Uračystaja cyrymonija adkryćcia pieršaj Nacyjanalnaj teatralnaj premii i pastanoŭka «Nabuka» Džuzepe Vierdzi adbylisia viečaram 4 kastryčnika ŭ Nacyjanalnym akademičnym Vialikim teatry opiery i baleta ŭ Minsku.

Zała dla hledačoŭ była zapoŭniena pakłońnikami teatralnaha mastactva roznych uzrostaŭ. Siarod ich byli i kiraŭniki teatraŭ, jakija biaruć udzieł u konkursnaj prahramie premii. Mierapryjemstva taksama naviedaŭ ministr kultury Pavieł Łatuška.

U hety dzień niekalkimi hadzinami raniej u Centralnym domie aficeraŭ taksama z anšłaham prajšoŭ śpiektakl «Kvartet» Ronalda Charvuda ŭ vykanańni Nacyjanalnaha akademičnaha dramatyčnaha teatra imia Ja.Kołasa, jaki adkryŭ konkursnuju prahramu teatralnaj premii.

Kiraŭnictva opiernaha teatra achvotna zhadziłasia pravieści cyrymoniju adkryćcia teatralnaj premii na svajoj scenie, skazała BiełaPAN viadučy redaktar rekłamna-infarmacyjnaha adździeła teatra opiery i baleta Volha Savickaja.

«Dla nas heta vialiki honar, nam vielmi pryjemna, — adznačyła jana. — My ž hałoŭnaja placoŭka krainy — vialiki teatr, vialikaja scena. My padyšli da ŭsiaho adkazna, i adčuvajem, što dastojnyja taho, kab adkryć premiju. U našych ścienach taksama projdzie i zakryćcio hetaha mierapryjemstva».

Havoračy pra opieru «Nabuka», jakaja pradstaŭlaje opierny teatr na premii, Savickaja adznačyła, što «heta vielmi mahutny pa dekaracyjach, vidoviščnaści, napaŭnieńni śpiektakl». «Hałoŭny režysior Michaił Pandžavidze ŭkłaŭ u jaho šmat sučasnych idej», — skazała viadučy redaktar.

U debiutnaj teatralnaj premii biaruć udzieł 12 śpiektaklaŭ-naminantaŭ, jakija padrychtavali vosiem minskich teatraŭ i čatyry rehijanalnyja. Siarod ich — Nacyjanalny akademičny Vialiki teatr opiery i baleta (opiera «Nabuka»), Nacyjanalny akademičny teatr imia Janki Kupały («Nie moj»), Respublikanski teatr biełaruskaj dramaturhii («Soniečka»), Nacyjanalny akademičny dramatyčny teatr imia Jakuba Kołasa («Kvartet «), Nacyjanalny akademičny dramatyčny teatr imia Maksima Horkaha («Eśfir»), Biełaruski dziaržaŭny akademičny muzyčny teatr («Aršyn mał ałan»), Biełaruski dziaržaŭny teatr lalek («Draj švestern»), Dramatyčny teatr Biełaruskaj Armii («Sabaka na sienie»), Hrodzienski abłasny teatr lalek («Mahičnaje lustra pana Tvardoŭskaha»), Homielski abłasny dramatyčny teatr («Chrosnaja maci»), Teatr-studyja kinaakciora («№ 13»), Mahiloŭski abłasny dramatyčny teatr («Tarełkin»).

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?