Biełaruski biźnies nie saromiejecca ekspłuatavać nastalhiju pa savieckim minułym. Adnak markietołahi pieraścierahajuć — zastałosia niadoŭha.
Harełka «SSSR», majki z savieckim hierbam, marožanaje «28 kapiejek», vahon-restaran u ciahniku Hrodna-Maskva, aformleny ŭ styli savieckaj epochi — usio heta nie biantežyć biełarusaŭ. Prynamsi, bolšaść ź ich. Častka hramadstva vystupaje kateharyčna suprać ŭžyvańnia savieckaj simvoliki dzie b tam ni było, nahadvajučy pra stalinskija represii i padniavolny stan Biełarusi ŭ składzie balšavickaj impieryi. Pry hetym u prykład staviacca susiednija krainy, dzie savieckija simvały zabaronienyja na aficyjnym uzroŭni. Tym nie mienš, u Biełarusi dahetul nie ličycca zahannym vykarystoŭvać nastalhiju pa niadaŭnim minułym, a niekatoryja pradprymalnyja ludzi robiać na hetym nišavy biźnies. Nakolki jon pierśpiektyŭny i ci varta nam bajacca «savietyzacyi» — na hetyja pytańni adkazvajuć kiraŭnik partała Marketing.by Siarhiej Skarachod i fiłosaf Valancin Akudovič. Za prykład my ŭziali staličny mahazin «Saviecki» — niadaŭna stvoranuju sietku kramaŭ miasnoj kulinaryi.
«Saviecki», bo jakasna i tanna
Mahazin «Saviecki» źjaviŭsia ŭ Minsku paŭhoda tamu. Heta sietka miasnych kramaŭ, jakaja naležyć TAA «Saviecki viek». Pakul u stalicy pracuje čatyry handlovyja kropki, jakija pradajuć ułasnuju pradukcyju. Čamu «Saviecki»? Dyrektar pradpryjemstva Dźmitry Śvirydaŭ tłumačyć: «My sprabujem rabić pradukcyju, jakuju mnohija pamiatajuć z tych niedalokich časoŭ. Pry hetym robim akcent na vysokuju jakaść i pryvabnuju dla pakupnikoŭ canu». Dźmitry Vitalevič pryznajecca, što nazva kramaŭ pakul nie asabliva spryjaje biźniesu. Ale ž i na rynku jany ŭsiaho paŭhoda. Adnak peŭnaja baza stałych pakupnikoŭ ŭžo sabrałasia.
Pry bližejšym razhladzie apynułasia, što savieckaja ŭ tych kramach chiba tolki nazva. Asartymient i sapraŭdy niebłahi, u interjery i abstalavańni i namioku niama na stylizacyju pad čyrvonaje minułaje. Pra toje, što heta ŭsiaho tolki biźnies, havorać nazvy kiłbasaŭ — «Śviatočnaja», «Kaladnaja», «Elitnaja».
«Stary pakupnik adychodzić»
Kiraŭnik partała Marketing.by Siarhiej Skarachod miarkuje, što biźnies, całkam vybudavany na ekspłuatacyi nastalhii pa minułym, nie maje doŭhaterminovaj pierśpiektyvy. «Pakaleńnie, jakoje nastalhuje pa Savieckim Sajuzie, niezvarotna sychodzić. Akramia taho, heta katehoryja pakupnikoŭ adnosicca da samaj kansiervatyŭnaj i nierazvarotlivaj». Prymusić ich zdradzić bližejšaj kramie ciažkavata, navat vyviesiŭšy kumačovuju šyldu na vitrynie. Najbolš ža aktyŭnaj i pierśpiektyŭnaj dla pradaŭca źjaŭlajecca hienieracyja 18-33 hadovych pakupnikoŭ, bolšaść ź jakich pa abjektyŭnych pryčynach nie maje santymientaŭ da savieckaha.
«U biełarusaŭ niama takoj varožaści da savieckaha»
«Biełarusam ciažka naviazać adnaznačna niehatyŭnaje staŭleńnie da ŭsiaho savieckaha. BSSR była adna z samych zamožnych krain u Sajuzie, samo isnavańnie pad Maskvoj dahetul nie ŭsprymajecca bolšaściu, jak akupacyja. U adroźnieńnie ad prybałtyjskich krainaŭ, dzie savieckuju simvoliku zabaranili», — kaža fiłosaf Valancin Akudovič. Ale ŭ pytańniach handlu ŭ dadzienym vypadku markietołahaŭ moža čakać niepryjemny siurpryz. «Što-što, a saviecki handal — sapraŭdnaja čornaja plama na śvietłym tle ŭspaminaŭ pra niadaŭniaje minułaje. Ni vopratki jakasnaj, ni abutku. Pastajannyja čerhi, a na astaču — deficyt».
Fiłosaf zaklikaje zališnie nie pierajmacca z toj nahody, što chtości nosić majku z savieckim hierbam, ci nabyvaje harełku «SSSR». «Heta tolki moda, i naturalna, što na hetym niechta sprabuje zarabić».
