Interpał

Interpał

Palicyja Niamieččyny aryštavała ŭdzielnicu tak zvanaj «frakcyi Čyrvonaj Armii» Daniełu Klete, jakaja bolš za 30 hadoŭ chavałasia ad pravasudździa, piša Bi-bi-si.

65-hadovuju Klete zatrymali ŭ bierlinskim rajonie Krojcbierh, jaki tradycyjna byŭ aporaj levych.

Jaje abvinavačvajuć u tym, što jana była ŭ niamieckaj levaradykalnaj uzbrojenaj arhanizacyi, jakaja dziesiacihodździami teraryzavała FRH i Zachodni Bierlin, u zamachu na zabojstva i cełym šerahu rabavańniaŭ.

Klete na viertalocie dastavili ŭ Bremien, dzie jana, jak ličycca, brała ŭdzieł u rabavańniach, i ciapier u čakańni suda jana znachodzicca ŭ źniavoleńni ŭ Fierdenie.

Palicyja, jašče ŭ listapadzie 2023 hoda atrymała navodku na miescaznachodžańnie Danieły, ustanaviła jaje asobu pa adbitkach palcaŭ, a sama jana pry aryšcie supracivu nie akazała.

Pry hetym ułady dahetul nie mohuć zrazumieć, jak joj 30 hadoŭ udavałasia chavacca, ci znachodziłasia jana ŭvieś hety čas u Niamieččynie, i chto dapamahaŭ joj.

U kvatery, dzie žyła Klete, praviali pieratrus i vyjavili abojmy i patrony da pistaleta, ale nie samu zbroju.

Palicyja nazvała aryšt Klete važnym krokam u spravie baraćby z «teraryzmam», jaki nahladna demanstruje, što «terarysty» nikoli nie buduć adčuvać siabie ŭ biaśpiecy niezaležna ad taho, kali jany ździejśnili svaje złačynstvy.

Z zahałoŭkaŭ niamieckich tabłoidaŭ pra «piensijanieraŭ RAF» moža skłaścisia ŭražańnie, što heta niejkaja televizijnaja kamiedyja pra starych-razbojnikaŭ.

Adnak na samaj spravie RAF, jakuju jašče nazyvali hrupaj Baadiera-Majnchof, sistematyčna praktykavała hvałt.

Z 1971 pa 1993 hod bajeviki zabili 34 čałavieki. Siarod ich achviar byli palityki i viadomyja pradprymalniki, u tym liku hienieralny prakuror i staršynia praŭleńnia Deutsche Bank. Jašče bolš za 200 čałaviek atrymali ranieńni.

Ułady Hiermanii śćviardžajuć, što Danieła naležała ŭžo da treciaha pakaleńnia RAF, jakoje dziejničała ŭ 1980-ja — pačatku 90-ch.

Na rachunku mienavita hetaha pakaleńnia było zabojstva kiraŭnika Deutsche Bank, jakoha padarvali zakładzienaj pry darozie bombaj, i levacentrysckaha palityka, jaki adkazvaŭ za pryvatyzacyju pradpryjemstvaŭ Uschodniaj Hiermanii, jakoha zastrelili prosta ŭ jaho doma.

U 1991 hodzie hrupoŭka ździejśniła ŭzbrojeny napad na ambasadu ZŠA ŭ Bonie. Nichto pry hetym nie paciarpieŭ, ale na miescy złačynstva byli vyjaŭlenyja ŭzory DNK Klete.

Praz dva hady bajeviki RAF uzarvali i častkova razburyli novuju turmu, jakaja była tolki što pabudavana.

RAF vyrasła ŭ 1960-ja hady z radykalnaha studenckaha ruchu i staviła svajoj metaj padryŭ zachodniehiermanskaha kapitalizmu. U ruchu byli suviazi ź blizkaŭschodnimi vajenizavanymi hrupoŭkami i z uładami HDR.

U niekatorych levaradykalnych kołach da RAF pa-raniejšamu staviacca ź vialikim pijetetam. Simvały hrupoŭki časam źjaŭlajucca na vopratcy jaje apałahietaŭ, što niaźmienna vyklikaje ŭ Hiermanii adčajnyja sprečki ab tym, ci varta heta ŭsprymać surjozna i ci nie ličyć heta papularyzacyjaj vielmi levaha ekstremizmu i hvałtu.

RAF samaraspuściłasia ŭ 1998 hodzie, a niekatoryja z bajevikoŭ, u tym liku Danieła Klete, lahli na dno. Pry hetym ličycca, što jana razam z dvuma saŭdzielnikami zdabyvała hrošy na žyćcio (a havorka idzie pra miljony jeŭra), ździajśniajučy ŭzbrojenyja rabavańni supiermarkietaŭ i inkasatarskich mašyn.

Spačatku palicyja raźviešvała vialikija fatahrafii 80-ch hadoŭ traich zarosłych vałasami studentaŭ z podpisam «hetyja ludzi mohuć być vašymi susiedziami». Adnak paźniej źjavilisia fotarobaty, na jakich trojca vyhladała ŭžo prykmietna pastarełaj, kab adpaviadać svajmu realnamu ŭzrostu.

U 2016 hodzie palicyja Hiermanii apublikavała fotarobaty (jakimi jany vyhladali b da taho času) abvieščanych u vyšuk bajevikoŭ RAF Burkcharda Harvieha, Ernsta-Fołkiera Štaŭba i Danieły Klete

U 2016 hodzie palicyja Hiermanii apublikavała fotarobaty (jakimi jany vyhladali b da taho času) abvieščanych u vyšuk bajevikoŭ RAF Burkcharda Harvieha, Ernsta-Fołkiera Štaŭba i Danieły Klete

Daniele paŭžyćcia ŭdavałasia zastavacca ŭ cieni i nie traplacca na vočy palicyi. Ale ŭsiamu prychodzić kaniec, papałasia i jana.

Čytajcie taksama:

Niezvyčajnaja novaja zorka francuzskaj palityki: krajnie levy žurnalist rviecca ŭ prezidenty-2027

«Takoje było, kali Hitler vyrašyŭ zabić habrejaŭ». Prezident Brazilii paraŭnaŭ vajnu ŭ siektary Haza z Chałakostam

U Bahdadzie ŭdaram z drona zabili lidara hrupoŭki «Kataib Chiezbała»

Клас
38
Панылы сорам
0
Ха-ха
2
Ого
18
Сумна
3
Абуральна
6