Viarchoŭny pradstaŭnik ES pa zamiežnych spravach i palitycy biaśpieki Ketryn Eštan 22 lipienia ŭ Brusieli vystupiła z zajavaj, u jakoj asudziła pryviadzieńnie ŭ vykanańnie śmiarotnych pryhavoraŭ u Biełarusi.

«Ja rašuča asudžaju śmiarotnuju karu Aleha Hryškaŭcova i Andreja Burdyki, pryhavoranych u Biełarusi da śmierci ŭ mai 2010 hoda, pra jakuju paviedamili dziaržaŭnyja ŚMI», — cytuje Eštan jaje pres-słužba.

«Ja viedaju pra žudasnyja złačynstvy, učynienyja hetymi dvuma asobami, i ŭ dumkach ja z achviarami i ich siemjami. Tym nie mienš Jeŭrasajuz vystupaje suprać prymianieńnia śmiarotnaj kary pry lubych akaličnaściach», — zajaviła kiraŭnik źniešniepalityčnaha viedamstva ES.

Eštan zaklikała Biełaruś dałučycca da hłabalnaha maratoryja na śmiarotnuju karu, jak da pieršaha kroku da paŭsiudnaj jaje admieny.

Pra rasstreł dvuch hrodziencaŭ, Aleha Hryškaŭcova i Andreja Burdyki, stała viadoma 20 lipienia z publikacyi ŭ haziecie «Viečiernij Hrodno».

Śmiarotny pryhavor im vynies 14 maja 2010 hoda Hrodzienski abłasny sud. Hryškaŭcova i Burdyku pryznali vinavatymi adrazu pa niekalkich artykułach Kryminalnaha kodeksa: «Zabojstva dźviuch i bolš asob z asablivaj žorstkaściu, spałučanaje z razbojnym napadam»; «Razboj z pryčynieńniem ciažkich cialesnych paškodžańniaŭ»; «Naŭmysnaje paškodžańnie majomaści šlacham padpału»; «Vykradańnie małaletniaha hrupaj asob»; «Razbojny napad»; «Zamach na kradziež aŭtamašyny» i «Kradziež dakumientaŭ». Paśla vyniasieńnia pryhavoru asudžanyja prasili prezidenta ab pamiłavańni, ale atrymali admovu.

22 lipienia pryviadzieńnie ŭ vykanańnie dvuch śmiarotnych pryhavoraŭ u Biełarusi asudziŭ dakładčyk Parłamienckaj asamblei Savieta Jeŭropy (PASIE) pa Biełarusi Andres Chierkiel.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?