3 studzienia
«Briestskomu kuŕjeru» pradjavili abvinavačańnie
Redakcyja niedziaržaŭnaj hazety «Briestskij kuŕjer» atrymała list — kopiju adkazu Minsuviazi deputatu pałaty pradstaŭnikoŭ Valancinie Kačan. U śniežni deputat ź Bieraścia źviarnułasia ŭ Minsuviazi z pryčyny vyklučeńnia hazety «Briestskij kuŕjer» z padpisnoha katalohu na 2007 h. i admovy Bieraściejskaha filijału RUP «Biełpošta» raspaŭsiudžvać hazetu pa padpiscy, dastaŭlać ŭ rajonnyja centry. U aficyjnym adkazie za podpisam namieśnika ministra suviazi N. Haŭryłavaj śćviardžajecca, što ŭ 2006 h. hazeta «nia ŭ poŭnaj miery vykonvała ŭmovy damovy, što vyklikała za saboj dadatkovyja materyjalnyja i pracoŭnyja vydatki z boku pošty. Na parušeńnie damoŭnych abaviazkaŭ nieadnojčy ukazvałasia redakcyi hazety kiraŭnictvam Bresckaha filijała RUP «Biełpošta». Hałoŭny redaktar «Briestskoho kuŕjera» Mikałaj Alaksandraŭ paviedamiŭ: za 16 hadoŭ isnavańnia hazety redakcyja nie atrymlivała ad kiraŭnictva pošty nivodnaha paviedamleńnia, dzie b zhadvalisia fakty parušeńnia damoŭnych abaviazkaŭ z boku redakcyi.
4 studzienia
Pikiet u Salihorsku
4 śniežnia ŭ Salihorsku siabry niezarehistravanaha «Maładoha Frontu» arhanizavali pikiet la centralnaha rynku. Jany vyviesili transparant «Nie — vybaram biez alternatyvy!» i razdavali minakam ulotki z zaklikam da bajkotu vybaraŭ. Akcyja była prymierkavanaja da rašeńnia Palitrady demakratyčnych siłaŭ Salihorsku bajkatavać miascovyja vybary. Milicyjanty zatrymali Ivana Šyłu j Andrusia Tyčynu. Na I.Šyłu skłali pratakoł za «udzieł u niesankcyjanavanym pikiecie» i za parušeńnie Zakonu ab druku. Paśla maładzionaŭ adpuścili. Maładafrontaŭcy razdali na vulicach niekalki tysiačaŭ infarmacyjnych ulotak.
5 studzienia
Studentku BDEU verbuje KDB
Studentka fakultetu menedžmentu Ekanamičnaha ŭniversitetu Jana Karpovič nakiravała hienprakuroru skarhu na dziejańni supracoŭnikaŭ KDB. Pavodle skarhi, supracoŭniki KDB akazvali na studentku psychalahičny cisk, namaŭlali na supracoŭnictva, pahražajučy vyklučeńniem z universytetu. Ja.Karpovič źjaŭlajecca siabram inicyjatyŭnaj hrupy kandydata ŭ deputaty Mienharsavietu, aktyvista apazicyi Aleha Korbana. Specsłužbisty zmušali dziaŭčynu admovicca ad udziełu ŭ inicyjatyŭnaj hrupie Korbana.
Aktyvista AHP vinavaciać u padrobcy dakumentaŭ
Suprać siabra AHP Alaksandra Bułaŭkina zaviedzienaja kryminalnaja sprava pavodle art. 192 KK. Nahodaj stała nibyta padrobka A.Bułaŭkinym pratakołu pasiadžeńnia miascovaj supołki AHP, paśla pieradadzienaha ŭ Kruhlanskuju rajonnuju vybarčuju kamisiju z metaj rehistracyi kandydatam u deputaty Kruhlanskaha rajsavietu. Pastanovu ab uzbudžeńni kryminalnaj spravy pryniaŭ starejšy śledčy RUUS h.p. Kruhłaje Čyściakoŭ A.V. Kiraŭnictva AHP paćviardžaje fakt vyłučeńnia Bułaŭkina kandydatam.
