Jašče adzin internet‑partał biełarusizuje svaju hałoŭnuju staronku. Biełaruskamoŭny intefejs źjaviŭsia ŭ najbujniejšaha i najpapularniejšaha ajčynnaha sajtu TUT.BY.
Voś jak tłumačyć hetaje novaŭviadzieńnie hieneralny dyrektar TUT.BY Kiryła Vałošyn: «Inicyjataram stvareńnia biełaruskamoŭnaj versii hałoŭnaj staronki i pošukavaj systemy byli, kaniečnie, našy karystalniki. Mienavita jany vystupili z takoj prapanovaj».
Jašče raniej TUT.BY z ułasnaj inicyjatyvy pierakłaŭ na biełaruskuju movu interfejs paštovaj słužby. Tady i było ahučana abiacańnie pierakłaści na biełaruskuju movu i hałoŭnuju staronku partału, chacia jana pieršapačatkova i nie była prydatnaj dla šmatmoŭja. «Ciapier źjavilisia techničnyja mahčymaści», – kaža Kiryła Vałošyn.
U najbližejšy čas TUT.BY abiacaje pierakłaści na biełaruskuju movu raździeły navinaŭ, a taksama samyja papularnyja staronki.
Sami ž naviny pakul zbolšaha buduć źmiaščacca na rasiejskaj movie, choć plany dublažu navinaŭ na rodnuju movu ŭ «tutbajeŭcaŭ» taksama jość. Niekatoryja aryhinalnyja naviny, nahadajem, źjaŭlajucca pa-biełarusku.
Fota z sajtu tutby.com