Pavodle źviestak Biełstata, u 2020 i 2021 hadach bolš za ŭsio bananaŭ u Biełaruś pryvieźli mienavita z Ekvadora. Havorka idzie pra amal 34,2 tys. ton (na 25,8 młn dalaraŭ) u 2021-m i kala 38,3 tys. ton (na 27,3 młn dalaraŭ) u 2020-m. Heta pałova ad ahulnaha abjomu impartu hetych pładoŭ: u 2021-m usiaho z roznych krain zavieźli kala 75 tys. ton bananaŭ.

Nastupny bujny pastaŭščyk paśla Ekvadora — Rasija, adtul u 2021 hodzie pryvieźli 28,9 tys. ton. Z Panamy — 8,9 tys. ton, z Kosta-Ryki — 3,6 tys. ton, z Kałumbii — 2,6 tys. ton.

Bolš śviežaj statystyki ŭ adkrytym dostupie niama, adnak, pavodle acenak praktykaŭ rynku, Ekvador pa-raniejšamu dla nas — asnoŭny pastaŭščyk bananaŭ. Pryčyna: dobryja suadnosiny jakaści i cany. Ekvadorski banan ličać adnym z najlepšych: jon bujny, pryhožy i dobra zachoŭvajecca.

U Ekvadory ciapier niespakojna z-za buntu mafii. MZS zaklikaje biełarusaŭ ustrymacca ad pajezdak tudy. Tym časam, jak paviedamlaje RBK, rasijskich imparcioraŭ užo papiaredzili pra mahčymyja prablemy z pastaŭkami bananaŭ z hetaj krainy.

Na fonie paniki niekatoryja miascovyja vytvorcy prypynili zbor pładoŭ, party časova zakrylisia. Navat u vypadku stabilizacyi situacyi pastaŭki mohuć być nie takimi rytmičnymi, jak raniej.

Šlach bananaŭ z Ekvadora ŭ Biełaruś zajmaje kala miesiaca. Z Ekvadora jany jeduć praz party ŭ Rasii ci Bielhii, Niderłandach i Hiermanii.

Načalnik adździeła zakupki kampanii-imparciora «Frutreał» Andrej Dumpa vykazaŭ mierkavańnie, što padziei ŭ paŭdniovaamierykanskaj krainie mohuć paŭpłyvać na impart bananaŭ i ŭ Biełaruś.

«Mohuć uźniknuć pieraškody ŭ adhruzcy ŭ samim Ekvadory. Kali skarocicca abjom ekspartu, to padvysicca cana. Adnak bolš čym na 20% cana nie pavinna vyraści. Na rynku jość kankurencyja jak z boku vytvorcaŭ ź inšych krain, tak i siarod tavaraŭ-anałahaŭ. Pry mocnym roście cenaŭ ekvadorski banan pierastanie pradavacca ŭ vialikich abjomach».

A što budzie z kavaj?

Ekvador asacyjujecca i z vytvorčaściu kavy. Adnak dola praduktu z hetaj krainy na našym rynku niaznačnaja. U statystycy Biełstata za 2020 i 2021 hady pastaŭki kavy z Ekvadora nie fihurujuć.

Siarod asnoŭnych pastaŭščykoŭ kavy i kavavaha ziernia ŭ Biełaruś, pavodle danych Biełstata, u 2021 hodzie byli Hiermanija (amal 2 tys. ton), Italija (kala 1,4 tys. ton), Brazilija (949 ton), Vjetnam (393 tony) i Turcyja (389 ton).

«Nievialikaja kolkaść kampanij moža sabie dazvolić pryvieźci kantejnier kavy niepasredna z Ekvadora. Jak praviła, heta redki sort dla našaj krainy, i tyja, chto jaho pražać, kuplajuć u bujnych imparcioraŭ zialonaha ziernia ŭ ES abo Rasii. Siaredniaja cana na ekvadorskuju kavu vyšejšaja, čym na supastaŭnyja sarty ź inšych krain (naprykład, z Brazilii), tamu popyt na jaje, u adroźnieńnie ad tych ža bananaŭ, nievysoki», — reziumuje Viačasłaŭ Žadan, suzasnavalnik hrupy kampanij Roast.by, adnoj z najbujniejšych, jakaja zajmajecca ŭ Biełarusi pražańniem kavy.

Čytajcie taksama:

U MZS Biełarusi dali tolki adnu rekamiendacyju, što rabić padčas biesparadkaŭ u Ekvadory

Ekvadorskaja mafija padniała miaciež, prezident abviaściŭ «unutrany ŭzbrojeny kanflikt», u stalicy ściahnutyja tanki

U Ekvadory złačynnyja hrupoŭki zachapili viadoŭcaŭ telenavin u žyvym efiry

Z turmy ŭ Ekvadory prapaŭ viadomy mafijozi. I ŭ krainie abviaścili nadzvyčajnaje stanovišča

Клас
2
Панылы сорам
0
Ха-ха
0
Ого
1
Сумна
1
Абуральна
1