Novaja elektryčka — heta kamfortna i zručna, troški daražej čym na zvyčajnym ciahniku, ale tańniej, čym na maršrutcy.
1 lipienia 2011h. pačalisia testavyja rejsy novych elektryčak, pryznačanych dla absłuhoŭvańnia haradskich linij.
Pasažyry stajać u čarzie pa kvitki na “novuju” elektryčku. 1 lipienia 2011h.
Novaja elektryčka ŭ testavym režymie budzie rabić pa čatyry rejsy ŭ dzień u abodva baki.
Volnych miescaŭ u elektyrčcy było vobmal jašče da adpraŭleńnia.
Manitory i tabło elektryčki rasijskamoŭnyja.
Za chvilinu da adjezdu.
Nabyć kvitki možna ŭ kanduktaraŭ u časie ruchu.
Tut možna pracavać z noŭtbukam, padzaradzić telefon.
"Staryja" elektryčki na hałavu vyšejšyja za "novyja".
Pieršaja pajezdka, jak śviata.
Stancyja "Biełaruś".
Sustreča epochaŭ.
Pryjechali!
«Dva kvitki na «novuju» elektryčku da stancyi «Biełaruś», kali łaska!» — prosić stałaha vieku mužčyna ŭ vakienca novych pryharadnych kasaŭ Čyhunačnaha vakzała. Za kolki chvilin da apošniaha na siońnia rejsu da Zasłaŭja šviejcarskaj haradskoj elektryčki da kasaŭ vystrailisia doŭhija čerhi. Jak vyśvietliłasia paźniej volnych miescaŭ u elektryčcy było vobmal jašče da adpraŭleńnia. 1 lipienia pačalisia testavyja rejsy novych elektryčak, pryznačanych dla absłuhoŭvańnia haradskich linij.
Płaŭna, cicha i amal biez zvykłaha «tu-tu, tu-tu»
Pieršaje ŭražańnie ad novaj šviejcarskaj elektryčki — nakolki niezaŭvažna jana kranajecca ź miesca. Ja zavaziŭsia z fotaaparatam, a kali padniaŭ vočy, to ciahnik užo prajechaŭ u bok Zasłaŭja dobrych paŭsotni mietraŭ. U darozie vyjaviłasia jašče adna istotnaja i pryjemnaja asablivaść navinki — ciahnik jedzie biez ryŭkoŭ, cicha, amal biez zvykłaha «tu-tu, tu-tu», jakoje nahadała pra siabie chiba adnojčy niedzie pamiž Ratamkaj i Kryžoŭkaj.
U sałonie panuje prachałoda — kandycyjaniery pracujuć biezdakorna. Pasadka vahonaŭ nizkaja, dziakujučy čamu ŭzrovień padłohi ŭ ich supadaje z vyšynioj pieronaŭ. Dva razy zajšoŭ-vyjšaŭ i pra karaskańnie pa niazručych i vysokich prystupkach starych savieckich elektryčak pačynaješ uspaminać z dryhotkaj. U sałonie možna pracavać z noŭtbukam, padzaradzić telefon. Manitory paviedamlajuć pra maršrut ciahnika, aktualnuju datu i čas, tempieraturu ŭ sałonie i chutkaść ruchu. Kala ŭvachodu ŭ prybiralniu vystraiłasia nievialikaja čarha — usim chočacca pabačyć, jakaja jana ŭ šviejcarcaŭ.
«A čamu tut ceny nie jak u tramvai?»
