Alaksandr Zinhman pieršy sprava, pobač ź ministram zamiežnych spraŭ Biełarusi Siarhiejem Alejnikam. Fota: pres-słužba Łukašenki
Padčas niadaŭniaha vizitu kiraŭnika Ekvataryjalnaj Hviniei ŭ Biełaruś łukašenkaŭski «biznesmien udačy» i hanarovy konsuł Zimbabvie ŭ Biełarusi Alaksandr Zinhman byŭ u pieršym šerahu čynoŭnikaŭ, jakija sustrakali Teadora Abianha Nhiemu Mbasoha.
Zinhman i stajaŭ, i siadzieŭ pobač ź ministram zamiežnych spraŭ Siarhiejem Alejnikam.
Surazmoŭcy «Našaj Nivy» źviartajuć uvahu, što hety i biez taho aktyŭny ŭ Afrycy prateže Šejmana sprabuje šyrej razharnucca na kantyniencie paśla śmierci Pryhožyna. PVK «Vahnier» stračvaje ludziej i ŭpłyvy, skaračajučy prysutnaść u Afrycy.
«Zinhman sprabuje zrazumieć, jak pierachapić achoŭnyja i syravinny kantrakty «Vahniera» ŭ roznych krainach rehijona. Ja tak razumieju, achoŭnyja kantrakty prapanujecca vykonvać biełaruskamu «HardServisu». Damoŭlenaści pa dostupie i raspracoŭcy syraviny kožny raz roznyja, u zaležnaści ad času i kanjunktury», — raskazvajuć «Našaj Nivie» surazmoŭcy.
«HardServis» — heta pryvatnaja achoŭnaja arhanizacyja, zasnavanaja ŭ Biełarusi. Ich trenirovačnaja baza znachodzicca na vulicy Karvata ŭ minskaj Ściapiancy. Raniej baza naležała BFSA «Dynama», tam treniravali śpiecnazaŭcaŭ.
«HardServis» maje licenziju na akazańnie achoŭnych pasłuh, jaje supracoŭniki mohuć vałodać zbrojaj. U svoj čas PVK «Vahnier» pačynała z taho ž.
U abmien na vajenizavanuju padtrymku dyktatarskich afrykanskich režymaŭ PVK «Vahnier» atrymlivała ŭ rasparadžeńnie rudniki dla zdabyčy kaštoŭnych mietałaŭ i inšych resursaŭ.
Ułady Ekvataryjalnaj Hviniei, darečy, sami ŭprošvali «Vahnier» pryjści da ich u krainu.
Padrabiaznaści aktyŭnaści Zinhmana ŭ Afrycy paśla śmierci Pryhožyna pakul nieviadomyja.
Alaksandr Zinhman sprava i Viktar Šejman źleva. U Zinhmana ŭ Afrycy znajšli sumiesny biznes z synam Šejmana.
Alaksandr Zinhman — syn emihranta. Jahony baćka naradziŭsia i vyras u rajonie Jubilejnaj płoščy ŭ Minsku, skončyŭ Politechničny instytut (ciapier — BNTU) i pajšoŭ pracavać techničnym śpiecyjalistam na minski zavod vyličalnych mašyn imia Ardžanikidze. A potym, napačatku 80-ch, emihravaŭ u Štaty, prychapiŭšy z saboj žonku i syna, pieravučyŭsia na kampjutarščyka i niabłaha ŭładkavaŭsia. Ros Alaksandr užo ŭ ZŠA ŭ zabiaśpiečanaj siamji.
Pra hety pieryjad žyćcia Zinhmana-małodšaha mała što viadoma.
Ale ŭ vyniku baćka adpraviŭ syna nazad u Stary Śviet. Alaksandr viarnuŭsia na histaryčnuju radzimu i raspačaŭ pachod pa siabrach baćki, jakija ŭžo stali bujnymi fihurami ŭ Maskvie i Minsku.
U Afryku Zinhman zajšoŭ, skałupnuŭšy Juryja Čyža, jaki pradavaŭ biełaruskuju techniku ŭ Afryku pa schiemie kansihnacyj — braŭ z zavodaŭ na realizacyju biaspłatna, a potym da vyznačanaj daty pieravodziŭ hrošy nazad, pakidajučy sabie premiju.
Akurat tady niejkija inšyja biznesy stali davać zboj, a Čyž pačaŭ zatykać hetymi hrašyma ŭłasnyja dzirki.
Kažuć, mienavita Zinhman źviarnuŭ uvahu kiraŭnictva krainy na niasvoječasovyja płaciažy, što ŭ značnaj miery paŭpłyvała na nastupny nie vielmi viasioły los Čyža.
Jak by tam ni było, ale paśla hetaj historyi adkaznym za pastaŭki techniki ŭ Afryku staŭ užo sam Zinhman — afrykanskija ŚMI nazyvali jaho hałoŭnym bienieficyjaram kampanii Aftrade DMCC, jakaja pastaŭlaje ŭ Afryku pradukcyju MAZ, MTZ, BiełAZ, Homsielmaš, MZKT.
Vajenny złačynca, pucinski biznesmien i kiraŭnik PVK «Vahnier» Jaŭhien Pryhožyn zahinuŭ 28 žniŭnia — samalot, na jakim jon lacieŭ, upaŭ u Ćviarskoj vobłaści ŭ vyniku, jak miarkujecca, unutranaha vybuchu. Padazravanych pa spravie niama.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Pryhožyn i Utkin zahinuli, ich samalot raźbiŭsia nad Vałdajem. Što viadoma na hety momant
Biznesoŭca Zinhmana zaŭvažyli na pieramovach Łukašenki i Mbasoha FOTAFAKT
Alaksandr Zinhman vyjšaŭ z kanhalezskaj turmy i ŭžo ŭ Zimbabve
Hiektar ziamli i damy pad Minskam. Jak vyhladajuć uładańni zatrymanaha biznesoŭca Zinhmana
