U paniadziełak 23 žniŭnia nad aktyvistam apazicyi z Klecka mieŭ pačacca kryminalny praces.
Siarhiej Panamaroŭ. (s)Fota Julii Daraškievič.
Aktyvist apazicyi z Klecka Siarhiej Panamaroŭ paprasiŭ palityčnaha prytułku ŭ Polščy. U Biełarusi suprać jaho była zaviedzienaja kryminalnaja sprava pavodle art. 369 KK RB («Źniavaha pradstaŭnika ŭłady»). Da sudu Panamaroŭ musiŭ znachodzicca pad padpiskaj ab niavyjeździe.
Karespandent NN źviazaŭsia ź Siarhiejem Panamarovym u Varšavie, dzie toj ciapier znachodzicca ŭ łahiery dla ŭciekačoŭ. Siarhiej Hiermanavič raspavioŭ pra akaličnaści svajho adjezdu.
Znajomy klecki milicyjant papiaredziŭ žonku Panamarova Śviatłanu, što jaje mužu treba terminova źjazdžać za miažu. Nibyta ŭ Klecki RUUS pryjazdžaŭ supracoŭnik KDB, pry sabie mieŭ papku z proźviščam apazicyjaniera i kazaŭ, što ź im treba skančać.Za Panamarovym ustalavali sačeńnie. U Minsk jon pajechaŭ z pustymi rukami, rečy dla jaho padrychtavali siabry ŭ stalicy. Spačatku pajechaŭ u Maskvu, a adtul praz Kijeŭ u Varšavu. U stalicy Polščy jaho sustreli pradstaŭniki fondu «Svaboda i demakratyja» («Wolność i demokracja»). Siarhiej Panamaroŭ paprasiŭ palityčnaha prytułku. Ciapier jon znachodzicca ŭ łahiery ŭciekačoŭ pad Varšavaj. Razam ź im tam pierabyvaje połacki maładafrontaviec Źmicier Sakałoŭ. Asnoŭny kantynhient łahieru — kaŭkazcy, akramia dvuch biełarusaŭ prytułku čakaje adzin ukrainiec.
Vymušany adjezd daŭsia kleckamu aktyvistu nie prosta. «Vielmi ciažka, bo mnie ŭžo chutka 59 hadoŭ». Panamaroŭ pierakanany, što pad aryštam ź im mahło zdarycca ŭsio, što zaŭhodna.Pry hetym jon nie chavaje, što jamu soramna za svoj adjezd.
U Polščy jon płanuje znajści pracu, paralelna miarkuje praciahvać hramadska-palityčnuju dziejnaść. «Ja ŭžo sustrakaŭsia z Alesiem Zarembiukom, na nastupnym tydni da mianie ź Bierlina pryjedzie Aleh Ałkajeŭ», — kaža Panamaroŭ. U Biełaruś jon źbirajecca viarnucca tolki paśla źmieny režymu.
Žonka Panamarova Śviatłana Anatoleŭna raskazała, što ŭ Klecku pakul usio cicha. «Zdajecca, Siarhieja pakul nie chapilisia. Nam dasłali dźvie paviestki ŭ sudy — na 23 žniŭnia pa kryminalnaj spravie, na 26-je pa administracyjnaj». Spadarynia Śviatłana nie vyklučaje, što jaje muža mahli spravakavać na ŭcioki. Ale pry hety jana adznačaje, što sama ŭhavorvała jaho źjechać, bo atrymała pieraściarohi ad vartaj davieru krynicy.
«Jahonaja kryminalnaja sprava šytaja biełymi nitkami, ale ŭ našaj krainie zusim niama nadziei na spraviadlivy sud, a ŭ Siarhieja nie toj uzrost i zdaroŭje, kab ni za što iści ŭ turmu».
23 žniŭnia ŭ 10.30 u sudzie Słuckaha rajonu pavinien pačacca kryminalny praces pavodle art. 369 KK RB («Źniavaha pradstaŭnika ŭłady»). Spravu na Panamarova zaviali 25 maja hetaha hoda. Suprać jaho buduć sudzicca piać kleckich čynoŭnikaŭ: staršynia Kleckaha rajvykankama A. Bojka, sudździa rajsuda A. Haściejeva, staršynia rajonnaha savieta deputataŭ P. Duduk i kleckija milicyjanty A. Kananovič i S. Zdrok. Pavodle śledstva, abrazy vyšejpamianionym asobam Panamaroŭ nanios svaimi artykułami ŭ vydavanym im biuleteni «Bojki Kleck».
Akramia taho, 26 žniŭnia ŭ sudzie Niaśvižskaha rajonu budzie razhladacca administracyjnaja sprava ŭ dačynieńni da Panamarova. Načalnik kleckaj ŽKH Alaksandr Navicki abskardziŭ u Minskim abłasnym sudzie rašeńnia niaśvižskaha suda nakont nievinavataści Panamarova.
* * *
Siarhiej Panamaroŭ nar. u 1951 u Rasii. U Biełarusi z 1989. U 2004, kali jahonaja žonka bałatavałasia ŭ parłamient, pamiž Panamarovym i staršynioj kleckaha rajvykankama Bojkam razhareŭsia kanflikt. Vynikam stała źniščeńnie biźniesu Panamarova — u jaho faktyčna adabrali stalarny cech. Z taho času Panamaroŭ pajšoŭ u apazicyju da ŭładaŭ: pačaŭ vydavać biuleteń «Bojki Kleck», stvaryŭ sajt, dzie rezka krytykavaŭ miascovuju viertykal i pravaachoŭnyja orhany. Jaho kolki razoŭ sprabavali pryciahnuć da kryminalnaj adkaznaści za paklop u drukavanym vydańni. Akramia taho, Siarhiej Panamaroŭ zajmaŭsia pravaabarončaj dziejnaściu — da jaho nieadnarazova źviartalisia pa dapamohu miascovyja žychary, pakryŭdžanyja dziejańniami ŭładaŭ i milicyi. Na svaim sajcie Panamaroŭ aśviatlaŭ i sacyjalnyja pytańni — naprykład, umovy pražyvańnia ŭ adnym z kleckich internataŭ, prablemy pjanstva asacyjalnych pavodzin u publičnych miescach, u pryvatnaści ŭ haradskim parku. Jon prapanoŭvaŭ miascovym uładam začynić u skviery bar, kab tudy mahli spakojna prychodzić baćki z małymi dziećmi.
U dni salidarnaści, a taksama na niepryznanyja siońniašniaj uładaj śviaty Panamaroŭ rehularna vyviešvaŭ nad svaim domam vialiki bieł-čyrvona-bieły ściah.
