Indyjskaja kuchnia — raznastajna i ekzatyčna + recepty 2

Dzień indyjskaj kuchni, što śviatkavaŭsia 17 žniŭnia ŭ restaranie Taj, mieŭ svajoj metaj nie tolki prademanstravać usio bahaćcie indyjskaj kuchni, ale i śviatkavańnie Dnia niezaležnaści Indyi (15 lipienia).

Samo afarmleńnie restarana i ŭ zvyčajnyja dni adrazu pieranosić naviedvalnikaŭ u atmaśfieru Indyi, a ŭ honar Dnia niezaležnaści padabienstva stała poŭnym. Tym bolš što pravodziłasia śviata ŭ miežach konkursu «Pradukt hoda — 2010». Indyjskaja kuchnia — treciaja pa papularnaści ŭ śviecie: tut i vostryja, i sałodkija stravy, i prasmažanyja śpiecyi, i nacyjanalny chleb, što vyrablajecca adrazu tut. Śpiecyjalna dla zachavańnia aŭtentyki, ŭ restaranie ŭstalavanaja tradycyjnaja indyjskaja pieč «tandur». Hałoŭny ž sakret indyjskaj kuchni, pa słovach supracoŭnikaŭ «Tadža», — heta tyja emocyi, jakija ŭkładaje kuchar u svaju pracu — mienavita ad ich zaležyć jakaść i smak hatovaj stravy. Toje ž samaje rastłumačyŭ i prysutny na śviacie paŭnamocny ambasadar Indyi Ramieš Čander. Administracyja restarana prapanavała majstar-kłas pa pryhatavańni indyjskich stravaŭ, jakija, adnak, nie tak prosta pryhatavać doma — inhrydyjenty vielmi śpiecyfičnyja, kštałtu chatniaha syru panir, jaki robiać u samim restaranie. Pakolki pisać i čytać pra smak ježy — reč amal biessensoŭnaja, «NN» prapanuje vam pasprabavać samastojna pryhatavać niekatoryja indyjskija stravy.

Bulbiany sup pa-indyjsku.

Što treba ŭziać:

Vada — 800 hramaŭ

Bulba — 4 štuki

Masła — 3 łyžki

Repčataja cybula — 2 štuki

Morkva — 2 štuki

Kietčup — 3 łyžki

Sol — pałova harbatnaj łyžki

Mołaty čorny pierac — čverć harbatnaj łyžki

Nacierty syr — 3 harbatnyja łyžki

Bulbu treba zvaryć i prapuścić praź sita albo zrabić piure, pastupova raźvieści kipniem. Rastapić masła i absmažyć cybulu i morkvu da źjaŭleńnia karyčnievaj skarynački, źmiašać z supam (piure). Dadać kietčup, sol, pierac i znoŭ varyć 5–10 chvilin. Hatovy sup pasypać syram.

Baranina, zapiečanaja ŭ vinie.

Baranina — 8 kavałkaŭ (na čatyry piersony)

Čyrvonaje vino — 2 łyžki

Sol — 1 harbatnaja łyžka

Vada — 8 łyžak

Alej — 1 łyžka

Limonny sok — 2 łyžki

Pa vialikaj ščepci parašku imbiru i časnaku, sumiesi vostrych prypravaŭ i čornaha piercu.

Zrežcie z baraniny zališni tłušč, pramyjcie jaje i absušycie ručnikom. 30 chvilin marynujcie baraninu ŭ limonnym soku z vostrymi prypravami. Prakalicie kožny kavałak baraniny niekalki razoŭ videlcam i pakładzicie ŭ vohniaŭstojlivy posud. Źvierchu nalejcie źmiašanaha z vadoj vina i dadajcie aleju.

Źmiaścicie baraninu ŭ duchoŭku, nahretuju da 230 hradusaŭ, i hatujcie ciaham 1,5 hadziny.

U jakaści harniru rekamiendavanyja rys i sałata.

Juraś Uskoŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH