Apazycyja raspačała padrychtoŭku da druhoha Kanhresu demakratyčnych siłaŭ.
I ŭžo sutyknułasia ź ciažkaściami padčas pošuku pamiaškańnia. Aproč taho, niekatoryja aktyvisty apazycyi sumniajucca, ci varta ŭvohule pravodzić kanhres.
Kanhres demsiłaŭ pryznačany na 17—18 sakavika. Zajaŭki na arendu nakiravali haspadaram siami bujnych zalaŭ Miensku. Kancertnaja zala «Miensk» i Pałac kultury aŭtazavodu admovili ŭ arendzie, a ź inšych adkazaŭ niama. Razhladajecca varyjant praviadzieńnia kanhresu za miežami krainy.
Centralnaja revizijnaja kamisija pakul nie zakončyła pravierku podpisaŭ, što sabrali patencyjnyja delehaty. Niekatoryja podpisy vyklikali sumnieŭ. Hetuju sytuacyju patłumačyŭ staršynia Partyi kamunistaŭ biełaruskaj Siarhiej Kalakin:
Kalakin: «Na siońniašni dzień, pavodle maich źviestak, Centralnaja naziralnaja kamisija zaćvierdziła paŭnamoctvy 530 delehataŭ kanhresu. I bolš za 170 jašče znachodziacca na razhladzie. Niekamu admovili, bo hetyja śpisy pryznali niesapraŭdnymi».
Dahetul nia vyznačany i źmiest kanhresu. Pavodle adnaho ź siabroŭ palitrady, niechta choča pryniać «małuju kanstytucyju» ci kaštoŭnasnuju alternatyvu, a niechta choča pamianiać lideraŭ.
Nad prahramnymi dakumentami pracuje hrupa, jakuju ŭznačalvaje namieśnik staršyni BSDP (Hramada) Alaksiej Karol:
Karol: «Asnoŭnaja ideja — kanhres musić stać svajho rodu pieradparlamentam, jaki lehitymizuje adkaznaść abjadnanaj apazycyi za ichnyja dziejańni. Heta jakraz i imknieńnie rehijanalnych strukturaŭ, jakija b nie chacieli pieraŭtvareńnia kanhresu ŭ sprečku za liderstva, a chacieli b abjadnańnia pad scenar dziejańniaŭ i pieramienaŭ».
Pavodle staršyni arhkamitetu Alaksandra Buchvostava, adzinstva pakul niama:
Buchvostaŭ: «Adny chočuć kanhresu, druhija nia chočuć. Tamu idzie peŭnaje chvalavańnie vakoł taho, być kanhresu ci nia być. Ale my skazali: być, i my pryśpiešvajem padrychtoŭku».
Adnosna palitrady, jakaja źbiarecca ŭviečary 2 lutaha, kab abmierkavać hetyja pytańni, Siarhiej Kalakin skazaŭ:
Kalakin: «Ja dumaju, budzie razhladacca pytańnie — my źbirajemsia pravodzić kanhres, ci budziem hulać u hulni dalej? Kali kanhresu nia budzie — heta budzie kanstatavana, što niama nijakaj palitrady, nichto nikoha pradstaŭlać nia moža, i patrebnaja budzie novaja kanfihuracyja, jakaja budzie zroblenaja, i tut uvojduć tyja, chto hetaha choča».
Pavodle staršyni palitrady Alaksandra Milinkieviča, kanhres musić kansalidavać apazycyju i tajemnym hałasavańniem abrać lidera, jakomu ŭsie padparadkujucca.
Milinkievič: «Kali kanhres nia budzie abirać lidera, a budzie pracavać pavodle pryncypu ratacyi, ja liču, što heta vialikaja pamyłka. Nikoli ŭ dyktatury ratacyi nie pieramahali. I ciapier sapraŭdy ŭ mnohich ludziej, užo navat budučych delehataŭ kanhresu, pytańnie: ci varta taki kanhres źbirać. Ja rašeńnie nie pryniaŭ pakul što. I maje ŭmovy: kanhres pavinien być lehitymnym, tam nie pavinna być ludziej, jakija pavodle sfalšavanych podpisaŭ patrapili na kanhres. I, pa‑druhoje, jon musić spryjać kansalidacyi. Kali jon razburyć — nia varta»
