Fota: Flaglet county sheriff's office
Reza Bałučy pasprabavaŭ pieraadoleć Atłantyku na nievialikim aparacie, jaki ruchaŭsia za košt kołavaha pryvadu pa pryncypie «vaviorki ŭ kole». U roli vaviorki vystupaŭ sam Bałučy.
Supracoŭniki bierahavoj achovy spynili hieraičny prabieh prykładna za 110 km ad vostrava Tajbi ŭ štacie Džordžyja 26 žniŭnia.
Adnak 44-hadovy rekardsmien niekalki dzion admaŭlaŭsia pakidać sudna i navat pahražaŭ skončyć žyćcio samahubstvam u vypadku sproby dastać jaho adtul prymusova.
Dla hetaha ŭ jaho ŭ bahažy byŭ 30-santymietrovy nož. Akramia taho, jon pahražaŭ svaim ratavalnikam nibyta schavanaj na borcie bombaj.
Praz try dni Bałučy svoj płavalny aparat usio ž taki pakinuŭ, a bomba była falšyvaj. Jaho dastavili na bazu bierahavoj achovy ŭ Majami.
Heta daloka nie pieršaja sproba Bałučy pierasiekčy akijan takim čynam: papiarednija try skončylisia anałahična, a mienavita — u rukach marskich pamiežnikaŭ.
«Zychodziačy sa stanu sudna, jakoje płavała dziakujučy prymacavanym da jaho bujam, aficery bierahavoj achovy ZŠA vyznačyli, što Bałučy ździajśniaŭ vidavočna niebiaśpiečny rejs», — havorycca ŭ zajavie siłavych orhanaŭ.
Bałučy adpraviŭsia ŭ svajo padarožža jakraz u momant, kali Fłaryda rychtavałasia da prychodu mocnaha ŭrahanu.
Ciapier jamu vystaŭlenyja fiederalnyja abvinavačvańni u tym, što jon admaŭlaŭsia dać pamiežnikam dostup da svajho «sudna» i parušyŭ zahad kapitana porta.
Heta nie tolki nie pieršaje padarožža Bałučy ŭ «burbałcy», jak jon sam nazyvaje svoj transpart, ale i nie pieršy aryšt.
U 2021 hodzie jon byŭ aryštavany paśla taho, jak jaho vyratavali pry sprobie dabracca tym ža sposabam z Fłarydy ŭ Ńju-Jork: jaho «karabiel» akazaŭsia bolš čym za 40 km na poŭdzień ad punkta adpraŭleńnia, vidavočna, źbiŭšysia z kursu.
U 2014 hodzie jaho pryjšłosia ratavać z anałahičnaj štukoviny kala Sent-Ahaścina, a zatym, praz dva hady, jaho znoŭ pryjšłosia ratavać niepadalok ad Pałm-Bič u Fłarydzie.
U papiarednich intervju Bałučy kazaŭ, što sprabavaŭ sabrać hrošy dla roznych metaŭ, u tym liku dla biazdomnych i bierahavoj achovy, jakaja pastajanna ratuje jaho.
«Maja meta — nie tolki sabrać hrošy dla biazdomnych, ale i dla bierahavoj achovy, sabrać hrošy dla palicejskaha kiravańnia, sabrać hrošy dla pažarnaj słužby», — skazaŭ jon u Arłanda ŭ 2021 hodzie.
«Jany znachodziacca na dziaržaŭnaj słužbie, robiać heta dziela biaśpieki i dapamahajuć inšym ludziam», — dadaŭ jon.
Paśla aryštu 2021 hoda jon taksama skazaŭ u intervju telekanału Fox News, što jaho mety nasili i bolš uźniosły charaktar: «Ja pakažu ludziam, što jany pavinny rabić usio, što im chočacca. Nie treba nikoha słuchać: ažyćciaŭlajcie svaju maru!»
Čytajcie taksama:
U Cichim akijanie akuły patapili katamaran rasijskaj daśledčaj ekśpiedycyi
Kasmalot Virgin Galactic ździejśniŭ pieršy kamiercyjny palot
