Siońnia ŭ Biełarusi zaviaršajecca čarhovy etap vybarčaj kampanii pa vybarach deputataŭ miascovych savietaŭ. Kandydaty ŭ deputaty, jakija vyłučalisia šlacham zboru podpisaŭ, a taksama pracoŭnymi kalektyvami ci palityčnymi partyjami musiać zdać ŭ vybarčyja kamisii na pravierku nieabchodnyja dakumentu.
Napiaredadni ŭ Miensku adbyŭsia niečarhovy źjezd Partyi kamunistaŭ Biełaruskaj (PKB). Forum z udziełam amal 250 delehataŭ rekamendavaŭ usim pretendentam PKB u kandydaty deputataŭ miascovych savietaŭ źniać svaje kandydatury. Tłumačyć rašeńnie forumu siabra biuro CK PKB Siarhiej Vaźniak:
(Vaźniak: ) «Z ulikam taho, što Łukašenka zajaviŭ: «vybary prezydenckija byli falšavanyja» i z ulikam, što našy pradstaŭniki nie ŭklučany ŭ vybarčyja kamisii, źjezd rekamendavaŭ nia ŭdzielničać u miascovych vybarach. Kandydaty pojduć zdavać podpisy, sabranyja inicyjatyŭnymi hrupami, ale ŭdzielničać u vybarach nie budziem».
Sa słovaŭ Siarhieja Vaźniaka, u PKB było amal 150 patencyjnych kandydataŭ. A najbolšuju kolkaść kandydataŭ u deputaty vyłučaje Abjadnanaja hramadzianskaja partyja – da 200 čałaviek . Havoryć adzin ź lideraŭ AHP Ihar Šynkaryk:
(Šynkaryk: ) «Značnaja častka ŭžo zdali dakumenty na rehistracyju kandydataŭ. My vielmi šmat siłaŭ pakłali, kab zachavać jak maha bolš partyjnych strukturaŭ. Prykładna 20 čałaviek – novyja ludzi».
Siońnia spadziavańni partyi BNF na 132 vyłučency. 20 ź ich pasprabuje zarehistravacca kandydatami ŭ vybarčych akruhach Mienska. Kiraŭnik ŭpravy partyi BNF i vyłučeniec ŭ Mienski haradzki saviet Viktar Ivaškievič adkazvaje na pytańnie: čamu siabry BNF zdajuć dakumenty mienavita ŭ apošni dzień?
(Ivaškievič: ) «Nu, tamu što treba naźbirać bolš za 300 podpisaŭ, kab patrapić na Kanhres demakratyčnych sił. Miarkuju, što heta hałoŭnaja arhumentacyja, što zbor podpisaŭ idzie da apošniaha. Usio-taki nabrać 300 podpisaŭ – heta vialiki kavałak pracy».
Dalej pasłuchajem adnaho ź lideraŭ partyi Biełaruskaj sacyjał-demakratyčnaj hramady Alesia Stralcova. Jon kaža, što bolš jak 20 vyłučencaŭ partyi źniatyja z vybarčaj honki pa farmalnych padstavach. Surazmoŭca nie vyklučaje, što treba być hatovym da niepryjemnaściaŭ i siońnia:
(Stralcoŭ: ) «U apošni dzień časam zdarajucca «vybryki» u hetych kamisijach. Raptam ludzi tam źnikajuć raniej, čym treba. Na paru-trojku hadzinaŭ da kanca pracoŭnaha dnia. Ciažka vyłavić. Maju na ŭvazie, što tyja podpisy, jakija byli sabranyja ŭ piatnicu, subotu, niadzielu i paniadziełak ciažka zavieryć. Voś takaja zdarajecca hałoŭnaja prablema, kali zychodzić z nabytaha raniej dośviedu».
U suviazi z zakanadaŭčymi źmienami, padpisnyja listy nieabchodna zdavać adnačasova ź inšymi dakumentami, u pryvatnaści, z deklaracyjaj ab prybytkach. Sama pracedura rehistracyi kandydataŭ u deputaty adbudziecca z 5 pa 14 śniežnia.
