Žančyna z płakatam «Dzie Viktar Babaryka?». Vilnia, 2023 hod. Fota: Naša Niva

Žančyna z płakatam «Dzie Viktar Babaryka?». Vilnia, 2023 hod. Fota: Naša Niva

Zianon Paźniak

Pa dumku Karbaleviča, u peŭnych momantach pazicyi Zianona Paźniaka i Alaksandra Łukašenki supadajuć. Siarod ich pohlad ab tym, što nie treba sankcyj suprać łukašenkaŭcaŭ, što cisk na Łukašenku moža pryvieści da poŭnaha pahłynańnia krainy Rasijaj, niehatyŭnaje staŭleńnie da libieralizmu.

«Heta nie toje što padyhryvańnie Łukašenku. Palityčnaja fiłasofija hetych ludziej maje punkty supadzieńnia. U palityčnym sensie jany antahanisty, ale pa niejkich punktach jany supadajuć».

Takoje supadzieńnie Karbalevič tłumačyć tym, što Zianon Paźniak i jaho partyja šmat hadoŭ nie prysutničali ŭ realnaj palitycy. Palitołah pryhadvaje, što apošni raz za Zianona Paźniaka źbirali podpisy ŭ 2006 hodzie. U nastupnyja 15 hadoŭ dziejnaść KCHP-BNF była skancentravanaja tolki na ŭšanavańni miemaryjała ŭ Kurapatach. Ni ŭ jakich palityčnych pracesach partyja nie ŭdzielničała. Ale Paźniak skarystaŭ narodny ruch 2020 hoda, kab viarnucca ŭ miedyjnuju prastoru.

«Choć jon niehatyŭna stavicca da Babaryki i Śviatłany Cichanoŭskaj, ale 2020 hod viarnuŭ jaho ŭ miedyjnuju prastoru. I ciapier jon znoŭ sprabuje zajavić pra siabie. I ŭ niečym heta jamu ŭdałosia. A što tyčycca jahonaj fiłasofii, palityčnaj płatformy, to jana nie mianiałasia. Ale da 2020 hoda heta mała kaho cikaviła.

U pryncypie ŭsich lidaraŭ apazicyi jon abvinavačvaŭ, što jany niečyja ahienty. Usie, chto nie byŭ siabram KCHP-BNF, nie byli jaho sajuźnikami. Heta apanienty, kali nie ahienty. Usie, chto ŭdzielničaŭ u vybarach na terytoryi Biełarusi, — heta ŭsie zdradniki, ahienty. Tamu ničoha novaha ciapier ad Paźniaka ja nie pačuŭ. Novaje tolki toje, što na heta stali źviartać uvahu. Jon staŭ zjaŭlacca ŭ miedyja, zjeździŭ va Ukrainu.

Heta čałaviek nie stolki kiraŭnik šyrokaj palityčnaj kaalicyi, kolki kiraŭnik siekty. KCHP-BNF — heta siekta imia Zianona Stanisłavaviča. Ich łozunh — «usie, chto nie z nami, toj suprać nas». Ich palityčnaja płatforma — płatforma biełaruskaha nacyjanalizmu ŭ vielmi vuzkaj interpretacyi. U Biełarusi jaje nie padzialaje bolšaść. Abjektyŭna z takoj płatformaj palityk znachodzicca ŭ marhinalnaj pazicyi», — miarkuje Karbalevič.

Čamu ŭ apazicyi nie pryžyŭsia Valer Capkała

Karbalevič vykazvaje mierkavańnie, što dla Capkały było nieprymalnym iści ŭ kamandu Śviatłany Cichanoŭskaj.

«Jon pasprabavaŭ paličyć siabie takim ža ciažkavahavikom, jak i Śviatłana Cichanoŭskaja, bo jon taksama bałatavaŭsia kandydatam u prezidenty. Choć jaho nie zarehistravali, jahonaja padtrymka była taksama dastatkova vialikaja. Da taho ž jahonaja žonka była ŭ kamandzie Cichanoŭskaj.

Tamu jon pasprabavaŭ pieraciahnuć koŭdru na siabie. Atrymlivajecca pakul nie vielmi. Ale ciapier, jak jon zajaviŭ pra siabie jak pra niejkuju samastojnuju fihuru, adstupać, pavodle jaho łohiki, niama kudy. Tamu jon sprabuje trymać niejkuju svaju dystancyju. Ale, zdajecca, čym dalej, tym horš u jaho atrymlivajecca», — kaža Karbalevič.

Što razburaje biełaruskuju apazicyju

Karbalevič ličyć, što pierš za ŭsio biełaruskuju apazicyju razburaje toje, što biełaruski palityčny režym evalucyjanavaŭ ad aŭtarytarnaha ŭ tatalitarny.

«Pry aŭtarytarnym režymie apazicyja mieła svajo miesca, choć i znachodziłasia ŭ hieta ŭnutry krainy. Jana ŭdzielničała ŭ vybarach. Jaje dapuskali da niejkich palityčnych dziejańniaŭ, ahitacyi. Inšaja reč, što nie dapuskali da ŭłady. Ciapier, kali režym pieraŭtvarajecca ŭ tatalitarny, apazicyi niama miesca ŭ samoj Biełarusi. Tam mohuć być dysidenty, palitźniavolenyja, ale apazicyja jak struktura, jak sistema, instytut źnikła», — kaža palitołah.

