Spadarožnikavy kanał «Biełaruś-TV» uvajšoŭ u dziasiatku samych papularnych infarmacyjnych telekanałaŭ u Rasii.

Nieefirnaje (kabielnaje/spadarožnikavaje) telebačańnie ŭ Rasii hladzić 32% nasielnictva, pryčym u 1 kvartale 2010 adbyŭsia značny rost aŭdytoryi.

Pavodle dadzienych admysłovaha daśledavańnia, siarod spadarožnikavych (nieefirnych) telekanałaŭ, jakija viaščajuć u Rasijskaj Fiederacyi, «Biełaruś-TV» sastupaje tolki «Rasii-24» i Euronews. Na pytańnie «Jakija ź pieraličanych telekanałaŭ vy hledzicie?» 87% vybrali «Rasiju-24», 53% — Euronews, 50% — «Biełaruś-TV». Telekanały CNN i RTVi nazvali 28% i 16% adpaviedna.

U paraŭnańni z 1-m kvartałam 2009 tydniovaja aŭdytoryja «Biełaruś-TV» siarod hledačoŭ nieefirnaha TB vyrasła na 50% i da 1-ha kvartału 2010 skłała 4,2% (dla paraŭnańnia: dola «Rien-TV» składaje 4,1%). Suadnosiny mužčyn i žančyn siarod aŭdytoryi telekanała składajuć 39% i 61% adpaviedna. 75% — heta hledačy va ŭzroście ad 35 hadoŭ i starejšyja. Asnoŭnaja masa hledačoŭ «Biełaruś-TV» pracuje, pryčym 11% zajmaje kiroŭnyja pasady. U cełym hledačy telekanała aceńvajuć svoj materyjalny stan jak siaredni i vyšejšy (79% u 2009 i 74% u 1-m kvartale 2010).

58% hledačoŭ «Biełaruś-TV» vybirajuć jaho za rasijskuju movu viaščańnia, 47% — za žanravuju raznastajnaść, 42% — za infarmatyŭnaść.
U jakaści inšych pryčyn respandenty nazyvali najaŭnaść dobrych starych filmaŭ, cikavaść da navinaŭ Biełarusi.

Pałova tych, chto nie hladzieŭ «Biełaruś-TV», adznačajuć u jakaści pryčyny niedastatkovuju kolkaść moładzieva-zabaŭlalnych prahram i sieryjałaŭ, a taksama bolšuju cikavaść da ŭnutryrasijskich navinaŭ.

Nahadajem, «Biełaruś-TV» — heta dziaržaŭny niekamiercyjny telekanał, jaki kruhłasutačna viaščaje za miežami Biełarusi i zabiaśpiečvaje infarmacyjnuju suviaź etničnych biełarusaŭ z histaryčnaj radzimaj. Viaščańnie viadziecca na biełaruskaj i rasijskaj movach.

Daśledavańnie TGI-Russia: «Rejtynhi i partret aŭdytoryi telekanała «Biełaruś-TV» praviedzienaje hrupaj COMCON na zamovu Biełteleradyjokampanii. Kampanija COMCON pravodzić rehularnyja i zakaznyja miedyjadaśledavańni, manitorynh stylu žyćcia i spažyvańnia rasijcaŭ, vyvučaje finansavy rynak.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?