Rehistracyja kandydataŭ saboj niečym nahadvała tok‑šou. Viadučyja (siabry CVK) i ŭdzielniki (kandydaty) praktykavalisia pamiž saboj u daścipnaści. U nastupny raŭnd prajšli ŭsie.
Pieršaj Andreja Sańnikava pavinšavała žonka Iryna Chalip.
Prychilniki Niaklajeva vitajuć rehistracyju.
Vasil Lavonaŭ demanstruje žurnalistam paśviedčańnie Uładzimira Niaklajeva.
Sańnikaŭ i Niaklajeŭ pavinšavali adzin adnaho praz skajp.
Kastusioŭ viadzie kampaniju pad bieł-čyrvona-biełymi ściahami.
Łazavik i Jarmošyna viali cyrymoniju ŭ stylistycy tok-šou.
Sieviaryniec prynios z saboj ściažok.
Michalevič vitajecca z Radźkovym.
Adzinahałosna.
U Pałac Respubliki puskali z hałoŭnaha ŭvachodu. Słužba achovy prezidenta dziejničała dosyć karektna. Što Łukašenki nie budzie, možna było mierkavać choć z taho, što na mierapryjemstva volna akredytavali ŭsich fota- i videažurnalistaŭ.
Kastusioŭ z Radźkovym pa‑biełarusku
U zale №7 hetyja prahnozy zbylisia. Šylda na stale ź imiem Alaksandra Ryhoraviča Łukašenki adsutničała. Zamiest jaho prysutničać mieŭsia ministr adukacyi Alaksandr Radźkoŭ. Jaho miesca było pobač z Ryhoram Kastusiovym i Alesiem Michalevičam.
Pieršym z kandydataŭ źjaviŭsia Andrej Sańnikaŭ u kampanii z kiraŭnikom svajho pieradvybarčaha błoku Uładzimiram Kobiecam. Potym i astatnija pretendenty stali zajmać naležnyja im miescy.
Pavieł Sieviaryniec pradstaŭlaŭ intaresy Vitala Rymašeŭskaha. Na stolik pobač z saboj jon pastaviŭ nievialiki bieł‑čyrvona‑bieły ściah.Ryhor Kastusioŭ adrazu pacisnuŭ ruku Radźkovu. Pačali pamiž saboj niešta ažyŭlena abmiarkoŭvać.
Potym papytaŭsia ŭ Kastusiova, pra što havaryli. «Nu, užo nieadnarazova sutykalisia pamiž saboj, uspaminali našy papiarednija sustrečy. Razmaŭlali pa‑biełarusku», — skazaŭ pradstaŭnik Partyi BNF.
Niaśmieła ruku Radźkovu pacisnuŭ i Michalevič.
Na stałach byli rasstaŭlenyja plaški ź biełaruskaj minierałkaj i kvasnym napojem. Ščyra skazać, nie samyja darahija častunki.
«Astap Bender adpačyvaje»
Apošnim z kandydataŭ źjaviŭsia Mikałaj Statkievič. Amal adrazu Lidzija Jarmošyna i pačała pasiadžeńnie CVK. Najpierš nievialiki ekskurs u minułyja etapy kampanii zrabiŭ sakratar CVK Mikałaj Łazavik. Kazaŭ, što ŭsio było demakratyčna. A voś podpisy źbiralisia amal usimi z parušeńniami. Aproč kaho b vy padumali? Pravilna, Alaksandra Łukašenki. U zale praniośsia śmiašok.
Nie praminuŭ mahčymaści Łazavik pairanizavać ź Mikałaja Statkieviča. «Samyja lepšyja zborščyki podpisaŭ byli ŭ Mikałaja Statkieviča. Jany mahli ŭhavaryć pastavić podpisy navat pamierłych. Tolki ŭ Viciebsku 20 niabožčykaŭ raśpisałasia za Statkieviča, — Łazavik jašče zhadaŭ, što mienavita hety kandydat najčaściej zajaŭlaŭ pra cisk i represii. — Źbirajučy podpisy siarod pryvidaŭ, kamanda Statkieviča sutykałasia z pryvidnymi pieraškodami».
Zrešty, vyrašyli, što 100 tysiač sabrali dziesiać kandydataŭ. A voś tut i pačałosia cikavaje. Stali abmiarkoŭvać, ci rehistravać Uładzimira Pravalskaha.
Pavodle źviestak CVK, hety kandydat naźbiraŭ až (udumajciesia tolki ŭ hetuju ličbu) 118 podpisaŭ!
Sam Pravalski nazvaŭ pracu vybarčaj kamisii Pieršamajskaha rajona Viciebska pieravyšeńniem słužbovych paŭnamoctvaŭ. I patrabavaŭ źviestak pa praviercy podpisaŭ.
«Parušajecie paradak, sp.Pravalski», — skazała Jarmošyna. «A vy parušyli vybarčy kodeks», — paryravaŭ kandydat‑niebaraka.
Zasłuchaŭšy Pravalskaha da kanca, Jarmošyna ad usioj dušy pramoviła: «Astap Bender adpačyvaje». Viciebskaha pradprymalnika nie zarehistravali. «Možacie być svabodnym», — skazała staršynia CVK.
Michalevič zrabiŭ kamplimient ab demakratyčnaści
U ałfavitnym paradku pieršym zarehistravany byŭ Ryhor Kastusioŭ. Kandydat u BNF u svajoj pramovie skancentravaŭsia na tym, što ŭ apazicyjnych kandydataŭ pa‑raniejšamu niama dostupu da ŚMI. A mnohija niezaležnyja vydańni vykinutyja ź sietak raspaŭsiudu.
