Biełaruski siehmient ŽŽ apanavali sumnieŭnyja karystalniki.
Udzielnikaŭ forumaŭ papularnych hramadska-palityčnych internet-vydańniaŭ daŭno nie ździviš naviaźlivaj prysutnaściu ŭ dyskusijach kamientataraŭ, jakija pakidajuć adnatypnyja reakcyi. «Tavaryšy» zajmajucca tym, što pravakujuć inšych udzielnikaŭ abmierkavańnia na adychod ad pradmietu dyskusii. Najpierš u vypadkach, kali abmiarkoŭvajucca važnyja dla hramadstva temy. I tut u chod iduć lubyja srodki — da nieprychavanych abraz.
Na movie interneta padobnaje dziejańnie nazyvajecca trolinh (raźmiaščeńnie ŭ siecivie pravakacyjnych paviedamleńniaŭ z metaj vyklikać kanflikty pamiž udzielnikami, spravakavać ich na ŭzajemnyja abrazy).
«Troli» ŭ pahonach nie stajać na miescy i zasvojvajuć ŭsio novyja i novyja formy ŭździejańnia na internet-aŭdytoryju. Apošni časam sumnieŭnyja karystalniki apanoŭvajuć biełaruski siehmient livejournal.com. Na prykładzie sajta «Biełorusskij partizan», na jakim kamientavańnie artykułaŭ dastupnaje tolki zarehistravanym karystalnikam ŽŽ, pasprabujem praanalizavać pracu niekatorych padazronych kamientataraŭ. Ich tut niekalki dziasiatkaŭ. Naturalna, z poŭnaj upeŭnienaściu śćviardžać, što ŭsie hetyja karystalniki źjaŭlajucca zamaskavanymi ahientami, nielha. Adnak, hetuju hrupu abjadnoŭvaje niekalki charakternych momantaŭ, što navodzić na peŭnyja dumki.
Bolšaść ź ich zarehistravała svaje akaŭnty ciaham hetaj viasny-vosieni. Charakterna, što amal usie ź ich u svaich dziońnikach ničoha nie pišuć, a tolki kamientujuć (chto-nichto ŭmudryŭsia pakinuć kala paŭtysiačy kamientaroŭ za niekalki miesiacaŭ). U hetych karystalnikaŭ čaściej za ŭsio u siabrach niama nikoha, aproč ich samych.Častka ź ich u jakaści miescažycharstva paznačaje abłasnyja centry Biełarusi: zina_goik — Mahiloŭ, bmark2002 — Hrodna, doktar001 — Homiel. Mnohija ź ich vykarystoŭvaje ŭ jakaści imia litarna-ličbavyja kambinacyi kštałtu vvp333, kassa1, ci 17mag17.
Niekatoryja z padobnych časopisaŭ źjavilisia ŭśled za hučnymi padziejami ŭ palityčnym žyćci biełaruskaj apazicyi.Naprykład, adrazu paśla adjezdu ŭ Polšču kleckaha aktyvista Siarhieja Panamarova ŭ ŽŽ z roźnicaj u adzin dzień źjavilisia kłony jahonaha časopisu — punamarov.livejournal.com i panamarrov.livejournal.com. U jakaści vyjavaŭ stvaralniki hetych časopisaŭ vykarystali kałaž fotazdymkaŭ Panamarova ŭ milicejskaj formie. Sapraŭdny błoh aktyvista maje nazvu panamarou.livejournal.com.
Jość i takija, što svaimi niepiśmiennymi kamientarami na kiepskaj biełaruskaj movie, z adnačasovym užyvańniem «i» biełaruskaha dy «i» rasiejskaha, dy vykarystańniem vyjavy Zianona Paźniaka, dadajuć u dyskusiju absurdnaści (doktar001).
Časam na forumach, pryśviečanych biełaruska-rasijskim adnosinam, asabliva, kali hetyja adnosiny napružanyja, u dvuboi sychodziacca biełaruskija i rasijskija «troli». Ź biełaruskaha boku hučać pahrozy «dajści da Smalensku», z rasijskaha — «addać Polščy akupavanyja ziemli».
Nie pakidajuć raŭnadušnymi «tavaryšaŭ» i pytańni movy. Asabliva tut ščyruje bmark2002. Jamu niedaspadoby ni płany BNF viarnuć biełaruskaj movie status adzinaj dziaržaŭnaj, ni sproby prafiesara Astroŭskaha z Hrodna arhanizavać u horadzie biełaruskamoŭny kłas.
Napieradzie prezidenckija vybary, i nie treba być Nastradamusam, kab pradbačyć, što aktyŭnaść «trolaŭ» u pahonach budzie raści z kožnym dniom. Tamu treba być pilnymi. I jak rajać stałyja internaŭty — nie karmić «trolaŭ».
