Pastaŭka kazachstanskaj nafty ŭ Biełaruś biez damoŭlenaści z Rasijaj niemahčymaja, zajaviŭ žurnalistam biełaruski pasoł u Kazachstanie Valeryj Bryloŭ pierad naradaj kiraŭnikoŭ biełaruskich zahranustanoŭ u MZS 22 lipienia.
Jon adznačyŭ, što cieraź Biełaruś u Jeŭropu transpartujecca kazachstanskaja nafta; akramia hetaha, Kazachstan ekspartuje ŭ Biełaruś pradukty naftapierapracoŭki. «My atrymlivajem dla pierapracoŭki nie samu čystuju naftu, a hazojl i mazut. Čystuju naftu — pakul nie, ale my viadziom ab hetym pieramovy. Biez Rasii, biez trochbakovaj damoŭlenaści prapampoŭvańnie nafty pakul praktyčna niemahčymaje», — skazaŭ Bryloŭ.
U cełym, pavodle jaho słoŭ, ekanamičnyja i palityčnyja adnosiny pamiž Biełaruśsiu i Kazachstanam raźvivajucca paśpiachova. Pasoł taksama zajaviŭ pra «vialikija nadziei» na Mytny sajuz Biełaruś z Kazachstanam i Rasijaj, adnak «vyniki ŭ hetym płanie pakul jašče ścipłyja».
«Asabista ja pravioŭ bolš za 50 sustreč z našymi eksparciorami, zacikaŭlenymi ŭ raźvićci handlovych adnosin z Kazachstanam. Heta roznyja pryvatnyja i dziaržaŭnyja kampanii i firmy, u jakich jość cikavaść pracavać. Jany pracujuć — chto lepš, chto horš — i imknucca trapić na kazachstanski rynak. Zrazumieła, usie z dumkaj pra toje, što Mytny sajuz dapamoža lahčej pieraadolvać barjery, i naša pradukcyja tam budzie i tańniejšaj, i bolš zapatrabavanaj», — skazaŭ dypłamat.
