Supracoŭniki tureckaj palicyi chavajucca, pakul ekśpierty pa abiasškodžvańni bombaŭ pracujuć u rajonie paśla vybuchu ŭ Ankary, niadzielu, 1 kastryčnika 2023 hoda. Fota: Ali Unal / AP
Turcyja naniesła avijaŭdary pa kurdskich paŭstancach na poŭnačy Iraka praź niekalki hadzin paśla vybuchu terarysta-śmiarotnika la Ministerstva ŭnutranych spraŭ u Ankary. Jak paviedamili tureckija ŭłady, udary naniesienyja pa 20 abjektach Rabočaj partyi Kurdystana, piša Bi-bi-si.
Ministerstva abarony Turcyi abviaściła, što ŭdary byli naniesienyja pa piačorach, bunkierach i składach zbroi Rabočaj partyi Kurdystana.
U zajavie ministerstva havorycca, što metaj udaraŭ była «niejtralizacyja RPK i inšych terarystyčnych elemientaŭ, praduchileńnie terarystyčnych vyłazak z paŭnočnaha Iraka, nakiravanych suprać nasielnictva i pravaachoŭnych orhanaŭ Turcyi, i biaśpieka miežaŭ».
Kurdskaje infarmacyjnaje ahienctva Rudaw paviedamiła, što ŭdar byŭ naniesieny pa rajonie hornaha chrybta Kandzil na poŭnačy Iraka, pablizu miažy ź Iranam. Hory Kandził, budučy ciažkadastupnym rajonam, daŭno stali adnoj z baz PKK.
U niadzielu dvoje nieviadomych zładzili vybuch kala budynka parłamienta i Ministerstva ŭnutranych spraŭ u tureckaj stalicy.
Na svaim sajcie Rabočaja partyja Kurdystana zajaviła, što vybuch byŭ ździejśnieny źviazanaj ź joju hrupaj «Bieśśmiarotny bataljon», jakaja ŭziała na siabie adkaznaść za terakty ŭ Stambule ŭ 2016 hodzie.
Jak paviedamlajecca, adzin z napadnikaŭ vyjšaŭ z mašyny i kinuŭ u budynak Ministerstva vybuchoŭku nievialikaj mahutnaści, kab adciahnuć achovu.
Druhi napadnik adkryŭ ahoń pa achoŭnikach kala bramy Ministerstva, a zatym padarvaŭ bombu, u vyniku čaho zahinuŭ.
Tym časam pieršy napadnik zabieh na terytoryju ministerstva i byŭ adrazu zastreleny palicyjaj.
Dva aficery atrymali ranieńni. Adzin byŭ paranieny ŭ hrudzi, druhi atrymaŭ ranieńni abiedźviuch noh i vačej.
«Naša baraćba budzie praciahvacca, pakul apošni teraryst nie budzie niejtralizavany», — zajaviŭ kiraŭnik MUS Turcyi Ali Jerlikaja.
Vybuch adbyŭsia ŭsiaho za niekalki hadzin da adkryćcia parłamienta paśla letniaha pierapynku.
