Parlament Venesueły «pahadziŭsia» na pradastaŭleńnie prezydentu nadzvyčajnych paŭnamoctvaŭ. Nadzvyčajnaja sesija prajšła na hałoŭnaj płoščy Karakasa – kab udzieł u debatach uziaty luby paspality žychar. Ciapier Čaves moža rabić, što choča.
U vyklučna pračavesaŭskim parlamencie nichto nie supraciŭlaŭsia zvyšuładzie prezydenta, jakuju jamu pavinna dać «maci ŭsich zakonaŭ» (jak nazyvaje jaje Čaves). Bolš za toje, pole jaho budučych dekretaŭ budzie značna pašyranaje.
Čaves atrymlivaje ŭładu viaršyć zakon nia tolki ŭ halinie enerhietyki, što abapirajecca na naftu i haz, a taksama «ŭ spravach abaronazdolnaści i biaśpieki», «sacyjalnych i ekanamičnych», u sferach «finansaŭ i padatkaŭ, navuki i technalohii, infrastruktury, pasłuhaŭ i transpartu, biaśpieki hramadzianaŭ i pravasudździa, etyki hramadzkaha kiravańnia», «terytaryjalnaj struktury krainy», a taksama «udziełu narodu ŭ vykanańni ŭłady».
Nie viadoma, jak kankretna hetuju ŭładu vykarystaje prezydent, abrany ŭ śniežni na čarhovy šaścihadovy termin. Ź jahonych zajavaŭ vynikaje, što pryncypovaj metaj budzie addańnie bolšaj častki ekanomiki dziaržavie i źviadzieńnie pryvatnaj ułasnaści i zamiežnaha kapitału da roli dapamožnaha, mienšasnaha partniora.
Čaves užo zajaviŭ pra adabrańnie ŭ vialikich zachodnich kancernaŭ – pamiž inšym, u brytanskaha BP, amerykanskich Exxon Mobil, Chevron, ConocoPhillips, francuzskaha Total i narveskaha Statoil – bolšaj častki udziełaŭ u vialikich investycyjach u naftavaj i hazavaj industryi, nacyjanalizacyju najbujniejšaj telekamunikacyjnaj kampanii CANTV, adabrańnie kancesii ŭ pieršaha pryvatnaha televizijnaha kanała RCTV.
«Niachaj nichto nie baicca. Bajacca musić kapitalizm, jaki źniščaje hramadztva, narod i ŭsiu Ziamlu. Chrystos skazaŭ, što sacyjalizm abudzić u nas luboŭ, skazaŭ Čaves, i zaklikaŭ suajčyńnikaŭ da pabudovy sacyjalizmu XXI st. «z usioj mocy, našymi sercami, rozumami i rukami». Kab ziemlakam było lahčej budavać, Čaves choča adčynić «asiarodki sacyjalistyčnaha vychavańnia», dzie žychary Venesueły buduć spałučać «vyvučeńnie ideałaŭ sacyjalizmu» i prafesijnuju padrychtoŭku.
Pabudovu sacyjalizmu Čaves źbirajecca kantralavać asabista. Sklikanaja im kamisija pa‑novamu napiša kanstytucyju krainy, kab prezydent moh abiracca nieabmiežavanuju kolkaść razoŭ, a nia tolki dva, jak było da hetaha času. Sam Čaves užo adkryta zajaviŭ, što choča kiravać da 2030 h.
U dvaccaci troch pravincyjach krainy budzie adabranaje prava vybaru hubernataraŭ, jakich z hetaha času budzie pryznačać prezydent. Usie palityčnyja partyi i abjadnańni, jakija da hetaha času padtrymlivali Čavesa, atrymali zahad abjadnacca ŭ adnu prezydenckuju partyju, a jaje stvareńniem zaniaŭsia čałaviek numar dva ŭ krainie, starejšy brat prezydenta Adam Čaves.
Manija vialikaści Chuha Čavesa nastrojvaje suprać navat jaho samych daŭnich prychilnikaŭ. Veteran venesuelskaha kamunizmu Luis Michilena, jaki finansava padtrymlivaŭ jaho siamju, kali ŭ 1992‑94 hh. pałkoŭnik Čaves siadzieŭ u turmie za niaŭdały putč, a ŭ 1999‑2002 hh. byŭ jahonym idealahičnym mentaram i najbolš viernym chaŭruśnikam, nia maje ŭžo iluzijaŭ. «Jahonaj metaj jość centralizacyja ŭsioj ułady. Jon nie prytrymlivajecca nijakich praviłaŭ. Heta ŭłada samavolnaja, persanalnaja, dyktatarskaja. Ja jaho pakinuŭ, kali zrabiłasia jasna, što jon pavieryŭ, što jon zvyš čałaviek i ŭsiemahutny vaładar».