Novy hod na narach
Novy hod pravaabaronca Valer Ščukin sustreŭ u Viciebskim izalatary časovaha ŭtrymańnia. 30 śniežnia jon byŭ asudžany na 7 sutak aryštu, bo prajšoŭ na zakrytaje pasiedžańnie abłsudu. Tam razhladalisia skarhi apazycyjnych kandydataŭ u deputaty, jakim admovili ŭ rehistracyi. Da 3 studzienia sp.Ščukin spaŭ na hołych narach: na navahodnich vychodnych paściel nie vydavałasia.
Babrujskaha pravaabaroncu vinavaciać u kradziažy
U Babrujsku zatrymany pravaabaronca Ihar Chodźka. Milicyjanty nibyta padazrajuć jaho ŭ ździajśnieńni kradziažu. Zatrymanaha advieźli ŭ aporny punkt HUUS Babrujskaha vykankamu.
Sud nad Milinkievičam adkładzieny
U sudzie Kastryčnickaha rajonu Miensku adbyłosia sudovaje pasiadžeńnie pa abvinavačańni lidera abjadnanych demakratyčnych siłaŭ Alaksandra Milinkieviča ŭ nibyta naŭmysnym niezakonnym pierasiačeńni miažy ź niesapraŭdnymi dakumentami. Sudździa Hiermanovič viarnuŭ składzieny pamiežnymi słužbami aeraportu «Miensk‑2» pratakoł na dapracoŭku. A taksama zadavoliŭ chadajnictva A.Milinkieviča, jaki zapatrabavaŭ viarnuć jahonamu synu pašpart, adabrany jašče 29 listapada letaś. Palityku pahražaje štraf da 4,5 tysiač dalaraŭ albo dva miesiacy papraŭčych rabotaŭ.
Homielskich demakrataŭ vyciskajuć z vulicaŭ
Kandydatam u deputaty miascovych savietaŭ homielskaj haradzkoj arhanizacyi AHP admaŭlajuć u praviadzieńni sustrečaŭ z vybarščykami na adkrytych placoŭkach u svaich vybarčych akruhach. Siabram miascovaj arhanizacyi AHP Viktaru Karniajenku i Leanidu Sudalenku, jakija balatujucca ŭ abłasny Saviet deputataŭ, a taksama Mikołu Kaluku, jaki balatujecca ŭ harsaviet, u harvykankamie patłumačyli: sustrečy z vybarščykami pravodziacca ŭ začynienych pamiaškańniach, zaćvierdžanych kamisijaj. U Homieli ž dla mitynhaŭ pryznačanaje adno miesca — placoŭka pierad DK tavarystva hłuchich «Vipra». Hety DK znachodzicca ŭ inšym rajonie horada, daloka ad akruh usich troch kandydataŭ.
Apazycyjnym kandydatam zabaranili pravodzić mitynh
Lideram mahiloŭskaj abłasnoj arhanizacyi BSDP (Hramada) Jurju Novikavu i Siarhieju Faminu admoŭlena ŭ praviadzieńni mitynhu i pikietu 6 i 12 studzienia.
Kandydat u deputaty Mahiloŭskaha harsavietu, viadomy ŭ horadzie hramadzki aktyvist Źmicier Sałaŭjoŭ u suviazi z hetym nakiravaŭ aficyjnuju zajavu ŭ haradzkuju vybarčuju kamisiju ab źniaćci svajoj kandydatury z udziełu ŭ vybarach.
6 studzienia
Milinkieviču čyniać pieraškody na Homielščynie
Aŭtamabil z Alaksandram Milinkievičam trojčy byŭ zatrymany milicyjaj u Homielskaj vobłaści, kudy jon pryjechaŭ jak davieranaja asoba kandydataŭ u deputaty miascovych Savietaŭ. U Śvietłahorskim rajonie milicyjantam padałosia, što kiroŭca Milinkieviča niećviarozy, u Rečycy jany 2 hadziny zadavali pytańni nakont adnaho z apošnich rečyckich kryminalnych zdareńniaŭ, a pa šlachu na Homiel milicyjanty źvinavacili vadziciela aŭto i jaho pasažyraŭ u tym, što jany niepryščeplenyja. Milinkievič nie patrapiŭ ni na adnu z zaplanavanych sustrečaŭ. I demakratyčnyja kandydaty — Anatol Papłaŭny ŭ Homieli, Valery Pucicki ŭ Rečycy i Viktar Ramaniška ŭ Śvietłahorsku — padali zajavy ab źniaćci svaich kandydaturaŭ u znak pratestu suprać dziejańniaŭ ŭładaŭ.
