Dakumientalnuju stužku pra dyskryminacyju invalidaŭ u halinie vyšejšaj adukacyi źniaŭ Siarhiej Isajeŭ.
Film nazyvajecca «Niezvyčajnyja ludzi».
«Pryniata stavicca da invalida jak da subjekta atrymańnia dapamohi, miedycynskich pasłuh, a nie abjekta dziejnaści, piersony, jakaja vykonvaje svaju sacyjalnuju rolu. Dziaržava nie hatova da takoj paradyhmy adnosin, — adznačaje ŭ filmie Siarhiej Drazdoŭski, staršynia Respublikanskaj asacyjacyi invalidaŭ-vazočnikaŭ, pravaabaronca. — Biełaruś nie padpisała vynikovy pratakoł Kanviencyi ab pravach invalidaŭ, bo heta patrabuje kantrolu nad vykanańniem rašeńniaŭ u adnosinach da ich».
Hieroi filma — ludzi, jakija nie bačać albo bačać słaba, drenna čujuć. Niechta zdoleŭ atrymać vyšejšuju adukacyju. Inšyja — jašče vučacca ŭ VNU. A chtości tolki maryć pra budučuju prafiesiju. I ŭsie jany raspaviadajuć pra ciažkaści, ź jakimi sutykajucca na šlachu da ŭniviersiteckaj aŭdytoryi.
U Biełarusi adsutničaje biaspłatnaje dystancyjnaje navučańnie i słužby dapamohi invalidam u sistemie vyšejšaj adukacyi.
Heta nie skarhi pra ciažkaści praź fizičnyja adchileńni — heta raspoviedy pra dyskryminacyju z boku dziaržavy. Takim ludziam prapanujucca śpiecyjalnaści švački, viazalščycy, u toj čas, jak jany hatovy zasvojvać zusim inšyja prafiesii. Im nie dazvalajuć samarealizoŭvacca ŭ tych halinach, u jakich jany chacieli b i mahli.
Film byŭ prezientavany ŭ Minsku ŭ Centry reabilitacyi invalidaŭ. Stužka budzie ŭdzielničać u fiestyvalach pravaabarončych filmaŭ u Minsku, demanstravacca na sustrečach i sieminarach.
Fil źniaty pa scenaryju Ludmiły Badzički i Vijalety Niadzielki, aŭtar idei — Enira Branickaja.Stužka źjaviłasia pry padtrymcy niaŭradavaj arhanizacyi «Čałaviek u niadoli» (Čechija) i Kamiteta abarony represavanych «Salidarnaść».
Film možna zamović pa numarach 8017-2808863, 8029-8751542, 8029-917 96 26 (Kamitet abarony represavanych «Salidarnaść»).
