Ilustracyjnaja vyjava. Fota: AP

Ilustracyjnaja vyjava. Fota: AP

Dziaržaŭnaje ahienctva nacyjanalnaj biaśpieki Bałharyi zajaviła pra zatrymańnie 12 čałaviek, jakija ŭ składzie mižnarodnaj złačynnaj hrupoŭki tajemna zabiaśpiečvali rasijskuju armiju va Ukrainie tavarami padvojnaha pryznačeńnia.

Padrabiaznaści ab spravie ciońnia raspaviało vydańnie Balkan Insight.

Paviedamlajecca, što siarod aryštavanych jość uradžency Bałharyi, Ałbanii, Rasii, Hrecyi i Biełarusi. Pavodle bałharskich śpiecsłužbaŭ, jany pastaŭlali pradukcyju nie tolki rehularnaj rasijskaj armii, ale taksama i PVK «Vahnier», i čačenskim padraździaleńniam Ramzana Kadyrava.

«Piaci z dvanaccaci zatrymanych užo aficyjna vystaŭlena abvinavačańnie. Heta hramadzianin Rasii Ramanas Vietrydys, jašče dvoje rasijan Vasil i Jaŭhien Uljanavy, ałbaniec Jani Jašyli i ŭradženiec Biełarusi Dźmitryj Dymitryus.

Jany abvinavačvajucca ŭ tym, što pastaŭlali rasijskim siłam va Ukrainie roznyja vidy tavaraŭ padvojnaha pryznačeńnia, u tym liku aptyčnyja vintovačnyja pryceły i avijacyjnaje radyjoabstalavańnie», — pieradaje Balkan Insight.

Pa infarmacyi śledstva, cieniavyja pastaŭki tavaraŭ dla Rasii išli praz stvoranuju ŭ 2019 hodzie miascovuju firmu Aflon, jakaja znachodzicca ŭ bałharskim horadzie Płoŭdziŭ i aficyjna śpiecyjalizujecca na handli vuhalem, pšanicaj dy inšymi tavarami.

Kiravali firmaj hramadzianin Rasii Vietrydys i hrecki biznesmien Takis Trykidys, jaki dahetul znachodzicca na voli.

«Trykidys jašče ŭ 2013 hodzie byŭ aryštavany za toje, što ŭ składzie tak zvanaj «bandy Kałašnikava» ŭčyniŭ na poŭnačy Hrecyi šmatlikija rabavańni bankaŭ, bankamataŭ, napady na palicyjantaŭ. Ën taksama ŭdzielničaŭ u niezakonnym abarocie zbroi i narkotykaŭ. Jon tady byŭ pryhavorany da dzieviaci hadoŭ pazbaŭleńnia voli», — raskazvaje vydańnie.

Žurnalisty dadajuć, što tavary dla zabieśpiačeńnia rasijskaj armii išli z Płoŭdziva ŭ Safiju, a adtul praz Turcyju traplali ŭ Rasiju. Sama hrupoŭka dziejničała taksama i ŭ Vialikabrytanii, Šviejcaryi, Sierbii, Sinhapury i AAE.

Taksama hetaja sprava daje dadatkovy dokaz suviaziaŭ miž jeŭrapiejskim złačynnym śvietam i rasijskimi śpiecsłužbami.

Čytajcie taksama:

Cichanoŭskaja dała intervju, ad jakoha ŭ rasijskaj apazicyi pałychnuła. Što zdaryłasia?

U Minsku źnik prarasijski prapahandyst i palitołah z Ukrainy. Mierkavana, jon zatrymany

Niekatorych biełarusaŭ aryštoŭvajuć prosta pry padačy na polskija vizy — Wyborcza

Клас
16
Панылы сорам
0
Ха-ха
0
Ого
2
Сумна
0
Абуральна
5