U «NN» trapiŭ list z adnoj ź minskich jurydyčnych kansultacyj. U Miniuście admovilisia ad kamientaroŭ pa telefonie.

Pavodle aŭtara lista, u jurydyčnyja kansultacyi stalicy pryjšli listy ź Miniusta. Zhodna ich, ministr justycyi Viktar Hałavanaŭ 15 krasavika padpisaŭ zahad № 96 «Ab udziele advakataŭ u adukacyjnych mierapryjemstvach za miežami Respubliki Biełaruś». Pavodle hetaha zahadu advakaty mohuć pakidać miežy Biełarusi «dla ŭdziełu ŭ adukacyjnych mierapryjemstvach za miežami Respubliki Biełaruś tolki sa zhody prezidyuma adpaviednaj kalehii advakataŭ».

Pryviadziom niekalki cytat.

«U apošni čas pačaścilisia vypadki samastojnaha naviedvańnia asobnymi advakatami roznych sieminaraŭ, «kruhłych stałoŭ» dy inšych padobnych adukacyjnych mierapryjemstvaŭ za miežami Respubliki Biełaruś, na jakich zaŭsiody vykładajucca viedy, jakija nie spryjajuć pavyšeńniu ŭzroŭniu pravavoj adukavanaści advakataŭ.

Pad vyhladam pašyreńnia viedaŭ ab pravach čałavieka tendencyjna aśviatlajecca praca pravaachoŭnych orhanaŭ i sudoŭ respubliki, dyskredytujecca praca terytaryjalnych orhanaŭ advakatury, rola orhanaŭ justycyi ŭ realizacyi prava hramadzian na abaronu.
Orhany advakackaha samakiravańnia samaŭchililisia ad hetaha pytańnia, biespryncypova staviacca da padobnych pasadak, što nie spryjaje ŭmacavańniu dyscypliny i arhanizavanaści ŭ advakackaj asiarodździ».
Zhodna dakumienta, prezidyumam abłasnych, Minskaj haradskoj kalehij advakataŭ na pastajannaj asnovie prapanavana zabiaśpiečvać vyjezd advakataŭ dla ŭdziełu ŭ adukacyjnych mierapryjemstvach za miežami Respubliki Biełaruś tolki sa zhody prezidyuma adpaviednaj kalehii advakataŭ;
vyznačać metazhodnaść udziełu advakataŭ u adukacyjnych mierapryjemstvach za miežami Respubliki Biełaruś na asnovie spravazdač advakataŭ z ulikam tematyki mierapryjemstvaŭ, śpiecyjalizacyi advakataŭ, vyklučeńni zryvaŭ sudovych pracesaŭ.

U kancylaryi Ministerstva justycyi karespandentu «NN» nie zdoleli adkazać, ci isnuje zahad № 96 i paraili źviarnucca va Upraŭleńnie advakatury i licenziravańnia jurydyčnaj dziejnaści. Adnak kansultant upraŭleńnia Valancina Barejša ad kamientaroŭ pa telefonie admoviłasia.

My pasprabavali daviedacca, ci atrymlivali list ź Ministerstva justycyi ŭ Minskaj haradskoj kalehii advakataŭ, ale tam nie paćvierdzili i nie abvierhli najaŭnaść zahada № 96.

***

Staršynia jurydyčnaj kamisii BCHK Hary Pahaniajła prakamientavaŭ čarhovy dakumient dla sajta «Biełaruski partyzan»: «Advakatura nie ŭvachodzić u sistemu ustanoŭ i arhanizacyj ministerstva justycyi. Z orhanami advakackaha samakiravańnia Miniust nie maje prava razmaŭlać šlacham zahadaŭ. Advakatura — niezaležny instytut, i orhany vykanaŭčaj ułady abmiežavanyja ŭ pytańniach kiraŭnictva jaje dziejnaści.

Pry ažyćciaŭleńni ahulnaha kiraŭnictva advakatury Miniust u pravie rekamiendavać advakatam tyja ci inšyja prapanovy, nakiravanyja na palapšeńnie ich dziejnaści, pavyšeńnie kvalifikacyi, u tym liku, praź sistemu adukacyjnych mierapryjemstvaŭ i samaadukacyi. Ale advakaty, jak i lubyja inšyja hramadzianie, majuć poŭnaje prava rasparadžacca svabodnym ad pracy časam, u tym liku samim vyrašać u jakich mierapryjemstvach im udzielničać, kali pradstaŭlajuć siabie ŭ asabistym jakaści. I nie važna, heta na terytoryi krainy abo za jaje miežami.

Tamu, prapanova Miniusta ŭ zahadnym paradku kalehija advakataŭ zabiaśpiečyć kantrol ŭdziełu advakataŭ u adukacyjnych mierapryjemstvach za miežami Biełarusi źjaŭlajecca niezakonnym. Zahad vydadzieny ź pieravyšeńniem paŭnamoctvaŭ i śviedčyć ab praciahu sprobaŭ akazańnia cisku na advakataŭ i ŭmiašalnictvam u ich dziejnaść», — ličyć pravaabaronca.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?