Prakuratura Homielskaj vobłaści 30 vieraśnia vyniesła pastanovu ab pryciahnieńni ŭ jakaści abvinavačanaha milicyjaniera z Rahačoŭskaha rajona, jaki zabiŭ dziaŭčynu.

1 kastryčnika jamu budzie vystaŭlena kančatkovaje abvinavačańnie na padstavie p. 13 č. 2 art. 139 KK (zabojstva z chulihanskich namieraŭ). Pieršapačatkova havorka išła pra zamach na zabojstva (č. 1 art. 14 i art. 139 KK), bo na momant raspačynańnia kryminalnaj spravy dziaŭčyna była žyvaja, paviedamiŭ načalnik śledčaha adździeła pa najvažniejšych spravach prakuratury Homielskaj vobłaści Juryj Dziamjančyk. Pavodle jaho słoŭ, na nastupnym tydni kryminalnaja sprava budzie pieradadziena ŭ sud.

«Zabojstva było — heta fakt, a matyvu zabivać nie było, jon heta ŭčyniŭ biespryčynna», — skazaŭ Dziamjančyk.

Trahiedyja zdaryłasia 6 lipienia. U 23.00 učastkovy milicyjanier Rahačoŭskaha RAUS paraniŭ z tabielnaha pistaleta ŭ słužbovaj mašynie 22-hadovuju dziaŭčynu, žycharku vioski Žuravičy. Jana atrymała ślapoje ahniastrelnaje ranieńnie hałavy. Praz 10 dzion dziaŭčyna pamierła ŭ reanimacyi, nie prychodziačy ŭ prytomnaść.

U noč z 6 na 7 lipienia ŭ Žuravičach śviatkavali Kupalle. Za paradkam sačyli milicyjaniery z Rahačoŭskaha RAUS. Abvinavačany pavinien byŭ znachodzicca tym časam na terytoryi inšaha sielsavieta. Paciarpiełaja dziaŭčyna i dźvie jaje siabroŭki sieli ŭ mašynu da troch milicyjanieraŭ i pajechali ź imi ŭ susiedniuju viosku Doŭsk, dzie i zdaryłasia trahiedyja.

Ustanoŭlena, što milicyjanier na momant učynieńnia złačynstva byŭ pjany — u jaho kryvi było pryblizna 1,8 pramile ałkaholu. U kryvi jaho kalehi-ŭčastkovaha, jaki taksama znachodziŭsia na miescy NZ, było 2 pramile ałkaholu. Treci milicyjanier uciok, tamu jaho nie ahledzieli.

Vadziciel-milicyjanier byŭ ćviarozy, ale jon nie prainfarmavaŭ kiraŭnictva ab tym, što jaho kalehi pjanstvujuć, a nie achoŭvajuć hramadski paradak.

Paśla zabojstva bolš jak 30 supracoŭnikaŭ i kiraŭnikoŭ sistemy MUS byli pryciahnuty da adkaznaści — ad vymoŭ da zvalnieńnia. Słužbovaja pravierka, praviedzienaja ŭpraŭleńniem ułasnaj biaśpieki MUS, pakazała, što pryčyny ŭčynieńnia złačynstva — heta nie tolki asabistyja nizkija maralnyja jakaści milicyjaniera, ale i praktyčna poŭnaja adsutnaść kantrolu z boku kiraŭnictva Rahačoŭskaha RAUS i Homielskaha UUS.

Za hrubaje parušeńnie dyscypliny zvolnieny ź milicyi abvinavačany va ŭčynieńni zabojstva dziaŭčyny ŭčastkovy i try jaho kalehi, jakija znachodzilisia na miescy złačynstva. Dyscyplinarnaje pakarańnie atrymali kiraŭnictva Rahačoŭskaha RAUS, Homielskaha UUS i try kiraŭniki ŭpraŭleńniaŭ MUS, adkaznyja za achovu hramadskaha paradku, prafiłaktyku, kadry i śledstva.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?