Zatoje, adznačaje jon, «2020 hod svaryŭ novuju zjavu, novy instytut — biełaruskuju dyjasparu, jakaja stanovicca vialikim čyńnikam upłyvu. I ŭ dyjaspary ŭ apazicyi adbyvajucca tyja pracesy, jakija da 2020-ha hoda adbyvalisia ŭnutry krainy. Heta stvareńnie kaalicyj, raskoły, sprečki. Burliŭ narmalny demakratyčny praces. Ale ŭ vuzkich kołach hieta. Ciapier heta pieramiaściłasia za miažu. Tamu kali ja baču niejkija sprečki, kanflikty, to heta norma».

Asoba Azarava

Karbalevič nie ličyć Alaksandra Azarava samastojnaj vialikaj fihuraj u apazicyjnym asiarodździ, jakaja ŭpłyvaje na apazicyjny mejnstrym.

Valery Karbalevich Valeryj Karbalevič Valerij Karbalevič

Valer Karbalevič ličyć, što kanflikty i sprečki ŭ apazicyi — heta norma. Skryn videa: TOK_talk / Youtube

«Heta čałaviek, jaki pracuje ŭ kamandzie Śviatłany Cichanoŭskaj, zajmaje peŭnuju pasadu. Toje, što ŭ jahonaj arhanizacyi zdaryŭsia kanflikt, — heta zvyčajnaja situacyja, i ja nie dumaju, što heta ŭvohule važna».

Praca Śviatłany Cichanoŭskaj

Karbalevič vielmi vysoka aceńvaje pracu Śviatłany Cichanoŭskaj. «U toj situacyi, u jakoj jana apynułasia, jana pracentaŭ na 80 realizavała svoj patencyjał, patencyjał toj častki apazicyi, jakaja vyjechała za miažu.

Jana faktyčna pierachapiła zamiežnuju palityku Biełarusi ŭ zachodnim kirunku. Jana sustrełasia z takoj kolkaściu zamiežnych palitykaŭ, ab jakoj Łukašenka nie moh maryć usie 30 hadoŭ svajho kiravańnia.

U siońniašnich umovach Śviatłana Cichanoŭskaja robić blizka da maksimumu svaich mahčymaściej. Inšaja reč, što abjektyŭna jaje palityčnaja vaha ŭnutry Biełarusi skaračajecca i budzie skaračacca. Ale heta abjektyŭny praces», — kaža palitołah.

Chto ŭ atačeńni Cichanoŭskaj jość najmacniejšaj fihuraj

Najmacniejšaja fihura ŭ atačeńni Śviatłany Cichanoŭskaj, pa mierkavańni palitołaha, — heta Pavieł Łatuška, jaki vystupaje z šeraham inicyjatyŭ.

«Jon sprabuje prapanoŭvać niejkija kirunki palityki. Moža, bolš radykalnyja, čym Śviatłana Cichanoŭskaja. Ale heta čałaviek, u jakoha jość idei, što rabić. Možna ź imi spračacca, kazać, što jany niaŭdałyja. Ale va ŭsiakim razie jon fantaniruje idejami i i inicyjatyvami. U hetaj situacyi, jak mnie padajecca, heta najbolš mocnaja fihura ŭ atačeńni Śviatłany Cichanoŭskaj», — kaža Valer Karbalevič.

Ci ŭzmacniaje Viktara Babaryku znachodžańnie ŭ źniavoleńni

Karbalevič adznačaje, što historyja biełaruskich palitviaźniaŭ śviedčyć pra toje, što doŭhaje znachodžańnie ŭ turmie nie ŭzmacniaje ich palityčna. Jon zhadvaje vypadki sa źniavoleńniem Mikoły Statkieviča, Paŭła Sieviarynca.

«Heta nie mocna paŭpłyvała na ich palityčny rejtynh. Nie tolki ŭvohule ŭ Biełarusi, ale navat u demakratyčnym asiarodździ. Tamu čym bolš prachodzić času ad 2020 hoda, čym bolš Babaryka siadzić u turmie, tym bolš jahonaje proźvišča budzie zabyvacca i tym bolš jahony rejtynh budzie padać. Heta abjektyŭnaja situacyja».

Palitołah abviarhaje ŭsiakija razmovy pra toje, što Viktar Babaryka jość «kreaturaj Kramla». «Niama absalutna nijakich faktaŭ, jakija b paćviardžali hetuju viersiju. A što takoje «kreatura Kramla» možna zrazumieć, kali ŭzhadać, jak Maskva padtrymlivała Viktara Janukoviča padčas prezidenckich vybaraŭ va Ukrainie. Jamu dali hrošy. Pryjechała kuča rasijskich palittechnołahaŭ, jakija stali pracavać u štabie Janukoviča. Rasijskija kanały biaskonca rekłamavali jahonuju palityku i dziejnaść. Ničoha padobnaha nie było [z Babarykam] padčas hetaj vybarčaj kampanii», — miarkuje Valer Karbalevič.

Hladzicie całkam:

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?