Pra heta BiełaPAN paviedamili na haračaj linii pa pytańniach Mytnaha sajuza, śpiecyjalna stvoranaj u Fiederalnaj mytnaj słužbie (FMS) Rasii.

Jak rastłumačyŭ pradstaŭnik FMS, pakolki Biełaruś nie padpisała Mytny kodeks MS,

u dačynieńni da biełaruskich hramadzian i tavaraŭ dziejničaje «ahulnaŭstanoŭleny paradak, jaki isnavaŭ da pryniaćcia Mytnaha kodeksa».

Pry hetym u FMS adznačyli: čakajecca, što Biełaruś ratyfikuje Mytny kodeks 5 lipienia (u hety dzień u Astanie projdzie pasiadžeńnie vyšejšaha orhana MS na ŭzroŭni kiraŭnikoŭ dziaržaŭ), i z hetaha dnia na biełaruskich hramadzian i tavary ź Biełarusi buduć raspaŭsiudžvacca jaho normy. Na Minskaj rehijanalnaj mytni na pytańnie BiełaPAN, ci raspaŭsiudžvajucca praviły Mytnaha kodeksa MS na fizičnych asob, adkazali, što «ničoha nie źmianiłasia».

Fiederalnaja mytnaja słužba Rasii aficyjna rastłumačyła, što z 1 lipienia na terytoryi Rasijskaj Fiederacyi ŭvodzicca ŭ dziejańnie Mytny kodeks Mytnaha sajuza Rasii, Biełarusi i Kazachstana, normy jakoha majuć pramoje dziejańnie. Z hetaha dnia źmianiajucca praviły pieramiaščeńnia tavaraŭ dla asabistaha karystańnia fizičnymi asobami. Mytny kodeks RF da jaho admieny dziejničaje ŭ častcy, jakaja nie supiarečyć Mytnamu kodeksu Mytnaha sajuza. Rašeńnie ab farmiravańni Mytnaha sajuza Biełarusi, Kazachstana i Rasii było pryniata ŭ listapadzie 2009 hoda ŭ Minsku prezidentami troch krain. Rasija i Kazachstan ratyfikavali Mytny kodeks MS. Pavodle nieaficyjnaj infarmacyi, 30 červienia kodeks ratyfikavaŭ i biełaruski parłamient, adnak heta było zroblena na zakrytym pasiadžeńni. Aficyjnyja pradstaŭniki hetyja źviestki nie paćviardžajuć, ale i nie abviarhajuć.

Svoj udzieł u MS Minsk źviazvaje z admienaj Rasijaj pošliny na naftapradukty, što ŭvoziacca ŭ Biełaruś. Jak zajaviŭ žurnalistam 30 červienia pieršy vice‑premjer Uładzimir Siamaška, kali Rasija admienić pošliny na naftapradukty, Biełaruś hatova «siońnia ž» padpisać pahadnieńnie ab Mytnym kodeksie. «Kali nie, to ŭ nas jość reziervy, pačakajem, — dadaŭ jon. — 4‑5 lipienia vy atrymajecie adkazy na ŭsie svaje pytańni». Hetymi dniami ŭ Astanie pavinny prajści pasiadžeńni Miždziaržaŭnaha savieta JeŭrAzES i vyšejšaha orhana MS na ŭzroŭni kiraŭnikoŭ dziaržaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?