Alena Łanskaja

Skrynšot storys Aleny Łanskoj

Adna ź lubimych artystak Łukašenki chvalicca ŭ storys tym, što kožny viečar pravodzić u trenažornaj zali. Nadzieŭšy firmovy kaścium Nike, śpiavačka idzie na treniroŭku ŭ niatanny OLYMPIA GYM&SPA na vulicy Ratamskaj u Minsku.

Akramia samoj zały z premijalnymi italjanskimi trenažorami, tam jość 25-mietrovy basiejn i spa. Razavaje naviedvańnie (kali brać i trenažorku, i basiejn sa spa) kaštuje 80 rubloŭ.

Ksienija Lebiedzieva

Fota ź instahramu Ksienii Lebiedzievaj

Fota ź instahramu Ksienii Lebiedzievaj

Lebiedzieva zajmajecca MMA. U kamientaryjach Ksienija śćviardžaje, što heta patrebna joj dla taho, kab mieć mahčymaść abaranicca, kali spatrebicca.

Treniera prapahandystka abrała takoha, jaki całkam padzialaje jaje pohlady. Nie biez honaru žančyna piša, što jon niadaŭna viarnuŭsia z Danbasu: «Naš pacan». Zajmajecca z Ksienijaj Anton Rybčonak, jaki zvyčajna pravodzić treniroŭki ŭ spartyŭnym kłubie Empire MMA.

U instahramie Anton pra siabie piša: «najbolš niebiaśpiečny taŭstun na płaniecie Ziamla». Pieryjadyčna chvalicca tym, što jeździć na akupavanyja Rasijaj terytoryi Ukrainy. Śćviardžaje, što razvozić humanitarny hruz Alaksieja Tałaja. Siarod cheštehaŭ, jakija vykarystoŭvaje trenier — #zaOrdu, #orkidobra, #iditienach*jsosvojejDiemokratijej.

Darečy, niekatoryja z padpisčykaŭ Ksienii aburylisia tym vidam aktyŭnaści, jaki jana abrała. I pišuć joj u kamientaryjach, što trenier byccam by robić z prapahandystki mužyka: «Dziaŭčynie nie vielmi pasuje być mocnaj, złoj i iści da kanca. U siamiejnym žyćci heta moža nie lepšym čynam adhuknucca». Dvojčy raźviedzienaja Lebiedzieva, jakaja skrała serca litoŭskaha jurysta Mantasa Danielusa (jaho ŭ Litvie abvinavačvajuć u špijanažy na karyść Biełarusi), nie pahadžajecca: «Nu dyk u žančyn śpiektr intaresaŭ nie abmiažoŭvajecca siamiejnym žyćciom, mnie zdajecca, jon šyrejšy. Dakładniej, ja pra heta viedaju».

Taksama Lebiedzieva rankami chodzić zajmacca ŭ fitnes-kłub «Adrenalin».

Siostry Hruździevy

Fota ź instahramu siaścior Hruździevych

Fota ź instahramu siaścior Hruździevych

Valancina i Alaksandra Hruździevy tolki niadaŭna zadumalisia pra toje, kab pačać zajmacca ŭ trenažornaj zale.

Žančyny daviedalisia, što ŭ Haradskim centry alimpijskaha reziervu pa tenisie, kudy jany voziać na zaniatki dziaciej, jość i trenažorka. Zaŭsiodnicy praŭładnych mierapryjemstvaŭ adrazu pryjšli ŭ zachapleńnie: «Vielizarnyja stoli, supiersučasnyja trenažory! Ščyryja i vielmi dobryja ludzi ŭ samoj zale!» Ale bolš za ŭsio ich uraziŭ košt zaniatkaŭ — 8 rubloŭ. Było b, kaniešnie, dziŭna, kali b u takim vypadku jany nie znajšli, kamu skazać dziakuj: «Dziakuj vialiki našamu prezidentu, što robić takija demakratyčnyja ceny i kłapocicca pra zdaroŭje nacyi!»

Na toje, jak Hruździevy ździekavalisia z trenažoraŭ, ludziam sa słabymi niervami lepiej nie hladzieć.

Maryja Bahatyr

Fota ź instahramu Maryi Bahatyr

Fota ź instahramu Maryi Bahatyr

Paznavalnaść raptoŭna zvaliłasia na spartyŭnuju kamientatarku Biełteleradyjokampanii ŭ 2021 hodzie. Tady Maryja Bahatyr pajechała aśviatlać Alimpijadu ŭ Tokia, dzie bolš za ŭsio jaje ŭraziŭ tualet z padahrevam. Nad słovami «Mnie zdajecca, hety tualet razumniejšy za mianie. Ja vam surjozna kažu» bajnet jašče doŭha žartavaŭ.

Ciapier na sajcie BT paznačana, što Maryja Bahatyr viadzie pieradaču «Chakiej dla ŭsich». Jana ŭdzielničaje ŭ roznych praŭładnych mierapryjemstvach — naprykład, u čempijanacie pa kołcy droŭ siarod žurnalistaŭ. Taksama Maryja niejak viała cyrymoniju zakryćcia siezona dla amatarskaj chakiejnaj kamandy Dźmitryja Łukašenki.

Fitnesam Maryja Bahatyr zajmajecca ŭ trenažornaj zale pad kiraŭnictvam piersanalnaj trenierki Alesi Zabałociec.

Kaciaryna Zabiańko

Fota ź instahramu Kaciaryny Zabiańko

Fota ź instahramu Kaciaryny Zabiańko

Kaciaryna Zabiańko šmat hadoŭ pracuje na STB — amal z pačatku źjaŭleńnia telekanała.

Pra toje, jak režym cenić układ Kaciaryny ŭ prapahandu, lepš za ŭsio śviedčyć toj fakt, što ŭ 2021 hodzie Łukašenka abjaviŭ joj padziaku «za značny ŭkład u realizacyju dziaržaŭnaj infarmacyjnaj palityki, vysoki prafiesijanalizm, abjektyŭnaje i ŭsiebakovaje aśviatleńnie padziej hramadska-palityčnaha i sacyjalna-kulturnaha žyćcia krainy». Treba adznačyć, što siarod inšych ludziej, jakija tady atrymali hetuju ŭznaharodu, byli takija prapahandysty, jak Andrej Mukavozčyk, Ihar Tur, Jaŭhien Pustavoj i Ksienija Lebiedzieva.

U volny čas Kaciarynie padabajecca płavać u basiejnie FOC imia Mašerava.

Čytajcie taksama:

«Čornaja archideja» prapahandy. Historyja Ksienii Lebiedzievaj

Łukašenka ŭznaharodziŭ dziaržaŭnych prapahandystaŭ. Azaronak atrymaŭ miedal «Za advahu»

Prapahandysty nakałoli droŭ. Jakija siakiery i bienzapiły jany vykarystoŭvali?

Клас
5
Панылы сорам
27
Ха-ха
8
Ого
4
Сумна
4
Абуральна
26