Zatrymańnie ŭ Babrujsku
Lider kampanii «Za svabodnaje raźvićcio pradprymalnictva», kandydat u deputaty ŭ miascovyja saviety ad BSDP (Hramada) Alena Miadźviedzieva była zatrymanaja milicyjaj na niekalki hadzin. Pryčynu zatrymańnia nie patłumačyli, u pastarunku praviali ahlad asabistych rečaŭ, skanfiskavali ŭlotki. Pratakoł žančyna nie padpisała.
8 studzienia
Pravaabaronca Aleh Voŭčak, kandydat pa Viaśnianskaj vybarčaj akruzie, źniaŭsia z vybaraŭ. Pryčynaj stała admova mienskich drukarniaŭ nadrukavać jaho pieradvybarčyja ŭlotki.
Zatrymali za parušeńnie Ŭkazu № 31
Moładzievy lider Alaksiej Šydłoŭski byŭ zatrymany ŭ centry Miensku za raspaŭsiudžvańnie nalepak «Džyns – za svabodu!». U Partyzanskim RUUS Miensku na jaho skłali pratakoł ab parušeńni Ŭkazu prezydenta №31 «Ab dobraŭparadkavańni žyllovaha fondu». Paśla składańnia pratakołu chłopca adpuścili.
U Viciebsku kanfiskavali ŭlotki
Milicyja kanfiskavała 7‑tysiačny nakład ulotak sa zvarotam da vybarcaŭ niezarehistravanych demakratyčnych kandydataŭ — alimpijskaha pryziora i dvuchrazovaha čempijona śvietu Ihara Kanyhina, byłoha staršyni štabu A.Milinkieviča Chrystafora Žalapava, kiraŭnika abłasnoj arhanizacyi BSDP (NH) Alaksieja Haŭrucikava, maci palitviaźnia Paŭła Sieviarynca Taciany, redaktara hazety pradprymalnikaŭ «My i rynak» Siarhieja Parsiukieviča. Kiroŭcu lehkavika, jaki pieravoziŭ nakład, Ihara Ciškina, vinavaciać u parušeńni zakonu ab vybarach, jamu pahražaje sud i štraf da 10 bazavych vieličyniaŭ albo papraŭčyja pracy.
9 studzieniaHaradzienskich «hrafitčykaŭ» aštrafavali
U sudzie Leninskaha rajonu Horadni adbyŭsia sud nad Vadzimam Łohinavym i Alaksiejem Kryvincovym. Kožny aštrafavany na 30 bazavych vieličyniaŭ (930 tys. rubloŭ). Heta minimalnaje pakarańnie praduhledžanaje pa 314 art. KK RB.
21 vieraśnia minułaha hodu chłopcy nanieśli na ścienach kaledžu pryborabudavańnia i internatu, u jakim pražyvaje Kryvincoŭ, hrafici antydziaržaŭnaha źmiestu pa‑biełarusku.
U toj samy dzień abodva haradziency byli zatrymanyja milicyjantami. I ŭžo tady pakryli materyjalnyja vydatki «za paškodžańnie majomaści».
Homielskaha aktyvista vinavaciać u ździajśnieńni DTZ
Supracoŭniki Homielskaj milicyi zatrymali kaardynatara niezarehistravanaha ruchu «Za Svabodu» pa Homielskaj vobłaści Ŭładzimiera Kacoru. Jaho mašyna, pavodle milicyjantaŭ, niekalki dzion tamu na nieviadomaj šašy stała pryčynaj darožna‑transpartnaha zdareńnia.