U Muzyčnym teatry zaviaršyŭsia kastynh dla miuzikła «Błakitnaja kamieja». Padzieja cikavaja i navat znakavaja — adkryty konkurs na roli ŭ śpiektakli. Piša Julija Andrejeva.
Kaciaryna Muratava, Kim Brejtburh, Iryna Darafiejeva.
Zvyčajna akcioraŭ u našych teatrach pryznačajuć bieź nijakaha adboru, navat kali ich zaprašajuć ź inšych kalektyvaŭ. Cituacyja źmianiłasia, kali ŭ Minsk desantavałasia bryhada pastanoŭščykaŭ «Błakitnaj kamiei». Im dazvolili pravieści volny… ci chiba amal volny kastynh, pryčym nie ŭ jakaści pryvatnaj antrepryzy, a pad dacham akademičnaha dziaržaŭnaha teatra.
Pa pieršym uražańni, taki adychod ad žorstkich administratyŭnych pravił staŭsia mahčymy dziakujučy novamu, bolš libieralnamu kiraŭnictvu — i ŭ Muzyčnym teatry, i ŭ Ministerstvie kultury. Adnak vyśvietliłasia, što pryncypovaja damoŭlenaść nakont pastanoŭki «Błakitnaj kamiei» była dasiahnutaja jašče pry starym kiraŭnictvie.
Sam kastynh adbyvaŭsia, jak u halivudskim kino. Zvyš 800 udzielnikaŭ, siarod jakich byli i prafiesijnyja akciory, i studenty, i navat kiroŭca hruzavika. U adboračnaj kamisii, aprača aŭtara i pradziusiera «Błakitnaj kamiei» Kima Brejtburha, była jaho žonka Valeryja Brejtburh (viadomaja ŭ Maskvie vykładčyca estradnaha vakału), a taksama chareohraf i režysior Mikałaj Androsaŭ.
Adbor prachodziŭ u repietycyjnaj zale Muzyčnaha teatra. Udzielnikaŭ zapuskali ŭnutr hrupami pa 8-10 čałaviek. Tancory najčaściej prychodzili hurtam. Im davali vykanać padrychtavany numar, a potym pa čarzie stavili la baletnaha stanka i praviarali hnutkaść stavaŭ.
Śpievakoŭ vystrojvali ŭ šarenhu i adsiejvali pavodle vyhladu.Tych, chto spadabaŭsia, prasłuchoŭvali paasobku. Spačatku prasili zaśpiavać padrychtavany numar, potym niešta pračytać, ci pakazać parodyju, ci navat stančyć. Niekatorym udzielnikam adrazu admaŭlali, ale rabili heta vielmi dalikatna, kab nie pakryŭdzić. Kamuści abiacali patelefanavać. Papiaredžvali, što repietycyi miuzikła buduć składanyja, a płacić buduć pa ścipłych teatralnych rascenkach.
20 vieraśnia na pres-kanfierencyi abviaścili vyniki. Prynamsi, musili abviaścić, bo Kim Brejtburh usio jašče nie ŭpeŭnieny ŭ svaim vybary i adkryty dla novych prapanoŭ. Viadoma tolki, što hałoŭnuju žanočuju rolu budzie ihrać Iryna Darafiejeva, a taksama studentka 4-ha kursa Univiersiteta kultury Kaciaryna Muratava i artystka Muzyčnaha teatra Iłona Kazakievič.
Pryčym viadoma, što ihrać premjeru budzie sp-nia Darafiejeva, jakaja nie maje jakoha-niebudź teatralnaha vopytu.
Pastanoŭka finansujecca ŭ značnaj miery ź dziaržaŭnaj kišeni. Zadziejničanyja taksama srodki Muzyčnaha teatra (dziaržaŭnaj ustanovy) i asabistyja srodki Kima Brejtburha. Ci budzie prajekt rentabielnym, pakaža čas. Ale nakont rentabielnaści jość surjoznyja sumnievy. Dahetul usie pastanoŭki miuzikłaŭ u Minsku byli stratnymi. Da taho ž, sam siužet z kniažnoj Tarakanavaj, hrafam Arłovym i carycaj Kaciarynaj dla biełarusaŭ čužy i naŭrad ci pryvabny. A vydatki na šykoŭnyja dekaracyi i 200 histaryčnych kaściumaŭ buduć vializnyja.
Što datyčycca inšych piersanažaŭ, aprača kniažny, dyk vykanaŭca hałoŭnaj mužčynskaj roli pakul tolki adzin — Źmicier Jakubovič. Nibyta jość jašče dvoje, ale ich imiony Kim Brejtburh nie nazyvaje. Naadvarot, padkreślivaje, što da 5 listapada možna źviartacca ŭ teatr z prapanovaj svaich pasłuh. I, dumajecca, heta vielmi dobry šaniec dla biełaruskich artystaŭ. Kim Brejtburh i jaho kamanda — heta prafiesijanały, jakija vałodajuć technałohijaj pastanoŭki miuzikłaŭ, i sam pastanovačny praces — svajho rodu majstar-kłas. Nie varta ŭpuskać takuju mahčymaść. Bo tolki praz vyvučeńnie čužoha možna vyraścić svajo.
