Z raźvićciom technałohii kapijavać i pieradavać dadzienyja ŭsio praściej. U elektronnym śviecie, pierapisvajučy infarmacyju, my paprostu nie zadumvajemsia ab tym, adkul jana pachodzić i kamu naležyć. Taki padychod vielmi časta vyklikaje prablemy z zakanadaŭstvam.

U Rasii Śledčy kamitet pry MUS ciapier vyrašaje pytańnie pryciahnieńnia da adkaznaści najbolš aktyŭnych karystalnikaŭ torent-trekieraŭ, jakija zachavali na ŭłasnych kamputarach vialikuju kolkaść filmaŭ. Nahodaju stałasia raspačataja kryminalnaja sprava za «parušeńnie aŭtarskich pravoŭ» ŭ dačynieńni muža i žonki, jakija praz resurs interfilm.ru biez dazvołu pravauładalnikaŭ pradavali ŭ Internecie amatarskija pierakłady filmaŭ.

U lutym hetaha hoda rasijskaja kampanija «Ru-Centr» prypyniła delehavańnie papularnaha na postsavieckaj prastory partału torrents.ru, administracyja trekieru vymušana była źmianicca damiennaje imia i pierajści ŭ zonu .org.

Ci mahčyma padobnaje raźvićcio padziejaŭ u Biełarusi? Ukaz № 60 praduhledžvaje kantrol Internetu, ale mała kaho u Biełarusi chvaluje abarona kapirajtaŭ dy pravoŭ aŭtaraŭ.

«Siońniašniaja sistema abarony aŭtarskich pravoŭ nie daskanałaja. Biessensoŭna zmahacca ź pieradačaju filmaŭ u siecivie. Tym bolš u Biełarusi, dzie luby «piracki» film možna nabyć na kirmašy.
Lepš stvarać novuju sistemu achovy aŭtarstva dy padtrymlivać najaŭnyja servisy pieradačy źviestak», — ličyć zaŭziaty karystalnik torentaŭ Juraś, jaki za miesiac spampoŭvaje i pieradaje la 300 Hb infarmacyi.
«Naturalna, u Biełarusi isnuje zakanadaŭstva, jakoje abaraniaje aŭtarskija pravy. Inšaja sprava, što mała chto źviartajecca pa abaronu. Pracedura padačy, da taho ž, šmat kaštuje — kala 20 bazavych (700 tysiač), choć košt u dadzienaj spravie zaležyć ad roznych kryteraŭ, — kamientuje juryst.
— Kolkaść pazovaŭ pa abaronie aŭtarskich pravoŭ składaje niedzie 1–2 spravy za hod, jana značna mienšaja za kolkaść pazovaŭ pa abaronie hodnaści, naprykład».

Situacyja vyhladaje dosyć supiarečlivaj. Z adnaho boku, u internecie manifiest chakieru zaklikaje, što infarmacyja naležyć kožnamu ŭ roŭnaj stupieni. Ale nie kožny vałodaje adnolkavymi razumovymi zdolnaściami dla stvareńnia infarmacyi. Čamu chtości prykładaje namahańni dla źjaŭleńnia źviestak, a niechta musić atrymlivać ich zadarma?

Faktyčna, zachavańnie na kamputary prynamsi adnoj kopii kantrafaktnaj pradukcyi ŭžo jość złačynstvam i parušeńniem zakonnych aŭtarskich pravoŭ.

Torrent — pratakoł abmienu fajłami ŭ Internecie, pa jakim dadzienyja pieradajucca častkami. Kožny torrent-klijent, atrymlivajučy častku fajła, u toj ža čas pieradaje jaje inšym klijentam. Takaja sistema panižaje nahruzku i zaležnaść kožnaha karystalnika ad inšaha, bo fajły adnačasova pampujucca praź niekalki karystalnikaŭ. Jak pratakoł raspaŭsiudu fajłaŭ, torent nabyŭ vialikuju papularnaść siarod internet-juzieraŭ.

15 lipienia na niejki čas spyniaŭ pracu biełaruski torent-trekier www.torrent.by. Heta vyklikała čutki pra jaho zakryćcio. Adnak paśla abiedu jon adnaviŭ pracu.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?