Nabyć kvitki možna nie tolki ŭ kasach vakzałaŭ, ale i ŭ kanduktaraŭ niepasredna ŭ darozie. Adna ź ich trapiła pad hrad pytańniaŭ cikaŭnych pasažyraŭ. «A čamu ŭ inšych elektryčkach adrazu štrafujuć, a nie abilečvajuć na miescy?» — pytaje mužčyna, ź cikaŭnaściu razhladajučy partatyŭny kasavy aparat u rukach kanduktarki. — «Bo heta haradskaja elektryčka». Mužčyna nie sunimajecca: «Haradskaja? A čamu tady tut ceny nie jak u tramvai?» Žančyna ciarpliva tłumačyć, što rejsy tolki pačalisia, i ŭvohule jany testavyja, pa vynikach buduć raspracavanyja kančatkovyja rascenki. Da razmovy pačynajuć prysłuchoŭvacca śpiecnazaŭcy, što supravadžajuć ciahnik, siedziačy kala ŭvachoda ŭ kabinu mašynista. Pierad adjezdam ź Minska jany paśpieli pravieryć u hrupy čarniavych mužčynaŭ dakumienty. Vyciahvajuć šyju i supracoŭniki čyhunačnaj achovy, jakich apranuli u novuju formu i vysokija biercy.
«Bud́tie vnimatielny i ostorožny!»
Manitory i tabło ŭ novych ciahnikach rasijskamoŭnyja. Jak i raskłady ruchu i tablicy z paznačeńniem numaroŭ pieronaŭ na adramantavanych prypynkach u Masiukoŭščynie i Ždanovičach. Pra toje, što dźviery možna adčynić, nacisnuŭšy na zialonuju knopku, tolki paśla spynieńnia, žanočy hołas kaža pa-rasijsku. «Bud́tie vnimatielny i ostorožny!» — pramaŭlaje jon. I tut hučyć znajomy ŭsim pasažyram elektryčak žanočy hołas, jaki abviaščaje nazvy prypynkaŭ pa-biełarusku. Hety ž hołas, jaki kolki razoŭ ahučvaje prypynki nie ŭ patrebny čas, a taksama lohkaja niervovaść u pavodzinach piersanału, jašče raz nahadvaje, što siońnia novyja elektryčki ŭpieršyniu viazuć pasažyraŭ.
Daražej, čym na «zvyčajnaj» elektryčcy, ale tańniej, čym na maršrutcy
Novaja elektryčka ŭ testavym režymie budzie rabić pa čatyry rejsy ŭ dzień u abodva baki. Ź Minska ŭ Zasłaŭje jana vypraŭlajecca ŭ 07.05, 08.57, 17.15 i 19.10. U advarotny bok jana startuje ŭ 08.02, 10.12, 18.05 i 20.10. Šlach ad stalicy da horada Rahniedy i Iziasłava ŭ siarednim zajmaje kala 40 chvilin.
Kvitok da Zasłaŭja na novuju elektryčku kaštuje 2000 rubloŭ (na «zvyčajnuju» — 1550). Ilhotny kvitok kaštuje 1000 rubloŭ. Možna nabyć prajazny. Na miesiac na pradjaŭnika taki kvitok kaštuje 68000 rubloŭ, pa pracoŭnych dniach — 60000, pa vychodnych — 24000. Lhotny abaniemient abydziecca 32 tysiačy dekadny na pradjaŭnika — 24000. Heta daražej, čym na «zvyčajnaj» elektryčcy, ale tańniej, čym na maršrutcy, za jakuju ad Zasłaŭja da Čyhunačnaha vakzała ŭ Minsku treba zapłacić 5500 rubloŭ. Jak žychar Zasłaŭja, dazvolu sabie mierkavańnie zacikaŭlenaha pasažyra. Ja hatovy płacić za kamfort i zručnaść i 3 tysiačy, ale takaja elektryčka musić chadzić u najbolš napružany čas nie radziej, čym kožnyja 30-40 chvilin. Dumaju, u Zasłaŭi znojdziecca dastakova ludziej, jakija padzialajuć takuju dumku i jakim nadakučyła treścisia ŭ maršrutkach, dy jašče za 5500.
* * *
Biełaruskaja Čyhunka zaklučyła kantrakt sa Stadler Bussnang AG na pastaŭku 10 elektraciahnikoŭ novaha pakaleńnia ŭ sakaviku 2010 hoda. Piać ź ich prybuduć u Biełaruś u 2011 hodzie, astatnija — u 2012-m. Prezientacyja elektraciahnika vytvorčaści šviejcarskaj kampanii adbyłasia ŭ Minsku 22 sakavika 2011 hoda.
Prezientacyja 22 sakavika 2011 h.
