Arhkamitet Chartyi'97 vyznačyŭ naminantaŭ Nacyjanalnaj premii ŭ vobłaści abarony pravoŭ čałavieka za 2006 hod. Hetaja ŭznaharoda była zasnavanaja Chartyjaj'97 u 1998 hodzie. U naminacyi «Za asabistuju mužnaść pry abaronie pravoŭ čałavieka» uznaharodžvajucca: abaroncy namiotavaha miastečka na Kastryčnickaj płoščy ŭ Miensku ŭ sakaviku 2006 hoda, były kandydat u prezidenty Biełarusi, palitviazień Alaksandr Kazulin, lider «Maładoha Frontu», palitviazień Źmicier Daškievič, aktyvistka Biełaruskaha Niezaležnaha prafsajuza Alena Zachožaja, vierniki, jakija ŭdzielničali ŭ haładoŭcy ŭ abaronu chrama pratestanckaj carkvy «Novaje žyćcio».
Namioty na Kastryčnickaj płoščy Mienska byli ŭstalavanyja 19 sakavika 2006 h. [20 sakavika – NN]u znak pratestu suprać falsifikacyi vynikaŭ prezidenckich vybaraŭ. U hety dzień na vulicy Mienska vyjšli dziesiatki tysiač biełarusaŭ. Moładź vyrašyła zastavacca na płoščy kruhłasutačna i damahčysia praviadzieńnia ŭ krainie svabodnych i spraviadlivych vybaraŭ. Ludzi mužna trymalisia piaciora sutak, niahledziačy na toje, što byli błakavanyja supracoŭnikami śpiecnaza, jakija ačapili płošču i aryštoŭvali ludziej, što sprabavali pranieści ŭ namiotavaje miastečka ciopłyja rečy, koŭdry, pradukty i haračuju harbatu. U noč na 24 sakavika namiotavaje miastečka było źniščanaje, sotni čałaviek byli źbityja i aryštavanyja.
Były rektar Biełdziaržuniviersiteta Alaksandr Kazulin kinuŭ vyklik Alaksandru Łukašenku na prezidenckich vybarach, jakija adbylisia ŭ sakaviku hetaha hoda. U svaim prahramnym vystupie na telebačańni jon padniaŭ takija pytańni, jak źniknieńnie i zabojstvy ŭ Biełarusi lideraŭ apazicyi i žurnalista, a taksama isnavańnie asabistaha fondu, u jaki pastupajuć hrošy ad prodažu Biełaruśsiu zbroi. Kazulin, aktyŭny ŭdzielnik paślavybarnych akcyj pratestu, byŭ aryštavany 25 sakavika padčas siłavoha razhonu mirnaj demanstracyi. U ciapierašni čas, voś užo 53 dni, Kazulin trymaje haładoŭku ŭ vypraŭlenčaj kałonii «Vićba-3», patrabujučy razhladu ŭ Radzie Biaśpieki AAN situacyi z parušeńniem pravoŭ čałavieka ŭ Biełarusi.
Lider niezarehistravanaj arhanizacyi «Małady Front» Źmicier Daškievič 1 listapada byŭ prysudžany da 1,5 hadoŭ pazbaŭleńnia voli ŭ kałonii ahulnaha režymu. Moładzievaha lidera abvinavacili ŭ «dziejnaści ad imia niezarehistravanaj arhanizacyi». «Maładafrontaŭcy» trojčy sprabavali zarehistravać svaju arhanizacyju, ale atrymoŭvali admovu z boku ŭład. Lider «Maładoha Frontu» ličyć svoj aryšt palityčna matyvavanym, svajoj viny nie pryznaŭ i ŭ ciapierašni čas znachodzicca ŭ kałonii strohaha režymu №17 h. Škłova.
Aktyvistka Biełaruskaha Niezaležnaha prafsajuza Alena Zachožaja, jakaja pracuje elektramancioram na babrujskim pradpryjemstvie “Biełšyna”, 43 dni trymała haładoŭku pratesta. 54-hadovaja žančyna abviaściła haładoŭku ŭ adkaz na parušeńni pravoŭ prafsajuzaŭ z boku administracyi “Biełšyny”. Na praciahu hetaha pieryjadu, za vyklučeńniem niekalkich dzion špitalizacyi, Zachožaja praciahvała vychodzić na pracu.
Bolš za 200 viernikaŭ pratestanckaj carkvy «Novaje žyćcio» na praciahu 23 dzion trymali «post-haładoŭku», patrabujučy ad mienskich haradskich uład viarnuć im malitoŭny dom i ziamielny ŭčastak. Na praciahu hetaha pieryjadu vierniki nie pakidali budynak carkvy, mužna adstojvajučy svoj chram.
Nahadajem, što letaś łaŭreatami Nacyjanalnaj premii ŭ vobłaści abarony pravoŭ čałavieka ŭ naminacyi «Za asabistuju mužnaść pry abaronie pravoŭ čałavieka» stali lider Biełaruskaj sacyjał-demakratyčnaj partyi (Narodnaja Hramada), kaardynatar Jeŭrapiejskaj kaalicyi, palitviazień Mikałaj Statkievič, moładzievy lider, palitviazień Pavał Sieviaryniec, aktyvist apazicyi, jaki ŭznačalvaŭ parłamienckuju hrupu «Respublika», palitviazień Siarhiej Skrabiec, deputat Viarchoŭnaha Savieta 13 sklikańnia, palitviazień Andrej Klimaŭ, pradprymalnik, palitviazień Mikałaj Aŭtuchovič; u naminacyi «Za adstojvańnie pravoŭ i svabod čałavieka» – Sajuz palakaŭ Biełarusi i Nacyjanalny humanitarny licej imia Jakuba Kołasa.
roznyja hady łaŭreatami Nacyjanalnaj premii ŭ vobłaści abarony pravoŭ čałavieka stanavilisia pravaabaronca Valeryj Ščukin, žonki źnikłych u Biełarusi lideraŭ apazicyi i žurnalista Iryna Krasoŭskaja, Zinaida Hančar, Śviatłana Zavadskaja, Narodnaja artystka Biełarusi Zinaida Bandarenka, aktyvist apazicyi Uładzimir Pleščanka, abaroncy Kurapataŭ, muzykalnyja hurty «N.R.M.», «Novaje nieba», žurnalisty Pavał Mažejka, Mikoła Markievič, Viktar Ivaškievič, Luboŭ Łuniova, Juraś Karmanaŭ, Maryna Koktyš, Hienadź Barbaryč i inšyja viadomyja hramadskija dziejačy, palityki, žurnalisty.
