Mižnarodnyja ciahniki ź Biełarusi chodziać tolki ŭ adnu krainu: u Rasiju (plus tranzitam praź Litvu — u Kalininhradskuju vobłaść), i sioleta situacyja nie źmienicca. Tak što sustrakać Novy hod budziem albo ŭ ciahniku, jaki idzie va ŭnutryrespublikanskich maršrutach, abo ŭ ciahniku, jaki jedzie ŭ Rasiju.

Maskva

Ciahnik №028 Brest — Maskva adpraŭlajecca ŭ 23:55 — heta značyć, Novy hod nastupić, kali vahony jašče buduć jechać dzieści ŭ rajonie vulicy Lenina i Partyzanskaha praśpiekta. Tut nie paśpieješ ni harbaty ŭziać, ni kurycu raspakavać.

A voś ciahnik №002 Minsk — Maskva adpraŭlajecca ŭ 22:20 — da momantu nastupleńnia Novaha hoda ŭžo možna i jalinku ŭpryhožyć, i zakusku pa stoliku raskłaści, i z kampanijami ź inšych kupe pieraznajomicca.

Kvitok na navahodniuju pajezdku ŭ płackarcie kaštuje ad 158 rubloŭ, u kupe — ad 233 rubloŭ, u SV — 459 rubloŭ. Miescaŭ jašče chapaje.

Najbližejšy paśla startu prypynak — u Oršy: u 00:35. A sam prychod Novaha hoda, zychodziačy z hetaha, nastupić dzieści ŭ rajonie Tałačyna, jašče na biełaruskim baku, viadoma. U Maskvu sastaŭ pryjedzie ŭ 08:15, pravioŭšy ŭ šlachu bieź piaci chvilin dziesiać hadzin. Možna navat paśpieć paspać paru hadzinaŭ.

Sankt-Pieciarburh

Ź Minska ŭ Sankt-Pieciarburh 31 śniežnia iduć dva ciahniki. Pryčym ź Minska jany adpraŭlajucca tolki z roźnicaj u hadzinu.

Tak, ciahnik №680 Hrodna — Viciebsk z pryčapnymi vahonami da Sankt-Pieciarburha vyjazdžaje ź Minska ŭ 17:36. Kvitok u płackarcie kaštuje 152 rubli, u kupe — 194 rubli. Novy hod hety ciahnik zastanie ŭ Viciebsku padčas pierapryčepki, jakaja praciahniecca bolš za paŭtary hadziny. Adpravicca sastaŭ ź Viciebska ŭ 0:17 i prybudzie ŭ Sankt-Pieciarburh u 09:54, pravioŭšy ŭ darozie ad Minska 16 hadzin i 18 chvilin.

Ciahnik №052 Brest — Sankt-Pieciarburh vyjazdžaje ź Minska ŭ 18:42. Ceny takija ž, jak u ciahniku, razhledžanym vyšej, tolki jašče dadajecca vahon SV za 388 rubloŭ.

U 23:32 ciahnik pakidaje apošniuju biełaruskuju stancyju Haradok, a ŭ 00:32 užo pryjazdžaje ŭ Nieviel. Takim čynam, Novy hod nastupić dzieści niezadoŭha da biełaruskaj pamiežnaj stancyi Jeziaryšča, dzie ciahnik nie spyniajecca.

Adler

U paŭdniovy kurort Krasnadarskaha kraju ciahnik 31 śniežnia nie idzie. Ale nie treba chvalavacca: z kanca ŭ kaniec sastaŭ znachodzicca ŭ šlachu amal dvoje sutak, tak što možna vyjechać na dzień raniej — i ŭsio roŭna zaśpieć źmienu miesiacaŭ i hadoŭ prama ŭ vahonie.

Ciahnik №302 Minsk — Adler vyjazdžaje ź Minska 30 śniežnia ŭ 11:21 i kaniec hetych sutak zastaje pamiž Branskam i Varoniežam. A potym jašče sutki ŭ šlachu — i roŭna apoŭnačy 31-ha śniežnia ciahnik užo jedzie pa Rastovie, dzie i spynicca ŭ 00:04 na 20 chvilin. Nu a potym jašče roŭna pałovu dnia — i voś vy ŭžo la mora ŭ Adlery. Kvitok da kančatkovaj stancyi ŭ płackarcie ad 356 rubloŭ, u kupe — 501 rubiel.

Pa Biełarusi

Brest

Ź dziesiaci ciahnikoŭ, što adpraŭlajucca 31 śniežnia ź Minska ŭ Brest, tolki adzin adpraŭlajecca ŭ noč: №657 Połack — Brest. Ź Minska jon vyjazdžaje ŭ 22:55 i idzie da abłcentra amal 9 hadzin, bo praz Łuniniec. Płackartny bilet kaštuje 22 rubli, kupejny — 31 rubiel. Roŭna apoŭnačy ciahnik budzie na ŭskrainie Staŭbcoŭ, kab praz 4 chviliny zrabić tut karocieńki prypynak. U Brest ciahnik prybudzie ŭ 07:41.

Viciebsk

U Viciebsk u apošni dzień śniežnia ź Minska vyjeduć 6 ciahnikoŭ. Ź ich taksama tolki adzin dazvalaje złavić Novy hod pad hrukat kołaŭ. Ciahnik №625 Minsk — Viciebsk vyjazdžaje sa stalicy ŭ 21:42 i prybyvaje ŭ paŭnočny horad u 06:41. Novy hod nastupaje paśla Vilejki, niedaloka ad stancyi Kniahinin. Kvitok u płackartny vahon kaštuje 19 rubloŭ, u kupejny — 26 rubloŭ.

Hrodna

U Hrodnie taksama startujuć šeść ciahnikoŭ, i adrazu dva robiać heta pozna ŭviečary z roźnicaj u 25 chvilin. I kali ciahnik №634 Kamunary — Hrodna da 00:00 jašče nie paśpieje vyjechać za MKAD (adpraŭlajecca ź Minska ŭ 23:52), to na ciahniku №631 Homiel — Hrodna možna adjechać dalej. Źmiena hoda dahonić vas u vahonie dzieści ŭ rajonie Fanipala. Płackartny bilet kaštuje 19 rubloŭ, kupejny — 26 rubloŭ.

Mahiloŭ

Čatyry ciahniki zapłanavanyja na 31 śniežnia ŭ Mahiloŭ, ź ich adzin — užo znajomy nam, ale toj, što idzie ŭ advarotny bok, №634b Hrodna — Kamunary — adviazie vas u źmienu hadoŭ. Adpraŭleńnie ź Minska ŭ 23:05. Novy hod zastanie vas niezadoŭha da Smalavičaŭ.

Kvitok u ahulny vahon kaštuje 10 rubloŭ, u płackartny — 16 rubloŭ, u kupe — 22 rubli.

Клас
2
Панылы сорам
1
Ха-ха
4
Ого
0
Сумна
0
Абуральна
2