«Adzin adkazny rabotnik Hłybockaha rajvykankama šapnuŭ mnie na vuška, što prarasijskim kandydatam na vybarach budzie Uładzimir Navumaŭ».
Taki dopis pryjšoŭ na sajt nn.by.
Hetyja čutki cyrkulujuć nie tolki siarod palityčna zaanhažavanych ludziej, ale i miž tych, chto pra palityku havoryć tolki na kuchni.
Paŭhoda tamu były ministr unutranych spravaŭ Uładzimir Navumaŭ źjechaŭ u Maskvu. Tam hienierał-lejtenant Navumaŭ uładkavaŭsia na pasadu daradcy hienieralnaha dyrektara dziaržaŭnaj karparacyi «Rastechnałohii» Siarhieja Čemiezava. Hetaja struktura znachodzicca pad asabistym kantrolem Uładzimira Pucina.
Paśla hetaha ŭ Minsku Navumava nichto nie bačyŭ, choć sam jon kaža, što rehularna pryjazdžaje. Pavodle niepaćvierdžanaj infarmacyi, suprać jaho była zaviedzienaja kryminalnaja sprava. Tamu pry pieršym pierasiačeńni miažy eks-ministr moža apynucca ŭ «amierykancy».
Uładzimir Navumaŭ nie moža być kandydatam u prezidenty choć by z toj pryčyny, što jon uradženiec Smalenska.
Pavodle biełaruskaha zakanadaŭstva, čałaviek, jaki naradziŭsia za miežami našaj krainy, nie moža zaniać najvyšejšuju pasadu. Raniej na hetym apioksia komik Kryžanoŭski ŭ 2001.
Pa-druhoje, vybar Navumava taksama dosyć dziŭny. Naŭrad ci biełarusy buduć masava hałasavać za adyjoznaha milicejskaha načalnika, ź jakoha ŭsio jašče nie źniatyja padazreńni ŭ hučnych źniknieńniach apanientaŭ ułady.
Vyhladaje na toje, što zapuskać čutki pra prarasijskaha kandydata Navumava mohuć śpiecsłužby. Tut i asabistaje źviadzieńnie rachunkaŭ (KDB i MUS pry Navumavu žorstka supierničali), i źbivańnie praciŭnikaŭ Łukašenki z pantałyku, kab jany spadziavalisia «na dziadźku».
