Druhi prezydent Ukrainy (1994–2005) Leanid Kučma zajaviŭ, što Hienprakuratura pradjaviła jamu abvinavačvańnie.
«Mnie pradjavili abvinavačvańnie. Ja pračytaju jaho. U paniadziełak my znoŭ sustrakajemsia sa śledčym», — skazaŭ jon žurnalistam paśla dopytu ŭ hałoŭnym śledčym upraŭleńni Hienprakuratury.
Raniej Kučma paviedamiŭ, što Hienprakuratura dała jamu vočnuju staŭku z hałoŭnym abvinavačanym u zabojstvie apazycyjnaha žurnalista Hieorhija Hanhadze — byłym vysokapastaŭlenym supracoŭnikam MUS Alaksiejem Pukačam.
Hienprakuratura padazraje Kučmu ŭ zabojstvie Hanhadze. Suprać jaho raspačali kryminalnuju spravu.
Tak, 23 sakavika namieśnik hienprakurora Renat Kuźmin zajaviŭ: «Kučma padazrajecca ŭ pieravyšeńni ŭłady, u dačy niezakonnych rasparadžeńniaŭ słužbovym asobam MUS, jakija pryviali ŭ vyniku da zabojstva Hieorhija Hanhadze».
Abiezhałoŭlenaje cieła Hanhadzie było znojdzienaje ŭ 2000 hodzie, kali Kučma byŭ pry ŭładzie. Hetak zvanyja stužki Mikoły Mielničenki, byłoha achoŭnika Kučmy, jakija jon nibyta zapisvaŭ sakretna ŭ kabinecie Kučmy, dajuć padstavy mierkavać, što były prezydent Ukrainy moh być zacikaŭleny ŭ zabojstvie Hanhadze.
«Ja ŭžo piać hadoŭ tamu skazaŭ, što heta — žachlivaja pravakacyja suprać Ukrainy i ŭkrainskaha prezydenta. Ja na hetych pazycyjach stajaŭ i budu stajać», — zajaviŭ Kučma 23 sakavika, pierad dopytam u prakuratury ŭ suviazi z uzbudžeńniem spravy suprać jaho.
14 vieraśnia Hienprakuratura abviaściła ab zaviaršeńni śledztva ab zabojstvie Hanhadze, jakoje adbyłosia ŭ 2000 hodzie. Vykanaŭcam byŭ nazvany Alaksiej Pukač. U studzieni sud vyrašyŭ, što Pukač zabiŭ Hanhadze pa ŭłasnaj voli.
