Pra źnikły kamień stała viadoma 14 žniŭnia padčas akcyi ŭšanavańnia pamiaci žaŭnieraŭ polskaj armii, što zahinuli padčas varšaŭskaj bitvy ŭ 1920 hodzie.Anałahičnyja akcyi adbyvalisia ŭ mnohich miastečkach. Ale tolki ŭ Lidzie ułady telefanavali arhanizataram i nastojliva prasili nie ładzić mierapryjemstva. «Apošnim časam u źviazku z nadychodziačymi Dažynkami ŭ Lidzie vielmi niervovaja abstanoŭka», — kaža Andrej Pačobut, adzin ź lideraŭ Sajuza palakaŭ Biełarusi.
Jak paviedamiŭ staršynia Tavarystva polskaj kultury ziamli lidskaj Alaksandr Kałyska, la pomnika bačny ślady ad pahruzčyka, jaki zabiraŭ kamień. Šaścimietrovy mietaličny kryž biez nadpisaŭ zastaŭsia na miescy, a vałun z słovami «Katyń 1940» uviezieny ŭ nieviadomym nakirunku.
«U pramoj linii na lidskim radyjo na naš zapyt adkazali, što kamień byŭ pastaŭleny nielehalna i padlahaje likvidavańniu», — patłumačyŭ Alaksandr Kałyska.Adnak lidskaje Tavarystva polskaj kultury ab hetym nichto nie infarmavaŭ.
Ciapier pradstaŭniki Tavarystva płanujuć źbirać podpisy z patrabavańniem da miascovych uładaŭ viartańnia pamiatnaha kamienia.
13 krasavika 2010 hodu u Lidzie na starych mohiłkach pa vulicy Enhielsa byli aśviečany katynski kryž i kamień, pastaŭlenyja achviaram balšavickaha rasstrełu pad Katyńniu ŭ 1940 hodzie. Kamień pratrymaŭsia try miesiacy. Mohiłki znachodziacca niedaloka ad centra horada, kala budučaha praśpiekta Pieramohi, jaki zaraz aktyŭna budujecca ŭ Lidzie napiaredadni fiestyvalu Dažynki 2010. Katynski kryž staŭ miescam, dzie žychary horada ŭ znak salidarnaści z Polščaju uskłali kvietki dy stavili źnički. Aŭtaram kamiennaha pomniku źjaŭlajecca viadomy lidski raźbiar Ryšard Hruša.
