Staršynia Rady BNR Ivonka Surviła z nahody Vielikodnych Śviataŭ zamiest vinšavańnia źviarnułasia z adkrytym listom da biełaruskaha narodu.
Darahija Surodzičy!
Vielikodnyja śviaty ŭ hetym hodzie supadajuć z adznačeńniem hadaviny vialikaj biady, jakuju daviałosia pieražyć biełaruskamu narodu ŭ kancy XX stahodździa. 26 krasavika spaŭniajecca 25 hadoŭ ad Čarnobylskaha złačynstva. Tamu nia ŭ siłach ja žadać Vam viasiołych śviataŭ, darahija surodzičy! Chaču tolki skazać siońnia, što biełarusy i ludzi dobraj voli va ŭsim śviecie, jakija viedajuć, što biełaruski narod usio jašče žyvie ŭ cieniu Čarnobylu, buduć z Vami ŭ hetyja dni.
Na žal, siońniašnija ŭłady Respubliki Biełaruś nia tolki nie apiakujucca svaim narodam, jaki paciarpieŭ ad strašnych radyjenuklidaŭ, ale i chočuć budavać na biełaruskaj ziamli novuju jadziernuju elektrastancyju, nie prajmajučysia ani Vašym zdaroŭjem, ani dolaju Vašych dzietak. Jany zabaraniajuć Vam navat prajści Čarnobylski Šlach u pamiać tych ludziej — časta Vašych rodnych, jakija ŭžo zahinuli ad čarnobylskaj radyjacyi.
Nad Vami iznoŭ visić čornaja chmara strachu.
Jašče paru miesiacaŭ tamu, padčas padziejaŭ 19 śniežnia minułaha hodu, Vas bili, kalečyli, źniavolvali, strašyli, kab lahčej było raspraŭlacca z najbolš mužnymi miž Vami, z tymi, chto spadziavaŭsia damahčysia dla Vas narmalnaha volnaha žyćcia. Ciapier, pry vielmi niajasnych abstavinach, vybuch u mienskim metro 11 krasavika.
Na biełaruskaj ziamli adnaŭlajecca stalinski teror.
Adna z našych maładych hierainiaŭ, mužnaść jakoj była pryznanaja ŭ dalokaj Amerycy, havaryła niadaŭna pra nianaviść, jakaja prajaŭlajecca ŭ Biełarusi suproć novaha pakaleńnia zmaharoŭ, suproć našaj aktyŭnaj moładzi. Dadam, što pavodle źviestak, jakija dachodziać da nas ź Biełarusi, my bačym, što hetaja nianaviść prajaŭlajecca ŭ adnosinach da ŭsiaho biełaruskaha, suproć kožnaha słova, skazanaha ŭ abaronu našaha narodu, našaj ziamli, našaj spadčyny. Pad zabaronaju navat klič «Žyvie Biełaruś!»
Pravodzicca biaźlitasny hienacyd našaj nacyi. Režym nie škaduje našaj ziamli, jamu abyjakavy naš los, abyjakavaja budučynia našych dziaciej, aby zachavać svaju biaźmiežnuju ŭładu.
Nielehitymny «ŭładar» pryznaŭsia, što jon hatovy zmahacca siłaju za ŭładu, vykarystoŭvajučy biełaruskaje vojska suprać biełaruskaha narodu, suproć Vas, darahija surodzičy.
Jakoje prava maje čałaviek, jakoha vy vybrali na piać hadoŭ 17 hadoŭ tamu, rasparadžacca siońnia Vašym losam, Vašaj ziamloju, Vašaj budučyniaju?
Jakoje prava maje jon sudzić biełaruskich dziejačoŭ, jakija pravinilisia tolki svajoj achviarnaściu i svajoj zakłapočanaściu dolaju biełaruskaha narodu?
Jakoje prava jon maje strašyć Vas, pieraśledavać sumlennych ludziej jak złačyncaŭ?
Jakoje prava jon maje źniavolvać Vas, kidać u turmy Vašych dziaciej, marnavać ichnaje i vašaje žyćcio?
Chto jamu daŭ hetaje prava???
Chaču paŭtaryć tut słovy papy Jana Paŭła II da svajho polskaha narodu ŭ ciažkija časy jahonaj historyi: «Nia bojciesia!»
Vy macniejšyja! Pasłuchajcie tych, chto ŭ turmie mieŭ čas pieradumać padziei apošnich 17 hadoŭ dyktatury. Jany vierać ŭ Vas. Paviercie im! Bo tolki ŭ adzinstvie narod zmoža vyzvalicca ź niavoli.
Pryjšoŭ čas, kali nam treba ačuniać, darahija braty i siostry biełarusy, kab nie zahinuć!!!
Žyvie Biełaruś!
Ivonka Surviła, staršynia Rady Biełaruskaj Narodnaj Respubliki