Jon pražyŭ 96 hadoŭ. Kardynał stajaŭ la vytokaŭ adradžeńnia katalickaha kaścioła ŭ Biełarusi.
photo.bymedia.net
21 lipienia, a 9-j ranicy, na 96-m hodzie žyćcia adyšoŭ u viečnaść kardynał Kazimir Śviontak.
U Minsku truna ź ciełam kardynała budzie vystaŭlena dla raźvitańnia 23 lipienia. Paminalnaja imša raspačniecca a 13-j hadzinie.
Jahonaje pachavańnie adbudziecca 25 lipienia a 12-j u Pinsku, tam, dzie jon słužyŭ. Pachavajuć jaho ŭ katedry.
U 1941 hodzie saviety pryhavaryli maładoha śviatara Kazimira Śviontka da rasstrełu. Jon čakaŭ jaho dva miesiacy ŭ Bresckaj turmie. Ale pačałasia vajna, i prysud nie paśpieli vykanać.Paśla vajny śviatara Śviontka adpravili na 10 hadoŭ u kancłahier. Paśla śmierci Stalina jon viarnuŭsia ŭ Biełaruś. Nie złamany, nie nadłomleny, nie azłobleny. Słužyŭ nie ŭ stalicy, navat nie ŭ abłasnym centry — u Pinsku. Adbudavaŭ tam sabor…
Karatkievič zachaplaŭsia budučym kardynałam.
Kali Biełaruś stała niezaležnaj, jon uznačaliŭ biełaruski kaścioł i zrabiŭ jaho sapraŭdy biełaruskim.
Epocha adbiłasia ŭ losie hetaha čałavieka. Našaha vialikaha suajčynńnika.
Voś što piša pra bijahrafiju śviatara partał biełaruskich katalikoŭ.
Kardynał Kazimir Śviontak naradziŭsia 21 kastryčnika 1914 h. u Estonii ŭ horadzie Vałha, achryščany byŭ u Ryzie. Kali jamu było 3 hady, jaho siamju vyvieźli ŭ Sibir. Paśla zakančeńnia Vyšejšaj duchoŭnaj sieminaryi ŭ Pinsku 8 krasavika 1939 h. u tamtejšaj katedry jon byŭ vyśviečany na śviatara i skiravany na pracu ŭ Pružany. U vyniku pieraśledavańnia relihii jon byŭ aryštavany i asudžany na śmierć. Dva miesiacy znachodziŭsia ŭ kamiery śmiertnikaŭ. Vajna, jakaja raspačałasia ŭ 1941 h., pieraškodziła vykanać prysud. Adnak u 1944 h. małady śviatar znoŭ byŭ aryštavany i asudžany na 10 hadoŭ łahieraŭ, dzie ciažka pracavaŭ spačatku ŭ Sibiry, a potym za Palarnym kruham u Incie kala Varkuty.
Vyjšaŭšy na volu ŭ 1954 h., jon apynuŭsia ŭ Pinsku. Narešcie nastała doŭhačakanaja chvilina, kali možna było adpravić śviatuju Imšu ŭ kaściole.
Dziakujučy samaaddanaj i achviarnaj pracy ksiandza Kazimira Śviontka adbudavana pinskaja katedra — napeŭna, heta była adna ź pieršych adbudavanych śviatyniaŭ na Biełarusi. Adbudoŭvajučy pinskuju katedru, ksiondz Kazimir pieradusim dumaŭ i rabiŭ usio mahčymaje, kab budavać žyvy Kaścioł — Narod Božy, žyvymi kamianiami jakoha źjaŭlajucca vierniki.
Kaniec 80-ch i pačatak 90-ch hadoŭ prynieśli doŭhačakanuju svabodu relihii.
Pastyrskaja aktyŭnaść ks. prełata Kazimira Śviontka, jaho addanaść spravie Kaścioła, niezvyčajnyja arhanizatarskija zdolnaści, aŭtarytet i pašana siarod śviataroŭ nie zastalisia nie zaŭvažanymi Apostalskaju Stalicaju. Śviaty Ajciec Jan Pavieł II u 1991 h. pryznačyŭ jaho pieršym Mitrapalitam novastvoranaj Minska-Mahiloŭskaj Mitrapolii i Apostalskim Administrataram Pinskaj dyjacezii.
Va ŭzroście 77 hadoŭ novy Mitrapalit raspačaŭ svajo biskupskaje słužeńnie.
Jon vizituje parafii, ustanaŭlivaje dekanaty, stvaraje patrebnyja dla Kaścioła struktury, baronić pravy viernikaŭ, aktyŭna ŭdzielničaje ŭ Sinodzie Biskupaŭ u 1991 h., u pasiadžeńniach Rady Kanfierencyi Biskupaŭ Jeŭropy i inšych kaściolnych arhanizacyjach, u mižnarodnych forumach, kanfierencyjach i h. d. Jon źjaŭlajecca śviedkam pieraśledvańnia katalickaj viery i jaje adradžeńnia na Biełarusi.
U 1994 h. Śviaty Ajciec Jan Pavieł II nadaje jamu tytuł kardynała— najvyšejšaja adznaka, jakaja moža być u Kaściole. Heta pryznańnie zasłuhaŭ nie tolki talenavitaha śviatara i biskupa, ale i mužnaha śviedki viery. Heta taksama pryznańnie pazicyi Kaścioła na Biełarusi i jahonaj roli ŭ suśvietnym Kaściole.
Kardynał Śviontak jašče z bolšaj enierhijaj i advahaj składaje prahramu adradžeńnia duchoŭnaści i padrychtoŭki Katalickaha Kaścioła ŭ Biełarusi da Vialikaha Jubileju 2000 hoda. U hetaj prahramie asablivaje miesca pryśviečana roznym pastyrskim prahramam, adbudovie śviatyniaŭ i najpierš minskaj archikatedry, a taksama pracy Sinodu Minska-Mahiloŭskaj archidyjacezii Pinskaj i Viciebskaj (jakaja dałučyłasia da Sinodu paśla jaje ŭtvareńnia) dyjacezij, jaki kardynał raspačaŭ u 1996 h. Znamianalny deviz Sinodu: «Usio adnavić u Chryście».
11 lutaha 1999 h. kardynał Kazimir Śviontak byŭ abrany pieršym Staršynioj Kanfierencyi Katalickich Biskupaŭ u Biełarusi — heta padkreślivaje jaho viadučuju rolu ŭ Kaściole i ŭ krainie.
27 vieraśnia 2004 h. Śviaty Ajciec Jan Pavieł II uručyŭ kardynaru Kazimiru Śviontku, arcybiskupu Mitrapalitu Minska-Mahiloŭskamu, śpiecyjalnuju ŭznaharodu «Fidei testis» (Śviedka viery), prysudžanuju Instytutam Paŭła VI.
14 červienia 2006 h. Śviaty Ajciec Benedykt XVI pryniaŭ prašeńnie ab vyzvaleńni ad pastyrskaha kiraŭnictva Minska-Mahiloŭskaj archidyjacezijaj, pradstaŭlenaje Jaho Eminencyjaj kardynałam Kazimiram Śviontkam u adpaviednaści z Kodeksam Kananičnaha Prava, kan. 401, § 1.
21 lipienia 2011 hoda a 9 hadzinie Kardynał Kazimir Śviontak adyšoŭ u viečnaść.
