Fota: Imantsu / Getty Images

Fota: Imantsu / Getty Images

Zhodna z zaćvierdžanymi 14 vieraśnia papraŭkami, rasijanie, jakija nie zdali ispytaŭ pa łatyšskaj movie, atrymlivajuć jašče dva hady na navučańnie i prachodžańnie paŭtornaj pravierki. Heta tyčycca i tych, chto pravaliŭ ispyty, i tych, chto navat nie sprabavaŭ ich zdavać. Havorka idzie pra prykładna dziesiać tysiač čałaviek.

Na praciahu hetych dvuch hadoŭ jany mohuć raźličvać na ŭsie sacyjalnyja harantyi i miedycynskuju dapamohu ŭ poŭnym abjomie.

Rezanansnyja praviły, pavodle jakich hramadzian Rasii mahli vydvaryć z Łatvii, byli pryniatyja łatvijskim parłamientam u vieraśni minułaha hoda. Farmalnaja pryčyna — intehracyja hramadzian Rasii ŭ łatvijskaje hramadstva. Asabliva na hetaj intehracyi nastojvali nacyjanalnyja partyi, jakija vypali sa składu ŭrada kala miesiaca tamu.

Papraŭki tyčacca vyklučna byłych hramadzian i niehramadzian Łatvii, jakija atrymali rasijskija pašparty paśla vieraśnia 2003 hoda. Hetyja novyja hramadzianie Rasii žyvuć u Łatvii na padstavie pastajannych dazvołaŭ na žycharstva. Adnak dla atrymańnia hetych PMŽ im, u adroźnieńnie ad hramadzian, jakija pryjechali z Rasii, nie treba było zdavać ekzamien na viedańnie łatyšskaj movy.

Palityki zapadozryli, što mienavita hetyja hramadzianie Rasii — byłyja paddanyja Łatvii — mohuć u pryncypie nie vałodać dziaržaŭnaj movaj. Dla vyśviatleńnia i mahčymaj likvidacyi hetaj prablemy parłamient zaćvierdziŭ papraŭku, jakaja anuluje ich PMŽ ź vieraśnia 2023 hoda.

Pad papraŭki trapili kala 25 tysiač čałaviek, bolšaść — pažyłyja ludzi. Tyja ź ich, chto chacieŭ zastacca ŭ Łatvii, mahli padać na PMŽ pa novaj schiemie, ale dla hetaha treba było zdać ekzamien pa łatyšskaj movie.

Z 25 tysiač usie dakumienty na novy PMŽ padali 13 tysiač čałaviek, jašče šeść tysiač pravalili ekzamieny i zapisalisia na pierazdaču, prykładna čatyry tysiačy nie abjavilisia i nie padali nijakich zapytaŭ.

U pačatku vieraśnia kiraŭnica departamienta pa spravach hramadzianstva i mihracyi Majra Rozie skazała žurnalistam, što apošniaja katehoryja hramadzian Rasii atrymaje paviedamleńni ab nieabchodnaści pakinuć krainu. Śpiecyjalna ich šukać i vydvarać nichto nie źbirajecca, ale hetyja ludzi straciać dostup da apłačvanych dziaržavaj miedycynskich pasłuh, a taksama sacyjalnaj dapamohi.

Aznajomiŭšysia z vynikami ekzamienaŭ pa łatyšskaj, urad Łatvii inicyjavaŭ novyja papraŭki — ab pradaŭžeńni terminaŭ i pradastaŭleńni ludziam poŭnaha sacyjalnaha pakieta. U vyniku jany byli pryniatyja ŭ terminovym paradku.

Dziakujučy hetym papraŭkam hramadzianie RF atrymlivajuć jašče dva hady, kab usio ž padać dakumienty i atrymać dazvoł na časovaje pražyvańnie ŭ Łatvii. Za hety čas jany pavinny buduć vyvučyć dziaržaŭnuju movu i zdać ispyty. Taja ž adterminoŭka tyčycca tych, chto sprabavaŭ prajści moŭnuju pravierku, ale nie prajšoŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?