 2010-ch hadach Japonija bačyła šerah abvinavačańniaŭ u prymusie. Sutyknuŭšysia z admoŭnaj hramadskaj reakcyjaj, pornaindustryja była vymušanaja transfarmavacca, kab vyžyć. U 2017 hodzie była stvoranaja śpiecyjalnaja naziralnaja arhanizacyja Adult Video Human Rights & Ethics Organization, jakaja ŭviała praviły, zhodna ź jakimi praduhledžvajucca kantrakty, rehularnyja pravierki i siertyfikacyja.

Fota: gettyimages

Fota: gettyimages

Tym nie mienš, nakolki palepšała pornaindustryja, niezrazumieła, jak i maštaby ekspłuatacyi. Adsutnaść daśledavańniaŭ robić halinu čornaj skryniaj. U toj čas jak vialikija studyi pa vytvorčaści porna, jak praviła, dziejničajuć davoli prazrysta, isnuje mnostva padpolnych pradpryjemstvaŭ, jakija ihnarujuć praviły.

Niekatoryja fieministyčnyja arhanizacyi, što dapamahajuć achviaram pornaindustryi, taksama vystupajuć suprać novaha zakona, ale na toj padstavie, što jon uzakońvaje porna. Zhodna ź imi, u seks-industryi niama takoha paniaćcia, jak «zhoda» — to bok nichto nie moža kupić seksualnuju zhodu jak takuju.

Pry hetym usim u japonskim hramadstvie jość prynamsi kansensus nakont nieabchodnaści bolš šyrokich debataŭ ab terminie «zhoda». I choć zakony ab seksie i pravach žančyn u Japonii mnohimi žycharami krainy vyznajucca sastarełymi, jany pacichu lepšajuć. Tak, sioleta ŭ červieni kraina pavysiła ŭzrost seksualnaj zhody z 13 da 16 hadoŭ; a ŭ sakaviku ź jurydyčnaha vyznačeńnia zhvałtavańnia była vydalenaja ahavorka ab tym, što złačynstva maje być źviazanaje ź fizičnaj siłaj: ciapier zhvałtavańnie vyznačajecca jak «pałavy akt biez zhody».

Prynamsi, u Japonii ciapier nie tolki prahna sočać za seksam, ale i havorać pra jaho surjozna. Ujavić u siońniašniaj Biełarusi padobnyja šyrokija hramadskija debaty niemahčyma.

Čytajcie taksama:

Porna ŭ roznych krainach Jeŭropy: u čym adroźnieńnie

Vieniera za kadram lubić inšy seks. Pornazorka-biełaruska raskazała ab pracy ŭ industryi intymnych filmaŭ

Para z Hrodna pierajechała ŭ Polšču i zarablaje hrošy zdymkami filmaŭ dla darosłych

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?