Nastupnym byŭ Łukašenka. I tut piarečańniaŭ ni ŭ kaho nie ŭźnikła. Alaksandr Radźkoŭ vystupiŭ chutka. Najpierš dziakujučy tym, chto za dziejsnaha kiraŭnika podpisy i tym, chto raśpisaŭsia.
Žonka Michaleviča pamyliłasia ŭ dekłaracyi na 900 tysiač rubloŭ. Drobiaź, vyrašyli siabry kamisii. Jość treci kandydat.
Michalevič pramaŭlaŭ pa‑rasijsku. Zrabiŭ kamplimient hetym vybaram, što ŭsio prachodzić demakratyčna. U kiraŭnika jaho inicyjatyŭnaj hrupy Jurasia Mielaškieviča ŭ hety dzień naradziłasia dačka. «Dzieci — heta toje, što nas abjadnoŭvaje niezaležna ad palityčnych pohladaŭ», — skončyŭ A.Michalevič.
Samyja vialikija pytańni pa rehistracyi byli z Uładzimiram Niaklajevym. Vyśvietliłasia, što ŭ dekłaracyju jon nie padaŭ 20 akcyj «Pryjorbanka». U pryncypie, heta dastatkova, kab kandydata źniać z dystancyi, ale nie ŭ našych siońniašnich umovach.
Ramančuk padkałoŭ Jarmošynu
Niaklajevu ŭsio prabačyli. Navat Jarmošyna i Łazavik na hetym nastojvali, bo samy ž aktyŭny kandydat. Pradstaŭnik Niaklajeva Vasil Lavonaŭ pierakanany, što ŭ naleta ŭ Biełarusi budzie novy prezident.
Jarasłaŭ Ramančuk vyjšaŭ za paśviedčańniem kandydata z knihaj pra Paryž. «Heta ździek ź mianie ci spačuvańnie?» — zapytałasia nievyjaznaja Jarmošyna. «Heta havoryć pra toje, kali my staniem demakratyčnymi, to ŭ Paryžy zmohuć pabyvać usie, navat Vy», — adkazaŭ libieralny ekanamist.
Vychodziačy na trybunu, Sieviaryniec kiŭnuŭ: «Zaraz budzie». Tak i było. «Sistema siońniašniaj ułady prahniła, i jaje treba mianiać. Siońniašnija ŭłady pavinny pakajacca, što padmanvajuć narod. Alaksandr Łukašenka nie moža bałatavacca na pasadu prezidenta», — kazaŭ z trybuny P.Sieviaryniec.
Jon nahadaŭ pra chryścijanskija kaštoŭnaści, a pramovu skončyŭ słovami «Žyvie Biełaruś». Heta vyklikała nievialikija apładysmienty.
«Pieradajcie haspadaru vašaha bałahana»
Pramova Sańnikava była najbolš padrychtavanaj za astatnija. Pramaŭlaŭ kandydat dobra. «Našu krainu nazyvajuć apošniaj dyktaturaj. Heta hańba dla krainy. Ale heta spraviadliva».
Sańnikaŭ zhadaŭ pra źnikłych palitykaŭ. Jon prapanavaŭ ušanavać Viktara Hančara chvilinaj maŭčańnia. «Biełarusy nie chočuć žyć pry dyktatury. U nas jość šaniec źmianić. Ja zrablu ŭsio, kab zrabić Biełaruś demakratyčnaj», — zaznačyŭ jon.
Mikoła Statkievič uciahnuŭsia ŭ dyskusiju z Łazavikom, adkazvajučy na jahonyja zakidy. «Pieradajcie haspadaru vašaha bałahana, što ja kłoŭnam u hetym bałahanie nie budu», — jak i Kastusioŭ ź Sieviaryncam, Statkievič pramaŭlaŭ pa‑biełarusku.
Hołas Ciareščanki byŭ vielmi manatonny. A ŭ Dźmitryja Usa ŭ dekłaracyi nie chapała až 4,5 miljonaŭ. Tym nie mienš, heta mienš za 20% prybytku. Zarehistravali i jaho.
Pačnie Ciareščanka
Paśla hetaha Jarmošyna ahučyła, što debaty buduć prachodzić tolki ŭ žyvym efiry. Pajšli na sastupku apazicyjnym kandydatam, jakija nastojvali na hetym. A voś vystupy pa TB mohuć jak u žyvym efiry, tak i ŭ zapisie. Vyrašać samim kandydatam.
Losavańnie efirnaha času adbyvałasia tak, što kandydat ciahnuŭ kanviert z paradkavym numaram. Adkryvać siezon televystupaŭ vypała Ciareščanku. Ramančuk budzie druhim. Dalej — Niaklajeŭ, Łukašenka, Michalevič, Rymašeŭski, Us, Statkievič, Kastusioŭ, Sańnikaŭ.
Na vulicy kandydataŭ vitali ichnija kamandy. Na skajp‑suviazi z Kastryčnickaj płoščaj byŭ Uładzimir Niaklajeŭ. Jon u toj momant znachodziŭsia ŭ polskim MZS. Sańnikaŭ navat trochu parazmaŭlaŭ ź siabram‑kankurentam.
Jašče adzin etap projdzieny. Ciapier pačynajecca miesiac ahitacyi.
