Pavieł Libier u siabie na staroncy ŭ fejsbuku padzialiŭsia vynikami pieršaha hoda pracy płatformy, jakaja stvarałasia jak «ličbavaja viersija demakratyčnaj Biełarusi».

U pieršuju čarhu jon źviarnuŭ uvahu niadrenny pryrost aŭdytoryi, choć jon i zastajecca nižejšym za toj, jakija stajaŭ na mecie.

Mabilnuju prahramu spampavali 33 tysiačy karystalnikaŭ, a ŭsia ekasistema pavialičyłasia z 21 tysiačy da 58 tysiač karystalnikaŭ.

«Što važna, 52% ź ich unutry krainy. My nie ličym całkam ananimnych karystalnikaŭ — ich jašče niekalki dziasiatkaŭ tysiač», — adznačyŭ Libier.

A voś pazicyjanavańnie płatformy jak budučaj ličbavaj dziaržavy jon nazvaŭ pamyłkaj, bo karystalniki nie razumieli, a funkcyjanał płatformy nie adpaviadaŭ zajaŭlenamu źmiestu. 

Taksama jon zaŭvažyŭ, što jany mocna niedaacanili, što ekasistema našaha pamieru kaštuje doraha, asabliva kali havorka idzie pra technałahičnuju častku.

«Uletku my patrapili ŭ surjoznuju finansavuju jamu i ź siaredziny hoda my pačali šukać partnioraŭ i donaraŭ dla finansavańnia hramadzianska-palityčnaha słoja».

Na siońnia prajekt usio jašče prykładna na 65% robicca za ŭłasnyja hrošy, a danaty składajuć usiaho 3%. Stvaralniki płatformy šukajuć toje, što dazvolić pavialičyć kolkaść danataŭ.

«My nie acanili stomlenaść i skiepsis ludziej u paradku dnia, źviazanym z palitykaj i hramadzianskaj supolnaściu. Siońnia isnuje vialiki razryŭ pamiž tym, što adbyvajecca ŭ palityčnym poli, i tym, jak heta ŭpłyvaje niepasredna na čałavieka. I jaho skaračeńnie — naša važnaja zadača», — zajaviŭ Libier.

Pavodle jahonych słovaŭ, prajekt, choć jon pracuje samastojna i niezaležna, usio roŭna pieryjadyčna pamyłkova adnosiać to da Ofisa Cichanoŭskaj, to da Abjadnanaha pierachodnaha kabinieta.

Uźnikli składanaści i z zapuskam biełaruskaha anałaha Revolut.

«My nie zmahli za hety hod zapuścić płaciežnuju sistemu, tamu što abodva zapłanavanyja varyjanty partniorstvaŭ zaviśli na hod sa statusam compliance check u dvuch jeŭrapiejskich partnioraŭ/bankaŭ i visiać tam dahetul», — patłumačyŭ Libier.

Ale dziakujučy ŭ tym liku hetamu, stvaralniki vyrazna ŭśviadomili, što «Novaja Biełaruś» heta «ličbavaja ekasistema dla biełarusaŭ i biełarusak u krainie i za miažoj, jakaja daje prastoru dla vyrašeńnia imi svaich prablem i intaresaŭ.

Tamu što nichto nie budzie vyrašać našyja prablemy za nas».

Paśpiachovym ličać i pieršy piłot padatkovaha prajekta, bo 250 čałaviek i niekalki biznesaŭ sabrali kala 42 tysiač jeŭra, na jakija buduć realizavany 2 prajekty.

«[Źviestki] pra finalnyja sumy pa Polščy pryjšli tolki ciapier i suma akazałasia bolšaj za našyja płany».

Tak vyhladaje płatforma «Novaja Biełaruś»

Tak vyhladaje płatforma «Novaja Biełaruś»

Padatkovy piłot vielmi važny, bo jon naŭprost kareluje ź misijaj płatformy i pakazvaje, što biełarusy mohuć sami vyrašać svaje prablemy «biez čakańnia pryncaŭ i adnarohaŭ, jakija na 150 džypach pryjeduć i ŭsich vyratujuć». Libier abiacaje aktyŭna raźvivać hety kirunak i nadalej.

«Novaja Biełaruś» taksama naroščvaje kulturny słoj praz partniorstva ź mierapryjemstvami i letnimi fiestyvalami, jakich sioleta było ažno 7. Siońnia stvaralniki płatformy zakančvajuć sistemu kiravańnia rehistracyjaj i prodažu biletaŭ praź jaje. Dziakujučy techničnaj dapamozie źjaviłasia byMapka, mapa biełaruskich kulturnych słavutaściaŭ pa ŭsim śviecie.

«My narešcie narmalna darabili supołki — mahčymaść dla luboj arhanizacyi mieć svoj filijał na płatformie. Supolnaści mohuć być dyjasparalnyja, kulturnyja, biźnies, palityčnyja i h.d. — u nas vialikija płany na raźvićcio hetaha funkcyjanału na nastupny hod».

Libier raspavioŭ, što jany zrabili sistemu Digital ID na asnovie biełaruskaha pašparta z zachoŭvańniem danych u błokčejnie, kali płatforma nie zachoŭvaje nijakich źviestak. Ale na padstavie pieršych testaŭ jaje daviałosia pieraroblivać.

Taksama praciahvajucca pracy nad miedyja-ahrehataram, jaki budzie źbirać naviny biełaruskich miedyja, łakalnyja naviny, suśvietnyja, evienty, videa i inš., pakazvajučy heta ŭsio ŭ adnu piersanalizavanuju stužku na vybranaj movie. Novaja mahčymaść, jakaja budzie aktyŭna vykarystoŭvać štučny intelekt, musić źjavicca prykładna ŭ studzieni.

A voś siekcyju hajdaŭ pa pierajezdach płanujuć adklučyć, tamu što za joj ciažka sačyć. Tudy dadaduć GPT-pamočnika pad nazvaj «AI Baradzied», natreniravanaha na dopisach pra pierajezdy i vyrašeńnie prablem źviazanych z hetym dla bolš aktualnaj infarmacyi i padkazak.

Da sakavika 2024 hoda na «Novaj Biełarusi» źjaviacca palityčnyja supołki — virtualny ofis dla hramadskich i palityčnych arhanizacyj. Jon budzie mieć funkcyi zvarotnaj suviazi, pietycyj, prajektny dašbord i inšaje.

Usiaho za 2023 hod vyjšła 43 abnaŭleńni dadatku i bolš za 1340 vypraŭleńniaŭ va ŭsioj ekasistemie. Padtrymać danatam-padpiskaj płatformu možna naŭprost unutry prahramy. 

«Kožny danat važny — my heta vielmi mocna adčuvajem i lubim kožnaha našaha patrona i fundatara».

Čytajcie taksama:

Afiša, servisy, biełaruski jutub — dziesiać karysnych servisaŭ prahramy «Novaja Biełaruś»

Čamu nie zajšoŭ ananimny tyndar dla biełarusaŭ?

«Nie bačyŭ biełarusaŭ u takim ampłua ni razu». Pavieł Libier razvažaje pra hrošy, zamožnaść i panty

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?