Juryj Šyškoŭ. Skrynšot videa minsepultury / YouTube
Pra Juryja Šyškova z Homiela ŭ Biełarusi nie viedajuć, zatoje pra jaho pišuć u The New York Times, a jaho pracy kaštujuć dziasiatki, kali nie sotni tysiač dalaraŭ.
Šlach da pośpiechu
Juryj jašče padletkam zacikaviŭsia muzykaj, ale abstaviny dla zaniatkaŭ joj nie spryjali. Instrumienty savieckaj vytvorčaści byli drennaj jakaści. A kab nabyć narmalnuju hitaru nieabchodna było addać čatyry miesiačnyja zarobki. Tamu Šyškoŭ vyrašyŭ zrabić hitaru samastojna. Jon pačaŭ z hitary svajoj mary.
«Mnie padabaŭsia Ryčy Błekmar, hitaryst Deep Purple. U mianie była jaho fatahrafija z hitaraj Fender Stratocaster. Ja pavialičyŭ vyjavu, pieranios na papieru i źniaŭ usie pamiery. Tak atrymałasia ŭznavić vyhlad. Potym ja sabraŭ elektryčnuju načynku. Heta nie było vielmi ciažka: u bolšaści dziaciej u SSSR nie było cacak, tamu my byli majstrami na ŭsie ruki i rabili ich sabie sami», — raspaviadaŭ majstar u intervju haziecie The New York Times.
Majsternia Juryja Šyškova ŭ padvale ŭ Homieli. Skrynšot videa minsepultury / YouTube
Na momant, kali Juryj zrabiŭ svaju pieršuju hitaru, jamu było 22 hady. Majsterniu jon aformiŭ u padvalčyku, dzie zvyčajna ŭzimku zachoŭvali harodninu. Ale sprava była vielmi zapatrabavanaja, bo muzyčnyja hurty ŭ časy poźniaha SSSR zjaŭlalisia adzin za druhim.
Nastupnaja hitara Šyškova była stylizavanaja pad Jackson. Śpiecyjalisty kažuć, što jakaść taho instrumienta była fantastyčnaja. Šyškoŭ navat zrabiŭ nadpisy na hryfie tak, što jany padavalisia nadrukavanymi na pryncie.
Hryf hitary, stylizavanaj pad Jackson. Skrynšot videa minsepultury / YouTube
Praca ŭ ZŠA
U 1990 hodzie Juryj skarystaŭsia mahčymaściu vyjechać u ZŠA. Na toj momant u jaho tam nie było ni siamji, ni znajomych. Movu jon taksama vielmi drenna viedaŭ. Ale z saboju Šyškoŭ uziaŭ partfolia — čorna-biełyja zdymki instrumientaŭ, jakija jon zrabiŭ. Z hetymi zdymkami i novym siabram z ruskamoŭnaj dyjaspary ŭ jakaści pierakładčyka Šyškoŭ pajšoŭ u ofis kampanii Washburn, jakaja była zasnavana ŭ Čykaha.
«Kampanija ŭziała mianie ŭ jakaści hitarnaha technika. Heta značyć, što ja nastrojvaŭ hitary. Krychu paźniej jany zrazumieli, što ja zdolny na bolšaje, čym nastrojvać hitary, i pieraviali ŭ majstry. Tam ja zastavaŭsia 10 hadoŭ, pakul nie daviedaŭsia pra vakansiju ŭ Fender», — zhadvaŭ majstar u intervju The New York Times.
Padčas pracy ŭ Washburn u Šyškova zjavilisia pieršyja zornyja klijenty, jakija acanili jaho ŭzrovień. Adnym z takich klijentaŭ byli Džymi Pejdž i Robiert Płant. A samym udziačnym klijentam byŭ Dajmbeh Dareł z hurtu «Pantera». Jon nazyvaŭ Juryja «Crazy Russian» i ličyŭ, što Šyškovu pa siłach zrabić instrumient samaha vysokaha ŭzroŭniu. Pa mierkavańni Dareła, majstar moh pieradać nie tolki dyzajn i asnoŭnyja paramietry starych hitar Dean z asabistaj kalekcyi muzykanta, ale i ich dušu.
U kampaniju Fender Juryj Šyškoŭ pajšoŭ nie na sieryjnuju vytvorčaść, a na stvareńnie ŭnikalnych instrumientaŭ u śpiecyjalny departamient, dzie zajmajucca vyrabam kastamnych hitar dla klijentaŭ, jakija chočuć niešta niezvyčajnaje — Fender Custom Shop.
Tam jość dva kirunki: instrumienty ŭzroŭniu Team Built, jakija kaštujuć adnosna tanna, i Masterbuilt, jakija vyrablajucca adnym śpiecyjalistam i zjaŭlajucca ŭnikalnymi. Takija vyraby kaštujuć vialikich hrošaj. Mienavita instrumientami ŭzroŭniu Masterbuilt zajmajecca Šyškoŭ.
