Prakuratura vobłaści vyśviatlaje pryčyny samahubstva Vadzima Ramaniuka.
Pałkoŭnik milicyi Vadzim Ramaniuk.
Jak stała viadoma, napiaredadni Hienieralnaja prakuratura raspačała ŭ dačynieńni da jaho kryminalnuju spravu pa artykule «Złoŭžyvańnie ŭładaj i słužbovymi paŭnamoctvami».
Nahadajem, 2 sakavika pałkoŭnika dastali ź piatli. Jak rastłumačyli ŭ prakuratury, milicyjant zabiŭ siabie. Pa słovach tavaryšaŭ pa słužbie, jaho znajšli dziažurnyja supracoŭniki Departamienta achovy, jakija pryjšli pravieryć kvateru načalnika pa prośbie jaho žonki. Žonka Vadzima Ramaniuka, jakaja žyvie ŭ Breście, narakała na toje, što nie moža datelefanavacca da muža.
Čatyry hady tamu Vadzim Ramaniuk pryjechaŭ z Bresta kiravać Hrodzienskaj abłasnoj achovaj. Mahčyma, na adčajny krok pałkoŭnik pajšoŭ z-za kryminalnaha pieraśledu.
Akazałasia, što
Hienieralnaja prakuratura zacikaviłasia pałkoŭnikam jašče ŭ 2009 hodzie i inicyjavała ŭ dačynieńni da jaho rasśledavańnie. Tady śledčy prakuratury Žabinkaŭskaha rajona praviaraŭ fakty, jakija mahli śviedčyć, što Vadzim Ramaniuk złoŭžyvaŭ uładaj i słužbovymi paŭnamoctvami.
Infarmacyju dla pravierki pieradali supracoŭnikam Kamiteta dziaržaŭnaj biaśpieki. Milicyjant padazravaŭsia ŭ tym, što pracujučy ŭ rajonnym adździele bresckaj achovy, vykarystoŭvaŭ u asabistych metach słužbovy transpart. Praviaralisia taksama źviestki, jakija kazali, što padnačaleny Vadzima Ramaniuka ŭ pracoŭny čas byŭ zaniaty nie na słužbie, a pracavaŭ na dačy načalnika, raźmieščanaj u Bresckim rajonie.
Pa słovach namieśnika prakurora prakuratury Žabinkaŭskaha rajona Bresckaj vobłaści Aleny Sidaruk, u toj čas śledčy, pravieryŭšy materyjały spravy, admoviŭ va raspačynańni spravy ŭ dačynieńni da Vadzima Ramaniuka. Tym nie mienš u hetym hodzie Hienieralnaja prakuratura, uličvajučy raniejšyja padazreńni, usio ž pačała kryminalnuju spravu ŭ dačynieńni da vysokapastaŭlenaha milicyjanta pa artykule «Złoŭžyvańnie ŭładaj i słužbovymi paŭnamoctvami».
Amal usie byłyja kalehi roznych ranhaŭ pryjšli pravodzić jaho ŭ apošni šlach. Pachavańnie adbyłosia ŭ Breście. Pa słovach pamočnika prakurora Bresckaj abłasnoj prakuratury Volhi Dźmitruk, usie kažuć, što Vadzim Ramaniuk byŭ spahadlivym i dosyć miakkim čałaviekam.
