Jašče adnym viadomym biełarusam paboleła ŭ «Žyvym žurnale». Ułasny Livejournal u pačatku studzienia zavioŭ były prezydent Nacyjanalnaj akademii navuk, eks‑śpikier savietu respubliki Alaksandar Vajtovič.
U pieršym paście sp. Vajtovič tłumačyć pryčyny: «Paśla šmatlikich prośbaŭ, jakija pastupali da mianie, a taksama ŭ metach naładžvańnia naŭprostavaha kantaktu i dyjalohu z Vami, ja pryniaŭ rašeńnie zavieści svaju staronku ŭ «Žyvym žurnale» Internetu. Niahledziačy na toje što ŭ mianie jość svoj sajt, ja liču, što nadyšła patreba bolš aktyŭnaha dyjalohu z hramadztvam. Ja zaklikaju ŭsich prychilnikaŭ pieramienaŭ u Biełarusi, vykarystoŭvajučy Internet, dałučacca da dyjalohu pra sytuacyju ŭ Biełarusi i razam vypracoŭvać rašeńni pa jaje źmienach».
Akademik Vajtovič na svajoj žž‑staroncy sprabuje aperatyŭna refleksavać na najbolš značnyja padziei žyćcia krainy i śvietu. Daje svaje kamentary i acenki. Taksama Vajtovič robić eksursy ŭ svaju bijahrafiju. Naprykład, jon piša čamu zhadziŭsia stać śpikieram savietu respubliki ci jak jon avałodaŭ kamputaram.
Siarod inšha, Vajtovič abjaviŭ, jak jon sam heta nazvaŭ «2‑dzionny ahulnabiełaruski fłeš‑mob u Internecie». Jon prosić usich svaich «frendoŭ» pryvieści na jahony błoh svaich znajomych, kab ŭbačyć kolki ludziej u Internecie čakajuć pieramienaŭ u biełaruskim hramadztvie.
Spačatku svoj błoh Alaksandar Vajtovič vioŭ całkam pa‑rasiejsku, ale paśla prapanovy adnaho z žž‑karystalnikaŭ, stała pačali źjaŭlacca i biełaruskamoŭnyja pasty. Treba adznačyć, što sp.Vajtovič dosyć aktyŭna pavodzić siabie ŭ žž, paśpieŭšy za hety čas nabyć značnuju papularnaść u asiarodździ biełaruskich błohieraŭ.
Pačytać Livejournal Alaksandra Vajtovič možna pa nastupnym adrasie.