Bluźmien Badzi Haj z hitaraj Telecaster. Skrynšot videa minsepultury / YouTube
Siarod klijentaŭ majstra byŭ lehiendarny bluźmien Badzi Haj. Uładalnik piać Hremi źviarnuŭsia ŭ Fender u 2005 hodzie, kab jamu zrabili Telecaster. Pryčym vielmi chutka, bo Badzi źbiraŭsia na hastroli ŭ Indyju. Spravu daručyli Šyškovu, bo jon užo pracavaŭ ź bluźmienam. U vyniku vyjšaŭ instrumient, jaki kapijavaŭ Telecaster 1972 hoda, i, pa vodhukach tych, chto trymaŭ jaho ŭ rukach, ničoha nie važyŭ. Nibyta ŭ korpusie hitary pusta. Ale na samoj spravie hitara zroblena ź vielmi lohkaha jasieniu.
Adnojčy Šyškoŭ natchniŭsia dyzajnam kamiery Kodak Bandam Special 1936 hoda i na 30-hodździe Fender Castem Shop zrabiŭ hitaru, inkrustavanuju tysiačaju bryljantaŭ. Sam Juryj nazvaŭ jaje Studio Liner.
Hitara Studio Liner. Skrynšot ź videa minsepultury / YouTube
Na 60-hodździe firmy Fender Juryj Šyškoŭ zrabiŭ hitaru Hermitage Stratocaster, jakaja kaštuje 850 tysiač dalaraŭ. Na joj 556 bryljantaŭ, 281 smarahd, 100 rubinaŭ, 70 sapfiraŭ, 75 futaŭ raźby z 18-karatnaha zołata.
Hitara Hermitage Stratocaster. Skrynšot ź videa minsepultury / YouTube
Hitara dla Prynsa
Adnym z najbolš viadomych instrumientaŭ, jakija vyrabiŭ Šyškoŭ, zjaŭlajecca elektrahitara dla śpievaka Prynsa. Uvieś instrumient pakryty listavym zołatam. Jak raspaviadaŭ sam majstar u intervju The New York Times, budučaja praca nad hitaraj jamu pryśniłasia:
«niejak mnie pryśniłasia, što rablu hitaru, całkam pakrytuju tonkim listavym zołatam. Ale ideja zdałasia zanadta kryklivaj, zanadta vyčvarnaj, i ja adkłaŭ jaje. A adnojčy ŭ 2010 hodzie čałaviek z adździeła pracy z klijentami pryjšoŭ u maju kabinku i spytaŭ, ci mahu ja zrabić Stratocaster, pakryty listavym zołatam. Ja spytaŭ, chto klijent. I atrymaŭ adkaz, što Pryns. Akazałasia, jamu taksama pryśniłasia, što jon ihraje na takim instrumiencie padčas svajho tura Welcom 2 America».
Pra samuju hitaru hazieta The Los Angeles Times pisała: «Za tydzień da taho, jak u Fender źviarnuŭsia Pryns, padčas ekskursii pa Custom Shop kiraŭniki firmy spynilisia na pracoŭnym miescy Šyškova i spytali ab pracesie ačystki zołata, ź jakim jon pracavaŭ dla zamovy inšaha klijenta.
«Ja zhadaŭ, što nikoli nie stvaraŭ hitaru, jakaja była b całkam pakrytaja susalnym zołatam. Mianie spytali: «Čamu ty nikoli hetaha nie rabiŭ?» Ja adkazaŭ: «Nichto nikoli hetaha nie prasiŭ». Praz tydzień da Šyškova pryjšoŭ dyrektar pa markietynhu Fender Del Brekienfield i skazaŭ: «Ja dumaju, u nas jość klijent dla tvajoj załatoj hitary».
Śpiavak Pryns z hitaraj Goldfinger. Skrynšot videa minsepultury / YouTube
U vyniku hitaru nazvali Goldfinger. Pryns hraŭ na joj try hady, pakul u jaho byli suśvietnyja hastroli. A paśla hitara była pradadziena na aŭkcyjonie ŭ padtrymku biednych siamiej Harlema. Jaje nabyŭ kiroŭca Formuły-1 Luis Chemiltan (Lewis Hamilton) za 100 tysiač dołaraŭ.
Jak adznačaje muzyčny ahladalnik Alaksandr Čarnucha, toje, što robić Šyškoŭ, jaki pačynaŭ z majsterni ŭ padvale ŭ Homieli, heta fantastyka. Tak pra heta kažuć tyja, chto trymaŭ u rukach jaho instrumienty. Juryj da hetaha času žyvie ŭ ZŠA i pracuje ŭ Fender.
Čytajcie jašče:
Samy papularny biełaruskamoŭny hurt u śviecie — chto hetyja chłopcy?
Piać biełaruskich artystaŭ, jakich vy možacie nie viedać, ale ich słuchajuć sotni tysiač
