Siońnia — 60 hadoŭ amierykanskaj haziecie «Biełarus» 3

60 hadoŭ tamu, 20 vieraśnia 1950 hoda, u Ńju-Jorku vyjšaŭ pieršy numar hazety «Biełarus».

Spraviadlivaści dziela varta zaznačyć, što heta była nie pieršaja hazieta ŭ Paŭnočnaj Amierycy. U 1926—1932 hh. pieršy prem'jer-ministr BNR Jazep Varonka vydavaŭ u Čykaha «Biełorusskuju tribunu». Hazieta vychodziła pa-rusku. Varonka jak prafiesijny žurnalist razumieŭ, što kali vydavać pa-biełarusku, to tahačasnyja emihranty čytajuć jaje nie buduć. A biełaruskich emihrantaŭ u vakolicach i samim Čykaha ŭ 1930-ch hadach było kala 70 tys. (pa acenkach samoha Varonki).

Presu na biełaruskaj movie zasnavała ŭ Paŭnočnaj Amierycy pavajennaja emihracyja. U lutym 1948 h. u Kanadzie vyjšaŭ «Biełaruski Emihrant». A 27 žniŭnia 1950 h. u Ńju-Jorku doktar Mikałaj Ščors zasnavaŭ «Biełaruskuju trybunu».

Ale vydańnie «Bieł. Em» spyniłasia ŭ 1954 h., hodam raniej — «Bieł. Trybuny».

A «Biełarus» vydajecca i siońnia. Jaho pieršym redaktaram byŭ juryst Leanid Halak.

Pieršy numar vyjšaŭ na čatyroch vialikafarmatnych staronkach i kaštavaŭ 10 centaŭ (tahačasny pahadzinny zarobak novych emihrantaŭ vahaŭsia ŭ miežach 60 centaŭ — 1 dalar).

Centralnym materyjałam numara była pramova prezidenta BNR Mikoły Abramčyka na bankiecie ŭ Čykaha.

U 1950-ch «Biełarus» vydavaŭsia nierehularna, brakavała finansaŭ, redakcyju raździrali kanflikty. № 2 vyjšaŭ u krasaviku 1951 h. U 1952 h. hazietu redahavaŭ Vitaŭt Tumaš, potym jaho źmianiła Natalla Arsieńnieva. Potym redaktaram byŭ brat Jakuba Kołasa Michaś Mickievič.

Ad 1962 da 1980 hoda «Biełarusa» redahavaŭ Stanisłaŭ Stankievič.

Hazieta stała vydavacca rehularna (raz na miesiac), u joj značna paboleła staronak, źjavilisia litaraturnyja bačyny, niejki čas navat vydavałasia staronka «Viestki z Kanady».

Pa śmierci S.Stankieviča hazietu redahavali Zora i Vitaŭt Kipieli, Anton Šukiełojć, Janka Zaprudnik, Lavon Jurevič dy inš.

Ad krasavika 2002 h. hałoŭny redaktar vydańnia — pradstaŭnik novaj chvali emihracyi Marat Kłakocki.

Ad vieraśnia 1950 h. vyjšła 572 numary. Hazieta maje svoj sajt.

Redakcyja «NN» vinšuje hazietu ź jubilejem i zyčyć advydavacca jak minimum jašče 60 hadoŭ.

0

0

0

0

0

0

nn.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH