U Homieli 20 lipienia z 19.00 da 19.30 prajšła akcyja maŭklivaha pratestu, ale biez apładysmientaŭ i rynhtonaŭ na mabilnych telefonach.
Na hety raz arhanizatary akcyi prapanavali sabracca na novaj placoŭcy — kala fantana pablizu cyrka. Raniej akcyi prachodzili na płoščy Lenina i kala ŭniviermaha «Homiel». Było ciažka vyznačyć, kolki ludziej biaruć udzieł u akcyi, a kolki pryjšli prosta pahulać, tamu što placoŭka kala fantana źjaŭlajecca tradycyjnym miescam masavaha adpačynku hamialčan, u asnoŭnym moładzi. Patencyjalnych udzielnikaŭ akcyi — tych, chto braŭ udzieł u minułych mierapryjemstvach, było kala 40 čałaviek.
Na placoŭcy kala fantana dziažuryli milicyjaniery, uklučajučy kiraŭnictva UUS, i ideołahi. Uzmocnienyja narady milicyi naziralisia taksama na płoščy Lenina, kala čyhunačnaha vakzała i ŭniviermaha «Homiel».
Pavodle papiaredniaj infarmacyi, nichto zatrymany nie byŭ. Ludzi pastajali, pasiadzieli na łavačkach, pahutaryli i razyšlisia. U 20.00 na placoŭcy kala fantana jašče zastavalisia milicyjaniery.
